Judith Estrada-Larino

Patay ang 30-anyos na Pilipina matapos umano’y pagsasaksakin ng kanyang asawa sa San Diego, California.

Ayon sa Sheriff’s Department ng San Diego  County, ang biktimang si Rhona Barcelon ay nagkaroon ng pakikipagtalo sa asawang si Jay sa kanilang bahay sa Lemon Grove nitong nakalipas na ika-16 ng Abril.

Hinihinala ng mga otoridad na sinaksak muna ng suspek ang biktima bago sinaktan ang sarili nya.

Ipinabatid ng mga otoridad na pinuwersa nila ang pagpasok sa bahay ng mag asawa kaya’t napigilan pa ang pananaksak ng lalaki sa asawa nito na kapwa nalapatan naman ng paunang lunas.

Subalit dahil sa matinding sugat na tinamo ni Rhona, nasawi rin ito matapos ideklarang dead-on-arrival ng doktor.

Si Jay naman ay ginamot din at stable na ang kondisyon subalit mahaharap sa kasong murder.

Sina Rhona at Jay ay mayroong dalawang anak.

Nadagdagan pa ang mga senador na nanggigigil kay Lt. Gen. Antonio Parlade matapos i-red tag ang mga volunteer ng community pantry.

Ayon kay Senador Richard Gordon, tila na nada-divert sa red tagging ng organizers ng community pantries ang milyun-milyong pisong intelligence funds mula sa budget ng Armed Forces of the Philippines (AFP) sa halip na ipantulong sa mga Pilipino.

Sinabi pa ni Gordon na napapahiya lamang ang gobyerno sa pagsulpot ng community pantries dahil nangangahulugan itong kulang ang mga pagtugon ng pamahalaan ngayong may coronavirus disease 2019 (COVID-19) pandemic.

Likas na rin naman aniya sa mga Pilipino ang pagiging matulungin kaya’t hindi na dapat intrigahin o lagyan ng kulay ang mga community pantry.

Target ng gobyerno na paigtingin pa ang hospital capacity sa NCR Plus sa pamamagitan ng dagdag na 200 Intensive care unit (ICU) beds para ma-accommodate ang coronavirus disease 2019 (COVID-19) patients.

Kasunod na rin ito ng pahayag ni Presidential Spokesman Harry Roque na ilang regular hospital rooms sa mga pampublikong ospital ay gagawing ICU.

Isinasailalim pa aniya sa survey kung ilang regular rooms ang maaaring ma-convert bilang ICU.

Tiwala ang Palasyo na maisasapinal ngayong linggong ito ang planong conversion ng regular hospital rooms bilang ICU para sa mga may COVID-19.

Dumagsa muli bago pa sumikat ang araw ang maraming residente para makapila sa Maginhawa Community Pantry sa Quezon City.

Karamihan sa mga pumila ay isang grupo ng mga kababaihan na mayroong bitbit na plastic bag.

Magugunitang tila kabuteng nagsulputan ang mga community pantry sa iba’t ibang bahagi ng bansa matapos ma-inspire sa ginawa ni Ana Patricia Non na siyang organizer ng Maginhawa Community Pantry.

Pinakahuli ito ang community pantry na itinayo sa Timor Leste at inorganisa ng Pinoy at Timorese communities sa tulong ni Vice Consul Pedro Laranjeira ng Timorese Embassy sa Maynila.

Tanging sa mga hindi kakayaning maglakad o makapunta sa vaccination centers ang house-to-house vaccination.

Ayon ito kay Health Undersecretary for Field Implementation and Vaccination Coordination Myrna Cabotaje.

Kaya ang pagbabahay-bahay para magbakuna aniya ay limitado lamang sa mga bedridden, senior citizens at may comorbidities.

Ipinabatid ni Cabotaje na nagpalabas na ang Department of Health D(OH) ng mga panuntunan para sa ligtas na house-to-house vaccination na ginagawa na rin sa mga munisipalidad at lungsod.

Sinabi ni Cabotaje na ang pangkalahatang polisiya sa pagbabakuna ay fixed site tulad ng mga ospital at mga lugar na itinalaga bilang vaccination center.

Dapat asikasuhin na ng gobyerno hanggang sa susunod na linggo ang pagkuha ng dagdag na health workers.

Ayon ito kay Professor Ranjit Rye bagamat bumababa na ang reproduction number sa Metro Manila na ngayo’y nasa 1.01 na lamang subalit tiwala silang mababawasan pa ito.

Sinabi sa DWIZ ni Rye na dapat tuparin ng gobyerno ang pangakong dagdagan ang mga nurse at doktor dahil nakikita talaga nilang hindi mapapakalma ang punuang mga ospital.

Tao at hindi lamang pagtaas ng kama ang dapat tutukan habang patuloy na pinalalakas ang testing, contact tracing at treatment.

Testing, tracing, isolation, ang higit na kailangang gawin, tapos treatment, i-expand ang capacity. I-expand ang capacity, hindi lang magdadagdag ng kama, magdadagdag ng tao talaga,” ani Rye.

Ayon pa kay Rye, kailangang doblehin o i-triple ang 30,000 tests kada araw, samantalang mabagal pa rin ang pagsasagawa ng  contact tracing lalo na’t ilang linggo na ring sumisirit ang kaso ng coronavirus disease 2019 (COVID-19) sa bansa.

‘Yung testing po kailangan doblehin natin. Ano ‘yung sinasabi kong doblehin? Uma-average tayo ng 30,000 tests a day, sana umabot na ng 60-90,000. Makakatulong siguro ang antigen kasi marami ring naa-identify, e, ” ani Rye. —sa panayam ng Serbisyong Lubos sa 882

Sayang lamang ang pera ng bayan sa National Task Force to End Local Communist Armed Conflict (NTF-ELCAC) na umano’y puro kalokohan.

Binigyang diin ito nina Senador Joel Villanueva at Sherwin Gatchalian kaya’t target nilang patanggalan ng budget ang NTF-ELCAC.

Ayon kay Villanueva, mas mabuting gamitin ang P19-bilyon na budget ng task force sa pagbibigay ng ayuda.

Sinabi naman ni Gatchalian na hindi sulit ang pondo ng bayan para ipansuweldo sa katulad ni Lt. Gen. Antonio Parlade na tagapagsalita ng NTF-ELCAC.

Hindi nagustuhan nina Villanueva at Gatchalian ang pagkukumpara ni Parlade sa community pantry sa pag-aalok ni Satanas ng mansanas kay Eba.

Naghihinala rin si Parlade na may makakaliwa na gumagamit sa community pantries pra sulsulan ang mga taong magalit sa gobyerno dahilan kaya’t isinasailalim nila aniya sa background checking ang mga organizer ng mga community pantry.

Bago pa man sumulpot ang mga community pantry, isinulong na ni Senate Minority Floorleader Franklin Drilon at mga kasamahan sa minority bloc na idagdag na lamang sa budget pang ayuda ang NTF-ELCAC budget subalit nagpasya ang majority bloc na ibigay na lamang sa ahensya ang pondo para mapigilang lumahok muli sa New people’s Army ang mga nagbalik-loob na sa gobyerno. —ulat mula kay Cely Ortega-Bueno (Patrol 19)

Pinag-aaralan na ng organizer ng Maginhawa Community Pantry ang paghahain ng kaso laban sa mga patuloy na nagre-red tag sa kanya at iba pang nasa likod ng mga community pantry.

Ayon kay Ana Patricia Non, maraming nag-aalok ng legal service sa kanya para balikan ang mga nag-aakusa sa kanyang miyembro siya ng rebeldeng New People’s Army (NPA) at ginagamit ang community pantry para makapagrecruit.

Siniguro rin ni Non na kaya niyang patunayan na hindi siya miyembro ng NPA at tanging ang intensyon niya sa pagtatayo ng Maginhawa Community Pantry ay makatulong sa mga Pilipinong labis na naapektuhan ng coronavirus disease 2019 (COVID-19) pandemic.

Walang polyetos, flyers na sinisingit sa pagkain sa Maginhawa Community Pantry –organizer

Umalma si Ana Patricia Non sa iginigiit ng National Task Force to End Local Communist Armed Conflict (NTF-ELCAC) na sinisingitan nila ng mga polyetos at flyers ang mga kinukuhang pagkain ng mga pumipila sa Maginhawa Community Pantry.

Ayon kay Non, ang tanging ipinamimigay nila o iniaabot sa mga pumipila sa pantry ay alcohol bilang bahagi na rin ng safety protocols laban sa coronavirus disease 2019 (COVID-19).

Ipinabatid ni Non na halos buong araw ang media coverage sa kanilang community pantry at ito ang maaaring makapagsabi kung mayroong ipinamimigay na anumang may kinalaman sa New People’s Army (NPA) sa lugar.