Hiniling ng isang grupo ng mga abogado sa Korte Suprema na ipawalang-bisa ang awtoridad ni Senador Francis “Chiz” Escudero bilang presiding officer ng impeachment trial ni Vice President Sara Duterte.
Sa kanilang mosyon, hiniling nina Atty. Israelito Torreon at walong iba pang abogadong kaalyado ng mga Duterte na magpalabas ang Korte Suprema ng temporary restraining order (TRO) o status quo ante order upang pansamantalang ihinto ang impeachment trial.
Ayon sa grupo, kuwestiyonable ang paghalal kay Escudero bilang presiding officer dahil nakabatay umano ito sa isang amyenda sa Rules of Procedure on Impeachment Trials na kanilang kinukuwestiyon.
Iginiit din nila na ang Senate President lamang ang maaaring mamuno sa impeachment trial, maliban kung Pangulo ng bansa ang nililitis, kung saan ang Chief Justice ang magsisilbing presiding officer.
