Tinamaan na ng matinding krisis sa tubig ang Catbalogan City, Samar sa kabila ng mga nararanasang pag-ulan sa Visayas.
Bunsod ito ng nararanasang power outage at mataas na turbidity level o malabong mga water source ng lungsod tulad ng Caramayon Springs at Antiao River.
Ang mga nasabing water source ay pinangangasiwaan ng Catbalogan Water District at Tubig Catbalogan Corporation.
Hindi ma-i-proseso ang tubig mula sa Antiao at Caramoyan dahil sa labo kapag umuulan, at kung mayroon namang power outage, hindi makapag-pump patungo sa distribution system.
Dahil dito, sinuspinde na ni Catbalogan City Mayor Dexter Uy ang face-to-face classes sa lahat ng paaralan at pansamantalang nagpatupad ng work-from-home arrangement para sa mga empleyado ng gobyerno.
Gumagawa na ng paraan ang local government ng Catbalogan upang maisayos ang supply ng tubig.
