Judith Estrada-Larino

Kontra si Senador Panfilo Lacson sa gag order na ipinataw kay General Antonio Parlade na spokesperson ng National Task Force To End Local Communist Armed Conflict (NTF-ELCAC).

Ayon kay Lacson hindi angkop ang gag order kay Parlade dahil ang isyu laban sa heneral ay higit pa sa pag-atake nito sa mga organizer ng community pantry at sa pagtawag nitong ‘stupid’ sa mga senador.

Ang dapat aniyang gawin ng AFP ay pakinggan ang panawagan ng senado na sibakin si Parlade bilang tagapagsalita ng NTF-ELCAC dahil sa ilalim ng konstitusyon hindi maaaring italaga sa isang civilian position ang isang aktibong miyembro ng sandatahang lakas.

Para kay Lacson dapat i-censure si Parlade dahil sa pakikialam o pakikipagtalo nito sa usaping pulitikal sa halip na pagtuunan ng pansin ang kanyang misyon bilang commanding general ng Southern Luzon Command.

Pagdating naman kay PCOO Undersecretary Lorraine Badoy inihayag ni Lacson na ang political statements nito ay para lamang sa kanya habang ang NTF-ELCAC ay mayroong responsibilidad sa taumbayan.

Suportado ng OCTA research group ang mga panawagang palawigin ang MECQ sa NCR plus dahil sa “unstable” o hindi matatag na trend sa mga bagong kaso ng COVID-19.

Ayon kay Professor Guido David, miyembro ng OCTA research group inirerekomenda nilang palawigin ang MECQ para tuluyang mapababa ang kaso sa Metro Manila sa average na 2,000 bagong kaso kada araw sa Metro Manila sa susunod na dalawang linggo.

Gayunman binalaan ni David ang gobyerno na tiyaking “gradual” o dahan-dahan ang pagluluwag ng restrictions dahil kung bibiglain ay nanganganib sumirit muli ang kaso ng COVID-19.

Binigyang diin ni David na hindi muna dapat payagan ang mga indoor dining o mga aktibidad sa nasa kulob na lugar dahil malaking panganib ng pagkakahawa hawa ang pagdidikit dikit ng mga tao kasama ang outdoor activities kahit yung mga nasa palengke.

Mas makabubuting gamitin sa pagbili ng bakuna kontra COVID-19 at pamimigay ng ayuda ang budget ng National Task Force To End Local Communist Armed Conflict (NTF-ELCAC).

Binigyang diin ito ni Senate Minority Leader Franklin Drilon dahil kahit ipagpaliban ang barangay development projects sa taong ito at 2022 mayroon pa ring livelihood projects na maibibigay sa kanila ang iba’t ibang ahensya ng gobyerno tulad ng Department of Agriculture, DTI at DOLE.

Mas kailangan aniya ngayon ng ayuda dahil maraming mahihirap ang nawalan ng trabaho bukod sa pantulong din ang ayuda sa pagpapasigla ng ekonomiya dahil magkakaroon ang mga tao ng pambili ng pagkain at serbisyo bukod sa mas kailangan ang pambili ng bakuna kontra COVID-19.

Tinukoy ni Drilon na wala namang pondo at pangungutang pa ng gobyerno ang P70-B na itinakda nitong pambili ng COVID-19 vaccines.

Sa batas hinggil sa national budget nakasaad na uubrang ilipat ng Pangulo ang budget ng NTF-ELCAC sa pagbibigay ng ayuda at sa COVID-19 vaccination program.

Isinusulong ng siyam na senador sa pangunguna ni Senate Minority Floorleader Franklin Drilon ang resolusyon para kundenahin ng buong senado ang anito’y ilegal na pag-okupa ng China sa bahagi ng West Philippine Sea na nasa loob ng exclusive economic zone (EEZ) ng Pilipinas.

Ayon kay Drilon kasama niya sa pagsusulong ng resolusyon ang mga kapwa Senador Kiko Pangilinan, Leila De Lima, Risa Hontiveros, Ralph Recto, Grace Poe, Richard Gordon, Nancy Binay at Joel Villanueva.

Tiwala si Drilon na ang pagkundena ng senado sa mga ilegal na aktibidad ng China sa WPS ay makakahikayat sa mas marami para magsalita sa nasabing usapin.

Nakasaad din sa resolusyon ang pagsuporta ng senado kay foreign affairs Secretary Teodoro Locsin, Jr. sa paghahain ng mga diplomatic protest laban sa China.

Muling magpapatupad ng dagdag presyo sa mga produktong petrolyo sa ikalawang linggo ang mga kumpanya ng langis.

Epektibo bukas, Martes ipinabatid ng Pilipinas Shell Petroleum corporation at Seaoil Philippines ang dagdag na 45 sentimos sa presyo ng kada litro ng gasolina 35 sentimos sa diesel at 65 sentimo sa kerosene.

Ang nasabing halaga rin ang idadagdag sa presyo ng Clean Fuel  at Petrogazz maliban sa kerosene na hindi kabilang sa kanilang mga produkto.

Ang panibagong oil price hike ay ipatutupad alas sais ng umaga bukas maliban lamang sa Cleanfuel na mag-a-adjust ng presyo bukas ng alas 4:01 ng hapon.