Judith Estrada-Larino

Hinihintay pa ng Department of Health (DOH) ang resulta ng pag-aaral sa bagong variant ng coronavirus disease 2019 (COVID-19) sa India na naging dahilan nang pagsirit pa ng pagtaas ng kaso ng COVID-19.

Ito, ayon kay Health Undersecretary Maria Rosario Vergeire, ay sa gitna na rin nang patuloy pagtalakay nila ng Department of Foreign Affairs (DFA) sa posibleng pagpapatupad ng travel ban mula sa India.

Magugunitang tumaas ang kaso ng hawahan ng bagong variant na B.1.617 na mayroong dalawang genetic mutation na E484Q at L452R.

Wala pang komento ang Pangulong Rodrigo Duterte sa panukalang gawing mandatory ang pagbabakuna kontra COVID-19.

Ayon ito kay Presidential Spokesman Harry Roque bagamat tila marami na ring mga Pilipino ang nais magpabakuna sa kabila ng pagiging limitado ng supply ng COVID-19 vaccine sa bansa para sa ilang piling sektor.

Una nang isinulong ni Congressman Elpidio Barzaga ang House Bill 9252 para obligahin ang lahat ng mga Pilipinong magpabakuna kontra COVID-19 bilang solusyon sa vaccine hesitancy.

Subalit exempted naman batay sa panukala ang mga mayroong medical condition na hindi pinapayagan ng kanilang mga doktor na magpa bakuna.

Nakasaad sa panukala na ang mga indibidwal na tatangging magpabakuna ay hindi papayagang makapasok o makapunta sa mga pampublikong lugar na pagmamay-ari ng gobyerno o kahit pa ng pribadong sektor.

Ilang unibersidad sa bansa ang nagpatupad ng “no fail policy” sa gitna na rin ng COVID-19 pandemic.

Kabilang sa mga unibersidad na ito ang De La Salle University at University of the Philippines.

Inaprubahan ng La Salle ang resolusyon para ipatupad ang polisiya mula sa term 2 ng academic year 2020-2021 hanggang sa susunod na advisory nito.

Ayon naman kay UP Public Affairs Vice President Elenia Pernia hindi ibabagsak ang mga estudyante kahit walang naisumiteng requirement para sa kasalukuyang semester at bibigyan ang mga ito ng isang taon para makumpleto ang mga naturang requirements.

Samantala hindi magpapatupad ng no fail policy ang Ateneo De Manila University dahil nakasaad sa kanilang istruktura ang mga paraan para makumpleto ng mga estudyante ang kanilang requirements.

Uubra naman anitong mag-request ang estudyante ng withdrawal with permission o makakuha ng incomplete kung saan may maaari nitong makumpleto sa hihinging sapat na panahon sa mga guro.

Hindi rin magpapatupad ng ‘no fail policy’ ang PUP bagamat hinihimok ng communication management office nito ang kanilang faculty na magkaroon ng maximum tolerance, leniency o pagluluwag at awa o compassion sa kanilang mga estudyante.

Mayroong sapat na storage facility para sa mga bakuna sa bansa.

Tiniyak ito ni Health Undersecretary Maria Rosario Vergeire sa gitna na rin nang pinaigting na pagbabakuna lalo na kontra COVID-19.

Ipinabatid ni Vergeire na nakapaghanda na ang gobyerno ng mga gamit at pasilidad para matiyak ang paglalagakan ng mga bakuna kontra COVID-19 gayundin ang iba pang bakuna sa ilalim ng national immunization program .

Inamin ng Department of Health (DOH) na kulang ang vaccinators ng bansa para sa COVID-19 vaccines at mga bakuna ng national immunization program.

Sa paggunita sa national immunization week 2021 sinabi ni Health Undersecretary Maria Rosario Vergeire na mayroong hamon sa health system ng bansa dahil kapwa nakatutok ang healthcare workers sa COVID-19 at non COVID-19 response.

Halos lahat aniya ng healthcare workers na nagtatrabaho sa mga ospital ngayon ay nagsisilbi rin sa local government units.

Dahil dito ipinabatid ni Vergeire na pinalalalakas ng gobyerno ang hiring ng medical frontliners at nakikipag-ugnayan na rin sila sa pribadong sektor para mapalakas pa ang pagbabakuna kontra COVID-19.

Binigyang diin naman ni W.H.O Country Representative Dr. Rabindra Abeyasinghe na sa ilang lugar malaki talagang hamon ang access ng mga bata para mabakunahan dahil sa kakulangan ng healthcare workers.

Nabakunahan kontra polio at tigdas ang mayorya ng mga batang dapat tumanggap nito.

Ayon ito kay Health Undersecretary Maria Rosario Vergeire sa gitna na rin ng COVID-19 pandemic.

Sinabi ni Vergeire na 90.3% o 8.5 million mula sa 9.4 million target population ang  nabakunahan kontra tigdas samantalang mahigit 87% o nasa halos anim na milyong bata may edad lima pababa mula sa 6.9 target population ay nabigyan ng oral polio vaccine.

Ang unang bahagi ng inoculation campaign ay isinagawa noong October hanggang November 2020 sa malaking bahagi ng Luzon at buong Mindanao.

Ang ikalawang bugso naman ay ginawa nitong Pebrero sa Metro Manila, Central Luzon,  Calabarzon at Visayas.

Gayunman inihayag ng DOH na mahigit 30% lamang na mas mababa sa national target ang bilang ng mga kabataang sumalang sa routine childhood immunization noong isang taon dahil na rin sa pandemya.