Judith Estrada-Larino

Sumirit pa sa 1, 013, 618 ang kumpirmadong kaso ng COVID-19 matapos madagdag ang 7, 204 na mga bagong kaso ng virus.

Ipinabatid ng DOH na naitala sa 71, 675 ang aktibong kaso ng virus kung saan 95. 2% ang mild, 1.5% ang asymptomatic, 1.3% ang severe at 1.1% ang critical condition.

Samantala pumapalo sa 10, 109 pang mga pasyente ang mga bagong gumaling sa COVID-19 dahilan para umakyat na sa 925, 027 ang total recoveries.

63 naman ang naitalang bagong nasawi sa COVID-19 kaya’t sumirit na sa 16, 916 ang kabuuang bilang ng mga nasawi sa nasabing virus.

JUST IN: Kaso ng COVID-19 sa bansa, nadagdagan pa ng 7,204 ngayong Martes, Abril 27.

Pumalo na sa kabuuang 1,013,618 ang bilang ng kumpirmadong kaso ng COVID-19 sa bansa. Mayroon namang 71,675 naitalang active cases. | https://t.co/HHOy7zaafm pic.twitter.com/vi5zP6x5VG

— DWIZ Newscenter (@dwiz882) April 27, 2021

Inaasahang iaanunsyo ng Pangulong Rodrigo Duterte bukas ng gabi sa kanyang ‘Talk to the People’ ang bagong quarantine status sa NCR plus at iba pang bahagi ng bansa.

Sinabi ni Presidential Spokesman Harry Roque na magpupulong pa ang IATF sa irerekomendang bagong quarantine status sa Metro Manila at mga kalapit lalawigan na Bulacan, Rizal, Laguna at Cavite gayundin ang Quirino, Abra at Santiago City sa Isabela.

Binigyang diin ni Roque na ibabase ang bagong quarantine classification sa science at hard data bagamat lumulutang ang mga rekomendasyon mula sa mga health expert at OCTA research group na palawigin pa ng isang linggo ang MECQ partikular sa NCR plus.

Ang NCR plus at ibang lugar sa bansa ay nasa ilalim ng MECQ hanggang sa Biyernes, April 30.

Pinaaaresto ng korte ang pito (7) katao, kabilang si Philippine Charity Sweepstakes Office (PCSO) Board Member Sandra Cam, dahil sa pagpaslang sa vice mayor ng Masbate noong 2019.

Ang arrest warrant laban kay Cam, anak nitong si Marco Martin Cam, Nelson Cambaya, Junel Gomez, Bradford Solis, Juanito De Luna at Rigor Dela Cruz, ay inisyu ni Manila RTC Judge Dinnah Aguila-Topacio kaugnay sa mga kasong murder at frustrated murder na kinakaharap ng mga ito.

Nagtakda naman ng P200,000 na piyansa si Topacio sa kada akusado sa kaso.

Nag-ugat ang kaso sa pag-ambush kay Vice Mayor Charlie Yuson III ng Batuan, Masbate na nakasugat din sa kasamahan nitong si Alberto Alforte IV habang nag-aalmusal ang mga ito sa Sampaloc, Manila noong ika-9 ng Oktubre, 2019.

Target ng Department of Education (DepEd) na buksan sa ika-23 ng Agosto ang bagong school year.

Ayon ito kay DepEd Undersecretary Diosdado San Antonio dahil matatapos sa ika-10 ng Hulyo ang School Year 2020-2021 at halos anim na linggo lamang ang magiging bakasyon ng mga estudyante taliwas sa nakasanayang dalawang buwan.

Kaugnay nito, ipinabatid ni San Antonio na naghahanda na rin ang DepEd para sa aniya’y ideal scenario sa susunod na school year kung saan posibleng ipatupad ang limitadong in-person classes kasabay pa rin ng distance learning modalities.

Kasabay nito, tiniyak ni San Antonio ang higit pang pagiging responsive ng DepEd sakaling magpatuloy ang remote learning sa bagong school year.

Ibinasura ng Makati City Prosecutors Office ang kasong kriminal na isinampa ng Philippine National Police (PNP) laban sa 11 indibidwal kaugnay sa pagkamatay ng flight attendant na si Christine Dacera.

Ayon sa Office of the Prosecutor General, walang nakitang sapat na ebidensya ang mga prosecutor para tuluyan ang kaso ng rape with homicide ang mga respondents.

Kabilang sa mga respondents sina John Pascual Dela Serna III, Rommel Galido, John Paul Halili, Gregorio Angelo Rafael De Guzman, Jezreel Rapinan, Alain Chen, Mark Anthony Rosales, Reymar Englis, Louie Delima, Jamyr Cunanan at Eduard Pangilinan III.

Ayon kay Atty. Mike Santiago, abogado ng lima sa mga respondents, natutuwa sila sa naging desisyon ng korte na patunay lamang na mayroong hustisya sa bansa.

Sinimulan na ng Food and Drug Administration (FDA) ang pagreview sa application ng American pharmaceutical company na Moderna Incorporated para sa emergency use authorization (EUA) para sa kanilang coronavirus disease 2019 (COVID-19) vaccine.

Kasunod na rin ito nang pagsumite ng Moderna ng application para sa EUA kahapon, Lunes.

Una nang inaprubahan ng FDA ang emergency use sa Pilipinas ng mga COVID-19 vaccine ng Pfizer-BioNTech, AstraZeneca, Sinovac Biotech, Gamaleya Institute, Janssen at Bharat Biotech.

Lumagda na rin ang gobyerno at private sector sa pangunguna ni business tycoon Enrique Razon sa isang tripartite agreement sa Moderna para sa 20-million doses ng kanilang COVID-19 vaccine kung saan 13-million ay mapupunta sa gobyerno at 7-million ang gagamitin sa mga manggagawa sa pribadong sektor.