Judith Estrada-Larino

Sinisilip na ng DOJ ang umano’y data breach sa Office of the Solicitor General.

Ayon kay Justice Secretary Menardo Guevarra mahigit 345,000 files ang na naapektuhan sa nasabing data breach batay sa nalaman ng London based security firm na Tugensec noon pang buwan ng Marso.

Sinabi ni Guevarra na maaaring maapektuhan ng pagkaka-expose ng files ang mga judicial proceedings kaya’t dapat maimbestigahan ang ugat ng nasabing data breach sa OSG.

Uubra nang makapagparehistro online simula sa Biyernes, ika-30 ng Abril para sa National Identification System.

Kasunod na rin ito ayon kay NEDA Director General Karl Kendrick Chua nang paglulunsad nila sa katapusan ng buwan sa online system na kokolekta sa demographic data ng mga magpapalista sa national ID.

Subalit nilinaw ni Chua na kailangan pa ring magtungo ng mga aplikante sa registration centers para makunan ng biometrics pati na rin sa pagbubukas ng kanilang bank accounts.

Naniniwala si Chua na mapapakinabangan ang national ID system upang mapabilis ang vaccination program pati na rin ang paghahatid ng tulong pinansyal sa kasagsagan ng lockdown gayundin ay makatulong sa low income families na makapagbukas ng kanilang bank accounts.

Kailangan pang ikunsulta sa mga doktor ang paggamit ng virgin coconut oil (VCO) laban sa COVID-19.

Ayon ito sa Food and Drug Administration (FDA) kasunod ng clinical trials na isinagawa para mabatid ang bisa ng VCO bilang supplement ng coronavirus patients.

Sinabi ni FDA Director General Eric Domingo na ligtas at walang side effect ang VCO bagamat hindi ito dinisenyo bilang gamot kayat kailangan pa ring magpatingin sa doktor dahil idinagdag lang ito sa mga gamot ng mga pasyente.

Nakatakdang isagawa sa Valenzuela City ang VCO clinical trials na ikinakasa na sa mga pasyente ng Philippine General Hospital.

Mamimigay na simula bukas, April 29 ng libreng ivermectin tablets sina Congressmen Rodante Marcoleta at Mike Defensor.

Sa tinaguriang ivermectin pan-three sinabi nina Marcoleta at Defensor na tig-tatlong ivermectin tablet ang ipamimigay nila kada beneficiary bilang gamot kontra COVID-19.

Binigyang diin ng dalawang kongresista na kailangang ma protektahan ang publiko at maka-survive sa kinakaharap public health emergency dulot ng COVID-19 pandemic.

Ipinabatid nina Marcoleta at Defensor na isang grupo ng mga doktor mula sa Concerned Doctors and Citizens PH (CDC-PH) ang tutulong sa kanila sa pamamahagi ng libreng ivermectin tablet sa matandang Balara Hall Park.