Judith Estrada-Larino

Iginiit ng Department of Trade and Industry (DTI) ang pagtanggal sa locational investment restrictions kabilang na ang Business Process Outsourcing (BPO) operations sa Metro Manila.

Ito, ayon kay DTI Secretary Ramon Lopez, ay upang magkaroon ng mas maraming trabaho para sa mga Pilipino na nawalan ng hanap-buhay dahil sa pandemic.

Suportado aniya ng DTI at Board of Investments ang rekomendasyon ng business sector na aralin ang investment priorities plan (IPP) at tanggalin ang geographical qualifications para magkaroon ng subsidies, incentives at programa.

Ipinabatid ni Lopez na naghahanda na ng sulat ang Philippine Economic Zone Authority  (PEZA) para himukin ang Office of the President na alisin ang moratorium sa ilalim ng Executive Order No. 18 hinggil sa pagtatayo ng bagong BPO operations sa Metro Manila, batay na rin sa bagong create law.

Dahil sa pagbabawal ng EO No. 18 na bigyan ng tax incentives ang mga bagong BPO companies sa Metro Manila, hindi na itinuloy ng  ilang kumpanya ang expansion sa bansa dahil sa paniniwalang hindi akma ang maynila para sa kanilang operation expansion.

Boluntaryo ang pagsali sa ikinakasang clinical trial ng bansa sa anti-parasitic drug na Ivermectin.

Nilinaw ito ni Dr. Jaime Montoya, executive director ng Department of Science and Technology-Philippine Council for Health Research and Development (DOST-PCHRD) na nagsabing sa buwang ito o unang linggo ng Hunyo inaasahang masisimulan ang pag-aaral para malaman ang bisa ng Ivermectin kontra coronavirus disease 2019 (COVID-19).

Ipinabatid ni Montoya na isasagawa ang clinical trial sa mga mild to moderate at asymptomatic cases ng ilang quarantine facilities ng Philippine Red Cross.

Posibleng abutin aniya ng anim na buwan ang clinical trial sa Ivermectin subalit nakadepende pa rin ito sa bilis ng magiging recruitment ng sample size.

Suportado ng Population Commission ang community pantry na nagbibigay ng libreng contraceptives.

Ipinabatid ito sa DWIZ ni POPCOM Executive Director Jose Antonio Perez matapos silang magpalabas ng guidelines sa pamamahagi ng mga contraceptive.

Mahalaga aniyang mayroong barnagay health worker na nakabantay sa mga community pantry na nagbibigay ng libreng contraceptive na una nang ginawa sa isang barangay sa Davao, Legaspi City at Taguig.

Dapat may kasamang barangay health worker, maglalabas kami ng guideline para maging ayon sa ating health protocols na dapat kapag pills yung dini-despense dapat alam ng health worker at saka may prescription kapag condom naman yung mga sexually active pwedeng mabigyan ng condom,” ani Perez.

Malaking bagay ang tuloy-tuloy na efforts para makapagpatayo ng dagdag na isolation facilities.

Ayon ito kay Dr. Mike Tee, miyembro ng OCTA research group dahil ang pagtatayo ng mga isolation facility ang solusyon para maiwasan ang mga hawaan sa mga pamilya.

Ipinabatid pa ni Tee na 87% ng mga nagkasakit ay mas mababa ang edad sa 70 subalit 62% ng mga namatay ay mula sa age category na ito dahil nahahawa sila sa mga mas batang nagtatrabaho o lumalabas kayat hindi uubrang makapag-isolate at physical distancing sa mga bahay.

Dulot na rin aniya ito ng multi generational households na bahagi ng kultura ng Pilipinas taliwas sa ibang bansa.

Sa atin kasi tayo-tayo, nag-aalaga tayo ng ating mga magulang, kaya may lolo, lola at bata kung ganyan ang sitwasyon napakaimportante ng ginagawa ng mga local government unit pati na rin ang mga universities at saka yung Red Cross para sa isolation facilities at ito yung nakikita kong sagot para hindi magkaroon ng hawaan sa bahay kasi nga mas bata ang lalabas kaya nga 80% ang may sakit na bata dahil sila ang kailangan magtrabaho saan sila nahahawa, yung mga matatanda mahahawa sila sa mga lumabalabas kasi yung bata lumalabas at yung matatanda hindi lumalabas dahil nga MECQ,” ani Tee.