Judith Estrada-Larino

Hindi nagbago ang inflation o bilis nang pagtaas ng presyo ng mga pangunahing bilihinsa buwan ng Abril.

Ayon kay Philippine Statistics Authority (PSA) chief at national statistician Claire Dennis Mapa, naitala sa 4.5% ang inflation na kapareho ng inflation na nairehistro sa buwan ng Marso, subalit 2.2% na mas mabilis sa naitala noong Abril 2020.

Dahil dito, ang year-to-date inflation ay nasa 4.5% na lampas pa rin sa target ng gobyerno na 2% hanggang 4%.

Mananatiling mahigpit ang seguridad at health protocols na ipatutupad sa graduation ng mga kadete sa Philippine Military Academy (PMA).

Kasunod na rin ito nang pribadong pagdaraos muli ng PMA graduation at sa taong ito ng Masaligan Class of 2021 sa ika-10 ng Mayo.

Ang mga kadete ng PMA ay magtatapos ng wala ang kanilang mga magulang at iba pang mahal sa buhay maliban na lamang kung makapagpapakita ng negative RT-PCR test para makapasok sa Fort Del Pilar.

Ang nasabing graduation ceremony ay mapapanuod na lamang sa social media page ng PMA.

Inaasahang darating na sa susunod na buwan ang halos 1.3 million doses ng AstraZeneca vaccine para sa pribadong sektor bilang bahagi ng tripartite deal.

Ipinabatid ito ni Presidential Adviser for Entrepreneurship Joey Concepcion na nagsabing halos 100 kumpanya ang makikinabang sa unang batch ng nasabing bakuna.

Sinabi ni Concepcion na nakipag-ugnayan na sila kay Labor Secretary Silvestre Bello III para atasan ang mga empleyadong magpabakuna na kaagad pagdating ng AstraZeneca vaccines.

Nobyembre ng taong 2020 nang lumagda ng kasunduan ang private sector sa British-Swedish manufacturer at national government para sa 2.6 million doses ng coronavirus disease 2019 (COVID-19) vaccine na nagkakahalaga ng P600-milyon.

Nanawagan si Ako Bicol Party-list Representative Alfredo Garbin sa Department of Budget and Management (DBM) at Department of the Interior and Local Government (DILG) na mag-draft na ng mga panuntunan at mekanismo kaugnay sa pagkakasa ng panukalang Bayanihan 3 Assistance sa mga komunidad.

Kasunod na rin ito nang pag-apruba ng tatlong komite sa kamara ang panukalang Bayanihan 3 na may pondong P405.6-billion na halaga ng mga interventions para makatulong sa pagrekober ng bansa sa coronavirus disease 2019 (COVID-19) pandemic.

Layon ng panukala na magkaloob ng P1,000 cash sa lahat ng mga Pilipino, ano pa man ang maging estado ng mga ito, samantalang maaari namang i-waive ng mga mayayamang Pinoy ang kanilang ayuda.

Mabibigyan din ng ayuda, sa ilalim ng panukala, ang mga pamilyang apektado ng COVID-19, agriculture at fishery sector, dagdag subsidy para sa Micro, Small and Medium Enterprises, guro at Overseas Filipino Workers (OFWs).

Pasok sa 2021 Asian Scientists 100 ang walong (8) Pilipinong dalubhasa sa iba’t ibang larangan ng siyensya.

Ayon sa Department of Science and Technology (DOST), kabilang sa mga expert na pasok sa listahan sina Dr. Annabelle Briones, Dr Francis Aldrine Uy, Dr. Desiree Hautea, Dr. Sandra Teresa Navarra, Dr. Kathleen Aviso, Dr. Jonel Saludes, Dr. Salvacion Gatchalian at Ginoong Edgardo Vazquez.

Taong 2016 nang ilunsad ng Asian Scientist Magazine ang listahan ng 100 pinakanatatanging scientists sa rehiyon.

Una nang napasama sa nasabing listahan ng mga dalubhasa kahanay ang mga expert mula sa Japan, China, Singapore, Thailand at India, sina Dr. Raul Destura na nasa likod ng locally-developed coronavirus disease 2019 (COVID-19) test kits, Dr. Gay Jane Perez – deputy director general ng Philippine Space Agency at Dr. Philip Alviola na naglunsad ng mga pag-aaral sa mga paniki at coronavirus.

Nakabinbin pa sa Food and Drug Administration (FDA) ang kaso ng mga miyembro ng Presidential Security Group (PSG) na binakunahan ng hindi rehistradong bakuna kontra coronavirus disease 2019 (COVID-19).

Ito, ayon kay FDA Director General Eric Domingo, ay dahil wala silang makuhang impormasyon hinggil dito at kahit maging ang Department of Health (DOH) ay sa kanila pa humihingi ng detalye.

Naungkat ang pagpapabakuna ng Presidential Security Group (PSG) members matapos mabakunahan ng Sinopharm ang Pangulong Rodrigo Duterte kagabi.

Pebrero ng taong ito nang gawaran ng FDA ng compassionate use permit ang 10,000 doses ng Sinopharm vaccine para maiturok sa mga miyembro ng PSG.

Iginiit ng Philippine Medical Association (PMA) ang pagkontra sa paggamit ng Ivermectin kontra coronavirus disease 2019 (COVID-19).

Sa halip, binigyang diin sa DWIZ ni PMA President Dr. Benito Atienza na mas mabuting hintayin muna ang resulta ng clinical trial sa nasabing anti-parasitic drug bago magpasyang gamitin ito laban sa COVID-19.

Hintayin nalang po sana natin ang magiging resulta noon, habang ngayon, ang panawagan namin ay huwag munang gagamit ang mga kababayan natin ng Ivermectin kasi wala pong sapat na pag-aaral tungkol diyan at katulad ng sabi ng WHO at iba pang medical society, ang sinusunod namin ay ang patakaran ng FDA na hindi sya gagamitin, except ‘yung compassionate use under ng pinayagan na limang ospital,” ani Atienza. —sa panayam ng Balitang Todong Lakas

Patuloy ang pagdami ng kaso sa bansa ng South African variant ng coronavirus.

Ayon ito kay Health Secretary Francisco Duque III kung saan na nasa 1,075 na ang kaso ng B.1.351 variant sa bansa.

Sinabi ni Duque na sumunod na pinakamaraming naitalang variant ng coronavirus sa bansa ang Hong Kong lineage o B.1.1.62 sa nasa 1,054 na kaso o halos 18% ng kabuuang samples tested at ikatlo naman ang UK variant o B.1.1.7 na may 948 cases o mahigit 16% ng kabuuang samples na na test.

Dahil dito, patuloy ang mahigpit na paalala ng DOH sa publiko na mahigpit na sundin ang health protocols.