Judith Estrada-Larino

Inihihirit ng IATF ang pagsasagawa ng nursing board examination sa susunod na buwan.

Ito ayon kay health undersecretary Maria Rosario Vergeire ay para pagsapit ng hulyo ay mayruon nang dagdag na medical frontliners na tutugon sa pandemya.

Ipinabatid ni vergeire na kinausap na nila ang Philippine Nurses Association at Professional Regulation Commission (PRC) para agahan ang pagsasagawa ng nursing board exam.

Tatlumpu (30%) hanggang 40% na bumaba ang naa-admit na coronavirus disease 2019 (COVID-19) patients sa San Lazaro Hospital sa nakalipas na isang linggo na.

Ayon ito kay Dr. Rontgene Solante, head ng infectious disease department ng San Lazaro Hospital, ay patunay na gumaganda ang coronavirus disease 2019 (COVID-19) response ng gobyerno.

Kritikal aniya ang sitwasyon sa nakalipas na dalawang linggo kung kailan maraming pasyente ang dinadala pa sa mga ospital sa mga lalawigan para magamot dahil punuan na sa mga ospital sa Metro Manila.

For the past weeks malaki ang pagbaba ng mga kaso especially dito sa hospital natin, sa government hospital, sa San Lazaro Hospital. Nabawasan siguro ng gma 30-40% ang mga naadmit, ang mga severe to critical,” ani Solante. —sa panayam ni Balitang Todong Lakas

Pinaalis ng Philippine Coast Guard ang pitong barko ng China sa gitna nang isinasagawang joint maritime exercise nito at Bureau of Fisheries and Aquatic Resources (BFAR) sa Sabina Shoal.

Ayon kay PCG Spokesperson Commodore Armando Balilo, ang barkong BRP Cabra at dalawa pang barko ng BFAR ay nasa lugar nang mamataan ang naunang hindi pa natukoy na pitong dayuhang barko noong ika-27 ng Abril.

Naka-angkla sa Sabina Shoal na nasa halos 127 kilometers mula sa Mapankal Point ng Rizal, Palawan, ang kalaunay nadiskubreng Chinese maritime militia vessel.

Sinabi ni Balilo na kaagad nilang niradyuhan ang mga barko para igiit na ang mga ito ay nasa Philippine Exclusive Economic Zone.

Hindi aniya sinagot ng mga naturang foreign vessels ang tatlong beses na tawag nila sa radyo kaya’t nilapitan na ng tatlong barko ng Pilipinas ang mga ito at saka pa lamang inangat ang angkla at pinaandar ang makina ng mga ito.

Magugunitang noong Marso ay ipinarada ng China ang 200 barko nito sa Julian Felipe o Whitsun Reed. —ulat mula kay Jaymark Dagala (Patrol 9)

Makikiusap si House Speaker Lord Allan Velasco sa Department of Health (DOH) at Professional Regulation Commission (PRC) na payagan ang mga hindi pa rehistradong nurses para magsilbing complementary manpower sa gitna na rin ng kakulangan ng health workers sa bansa.

Ito, ayon kay Velasco, ay habang hinihintay pa ang naurong na board examination sa ika-21 at ika-22 ng Nobyembre na una nang itinakda ng ika-30 at ika-31 ng Mayo.

Sinabi ni Velasco na ang mga nasabing nursing graduates ay maaaring magpasailalim sa isang nurse o doktor sa pamamagitan ng isang special arrangement sa PRC.

Batay sa datos ng DOH, hanggang nitong ika-25 ng Abril ay nasa mahigit 17,000 health workers ang tinamaan ng coronavirus disease 2019 (COVID-19) kung saan halos 200 ay active cases at 88 naman ang nasawi.

Nakumpleto na ni Vice President Leni Robredo ang Step 2 ng registration para sa Philippine Identification System (PhilSys).

Ito, ayon sa Philippine Statistics Authority (PSA), ay ginawa ni Robredo sa Magarao, Camarines Sur, isa sa mga napiling munisipalidad sa 32 priority provinces para sa PhilSys registration.

Bahagi ng Step 2 registration ang biometric data ng nagpaparehistro tulad ng fingerprints, iris scans at front facing photograph.

Ipinabatid ng PSA na natapos ni Robredo ang proseso sa loob lamang ng 12 minuto ng walang anumang naging problema sa teknikal matapos pumila kasama ang iba pang magpaparehistro.

Ayon sa PSA, nagsimula noong Enero ang Step 2 registration at tuluy-tuloy ang pag-roll out nito nang unti-unti sa mga priority provinces at hanggang nitong nakalipas na ika-30 ng Abril ay nasa mahigit 6-milyong registrants na ang nakakumpleto sa Step 2 registration.

Irerekomenda ng Department of Health (DOH) na maisalang sa coronavirus disease 2019 (COVID-19) test ang mga pasaherong papasok sa Pilipinas, pito o walong araw pagkadating sa bansa para mapalakas ang border control.

Batay sa kasalukuyang panuntunan, ang mga pasahero ay isasalang sa COVID-19 test sa ikalimang araw pagdating ng mga ito sa bansa, maliban na lamang kung magpakita ng mga sintomas ng virus ng mas maaga.

Sinabi ni Health Undersecretary Maria Rosario Vergeire na ipinapakita ng bagong ebidensya na mataas pa rin ang virus hanggang sa ikapito o ikawalong araw.

Dahil dito, ipinabatid ni Vergeire na irerebisa muli nila ang protocol at ilalatag ito sa Inter-Agency Task Force (IATF) para ma-adopt ang pagpapatupad ng bagong panuntunang ito.

Nais aniya nilang matiyak na matutukoy ang lahat ng mga darating na pasahero para makapagsagawa ng maayos na isolation at maputol na ang hawahan, bagamat for approval pa ito ng IATF.

Itinigil pansamantala ng Hong Kong government ang pagpapatupad nitong mandatory coronavirus disease 2019 (COVID-19) vaccines para sa foreign domestic workers.

Ito, ayon kay Hong Kong Leader Carrie Lam ay kasunod ng reklamo ng iba’t ibang grupo dahil sa pag-single out sa kanila.

Una nang isinulong ng Hong Kong government ang mandatory vaccines sa 370,000 foreign domestic workers na inalmahan din ng mga ito partikular mula sa Pilipinas, Indonesia, Nepal at Sri Lanka.

Umapela ang Foreign Affairs Ministry ng China sa mga opisyal ng gobyerno ng Pilipinas na magsalita at kumilos nang naaayon sa estado sa buhay.

Kasunod na rin ito ng pahayag ni Foreign Ministry Spokesman Wang Wenbin na walang maidudulot na maganda ang anito’y megaphone diplomacy.

Dapat anitong tumigil na ang Pilipinas sa paggawa ng hakbang na maaaring magdulot ng kumplikasyon ng sitwasyon dahil pag-aari ng China ang Scarbourough Shoal.

Una ang nagmura si Foreign Affairs Secretary Teodoro Locsin, Jr. sa Twitter sa gitna na rin nang pagpapaalis sa mga barko ng China sa mga karagatang sakop ng Pilipinas.