Judith Estrada-Larino

Umalma si Senador Risa Hontiveros sa pahayag ng pangulo na isang pirasong papel lamang na pwedeng itapon sa basura ang pagka panalo ng Pilipinas sa China sa Permanent Court of Arbitration sa The Hague.

Binigyang diin ni Hontiveros, na hindi basura ang arbitral award ng Pilipinas dahil katumbas nito ang likas yaman na nasa wps na dapat ingatan at dapat batid ng pangulo na ang nasabing panalo ay nagpaigting pa ng posisyon ng pilipinas sa wps.

Binalikan din ni Hontiveros ang pangulo dahil mas nauna pa ang mga ibang bansa na maipagtanggol ang Pilipinas sa naturang usapin kaysa sariling pangulo.

Ang pagkapanalo aniya ng Pilipinas sa nasabing usapin ay sinuportahan ng United Kingdom,France at Germany gayundin ang Indonesia at Australia na pawang kumukundena sa pag-angkin ng China sa buong South China Sea.

Pinangangambahang magresulta sa pang-aabuso ang kautusan ng Pangulong Rodrigo Duterte na damputin ang walang suot na face mask.

Ayon ito kay Atty. Jacqueline De Guia, spokesperson ng Commission on Human Rights na nagsabing dapat na maging makatuwiran at makatao ang pag disiplina sa mga lumalabag sa health protocols.

Binigyang diin ni De Guia na hindi malayong magdulot ng panghuhusga at  abuso ang naturang kautusan ng pangulo lalo pa’t walang malinaw na panuntunan hinggil dito.

Bukod pa ito aniya sa mas posibleng kumalat ang virus sa loob ng mga siksikang  bilangguan at iba pang detention facilities sa bansa kapag nadagdagan pa ang mga ikukulong dahil sa paglabag sa health protocols.

Nababahala rin si ACT Teachers Party List Representative France Castro sa nasabing direktiba ng pangulo na ang nais mangyari ay napakalaking parusa sa mga tao.

Sa halip na arestuhin sinabi ni Castro na ang dapat gawin ng gobyerno ay mamigay na lamang ng face masks.

Tinawag namang military measure ni Gabriela Partylist Representative Arlene Brosas ang naturang utos ng pangulo na marami aniyang daldal gayung hindi natutugunan ang tunay na pangangailangan ng mamamayan.

Bumaba sa 3, 044 mula sa dating 5,561 ang seven day average ng COVID-19 cases sa National Capital Region (NCR).

Ayon ito kay Dr. Michael Tee, fellow ng OCTA Research Group matapos aniyang bumaba pa sa .77 mula sa .88 ang reproduction number ng COVID-19 cases sa Metro Manila.

Kasunod na rin ito aniya nang pagbaba ng bilang ng mga kamang okupado ng COVID-19 patients sa mga ospital sa kalakhang Maynila o mula sa 30 ay naging 15 na lamang.

Ipinabatid pa ni Tee na 55% na lamang okupado ngayon ang 60 NCR hospitals kumpara sa 70% bed occupancy nuong nakalipas na linggo.

Sinabi ni Tee na tiwala silang patuloy na bababa ang kaso ng COVID-19 para mapag aralan ang pag-adjust sa community quarantine status sa NCR.

Kailangang maisailalim sa mahigpit na isolation ang anim na Pinoy na nanggaling sa India na nagpositibo sa coronavirus disease 2019 (COVID-19).

Ayon ito kay Dr. Ted Herbosa, medical adviser sa National Task Force on COVID-19, sa gitna na rin nang lumalalang kaso ng COVID-19 sa India.

Dapat aniyang matiyak na wala ring mahahawan ang mga naturang Pinoy na nagpositibo sa COVID-19.(herbosa)

Ipinabatid pa ni Herbosa na maging ang mga doktor sa India ay nagulat sa bilis nang pagkalat ng COVID-19 sa kanilang bansa.

 Imported ‘yung virus, pero ang importante, wala silang ma-infect na iba… So, dapat talaga, ma-isolate sila ng 14 days or more hanggang talagang negative talaga sila,” ani Herbosa. —sa panayam ng IZ sa Alas Sais

Winelcome ng Integrated Bar of the Philippines (IBP) ang pagtalaga ng Pangulong Rodrigo Duterte kay Police Lt. General Guillermo Eleazar bilang susunod na Philippine National Police (PNP) Chief.

Ayon kay IBP national president Egon Cayosa, si Eleazar ay pro-active police officer at pangunahing kakampi at supporter ng lawyer security and justice program ng IBP.

Sinabi ni Cayosa na inaasahan nila ang mas epektibong pagpapatupad ng batas at pinaigting pang kampanya kontra kriminalidad ng PNP sa pamumuno ni Eleazar.

Sa kanilang pakikipag-usap kay Eleazar, binigyang diin ni Cayosa na isa itong ‘very professional, decisive, receptive to innovations and new ideas’ at isang maituturing na ‘officer and a gentleman’.

Naniniwala aniya silang sa liderato ni Eleazar sa susunod na anim na buwan ay masisilayan nila ang mga positibong development para higit na makatuwang ng IBP ang PNP sa JUSTICE BILIS.

Nagbigay na ng ‘go signal’ ng Department of Public Works and Highways  (DPWH) para magamit ng telecommunication companies ang mga bahagi ng right of way ng gobyerno para mapaganda ang internet service sa bansa.

Ayon pa sa direktiba ng DPWH, pinadali na rin ang pag-apruba ng permit requirements mula sa mga telco kabilang na ang pagbaba pa ng bayarin.

Sinabi ni NTC Commissioner Gamaliel Cordoba na malaking bagay ang nasabing desisyon ng DPWH para maibigay sa mga Pilipino ang kinakailangang connectivity lalo na ngayong may pandemya.

Welcome development din ang nasabing kautusan ng DPWH sa PLDT, Globe, Converge at Dito dahil makatutulong ito para mapabilis ang pagpapatupad ng kanilang infrastructure projects lalo na sa mga national road.

Operational na ang off-site modular hemodialysis facility para sa coronavirus disease 2019 (COVID-19) patients ng National Kidney and Transplant Institute (NKTI).

Nabatid na ang nasabing pasilidad ay mayroong 20 dialysis stations na kayang makapag-operate ng tig-tatlong session kada araw at tatanggap ng 60 pasyente bawat araw.

Ang naturang pasilidad ay mayroon ding 16 na air-conditioned dormitory rooms na maaaring tuluyan ng 32 health workers ng NKTI.

Una nang inihayag ng National Task Force Against COVID-19 na magtatayo ng dagdag na modular facilities para i-accommodate ang COVID-19 patients na hindi na ma-admit sa mga ospital dahil sa over capacity.

Tinatayang 300 residente ng Barangay Payatas sa Quezon City ang nabakunahan laban sa coronavirus disease 2019 (COVID-19) gamit ang Sinovac vaccine sa pamamagitan ng mobile vaccination clinics o ‘bakuna bus’.

Kabilang sa mga naserbisyuhan ng ‘bakuna bus’ ang mga residenteng nasa ilalim ng A1 hanggang A3 categories na nagparehistro sa kanilang barangay dahil sa kakulangan ng access sa online registration.

Nagpapasalamat naman ang mga nabakunahang residente dahil lumapit na sa kanila lalo’t hindi sila makapunta sa mga vaccination sites.

Ayon kay Dr. Diana Lacson, Payatas vaccine site supervisor, bahala na ang mobile vaccination clinics na magbakuna sa mga residenteng hirap na magtungo sa vaccination centers.

Nagbabala ang National Meat Inspection Service (NMIS) sa pagkain ng baboy na namatay sa aksidente dahil hindi dumaan sa pagkatay ng anumang slaughterhouse.

Kasunod na rin ito nang pagkasawi ng 44 na baboy nang tumagilid ang 14-wheeler truck kung saan lulan ang mga ito sa Navotas City at sinasabing iniuwi ng mga residente ang mga namatay na baboy.

Ayon kay Dr. Jude Padasas, enforcement head ng NMIS National Capital Region dapat na dumaan muna sa inspeksyon ang mga nasabing baboy bago kainin.

Uubra naman aniyang dalhin sa emergency slaughterhouse ang mga naghihingalong baboy para mapakinabangan pa at matiyak na ligtas kainin ang mga ito.

Nasa 160 buhay na baboy ang lulan ng truck at sinasabing nagkakahalaga ng P25,000 ang bawat isa at nagmula sa General Santos City at nakatakdang dalhin sana sa isang katayan sa Cavite.