“Goodluck sa kanila.”
Ito ang naging sagot ni House Prosecutor at Bicol Saro Party-list Rep. Terry Ridon, nang matanong kaugnay sa petisyong inihain ng grupo ni Atty. Israelito Torreon sa Korte Suprema para ihirit na pansamantalang ipahinto ang impeachment trial laban kay Vice President Sara Duterte.
Ito’y dahil sa pagkakahalal kay Sen. Francis Escudero bilang Senate Impeachment Court Presiding Officer.
Ayon kay Ridon, pagsasayang lang ng papel ang ginagawa ng mga petitioner.
Banat pa ni Ridon, hindi pa ba naaawa sa mga puno ang grupo ni Torreon?
Sa kabila nito, tiniyak naman ni Ridon na walang magiging epekto ang naturang petisyon sa House prosecution team, at inaasahang magpapatuloy ang paglilitis sa bise presidente.
Samantala, para naman kay House Deputy Speaker Paolo Ortega V, hindi na nakakagulat ang hakbang nina Atty. Torreon na mistulang “bread and butter” at “specialty” na ang paghahain ng petisyon.
Nilinaw ng House leader na walang pumipigil kina Torreon na maghain ng petisyon, pero ang isyu ng presiding officer ng impeachment court ay naresolba na sa unang araw pa lang ng paglilitis. | via Geli Mendez/DWIZ Patrol
