Inihayag ng Technical Education and Skills Development Authority (TESDA) na magtatayo ito ng 17 pang innovation centers sa buong bansa.
Ayon kay Deputy Director General Aniceto Bertiz III, nais ni TESDA Director General Danilo Cruz na matuloy ang proyekto sa pamamamagitan ng loan mula sa Asian Development Bank.
Sa kasalukuyan, mayroon nang tatlong innovation centers sa Cebu, Northern Samar at Zamboanga Sibugay.
Isinusulong sa senado ang isang panukalang batas na layong taasan ang allowance ng mga empleyado ng gobyerno.
Ayon kay Sen. Mark Villar, itinutulak niya ang Senate Bill 1378 bunsod ng tumataas na presyo ng mga pangunahing bilihin.
Una nang naghain ng hiwalay na panukala si Sen. Francis Escudero na layon ding doblehin ang financial assistance para sa 1.8 million government employees.
Makakapagtanim na ng marami ang mga magsasaka.
Ayon kay Sen. Imee Marcos, ito’y dahil sa pagbabalik ng Kadiwa stores na magpapalawak ng kanilang ‘market’.
Sa isang forum, sinabi ni Marcos na ang Kadiwa scheme na sinimulan ng kanilang amang si dating Pangulong Ferdinand Marcos Sr. ay makatutulong upang madala sa mga consumers ang mga produkto mula naman sa Food Terminal, Inc. o FTI sa Taguig City.
Sinabi pa ng senador na patuloy na gagawa ng paraan ang gobyerno upang maramdaman ng mga mamimili ang pagluwag ng presyo ng mga produkto.
Patuloy na susuportahan ng German government ang peace-building efforts ng gobyerno sa Mindanao.
Ayon sa German Embassy, ito’y sa pamamagitan ng livelihood initiatives at iba’t ibang mga proyekto para sa mga kabataan at kababaihan.
Aabot sa dalawang bilyong pisong halaga ng development programs ang inihahanda ng Germany katuwang ang Philippine government at 70 organisasyon para sa Lupang Pangako.
Ipinagmalaki ng Climate Change Commission (CCC) na nagbunga na ang panggigiit ng Philippine government sa United Nations (UN) para sa climate finance ng mga developing countries.
Ayon kay CCC Vice Chair at Executive Director Robert Borje, naging agenda sa 27th Session of Conference of the Parties (COP27) ang patungkol sa usapin, partikular na ang 100-billion-dollar financial commitment para sa mga bansang tulad ng Pilipinas na lubhang apektado ng climate change.
Sinabi ni Borje na manggagaling ang pondo sa kontribusyon mula sa mga mayayamang estado bilang finance obligation at suporta sa mga at-risk developing nations.
Aniya, ang hakbang ay nasa ilalim ng Paris Agreement at bahagi ng target na makakuha ng mas mataas na climate finance sa pamamagitan ng New Collective Quantified Goal ng Glasgow Climate Pact.
Matatandaang iginiit ni dating Pangulong Rodrigo Duterte na dapat magbayad ang mayayamang bansa ng danyos dahil sa ambag nito sa lumalalang climate change.
Sinegundahan naman ito ni Pangulong Ferdinand Marcos Jr. matapos igiit sa nakaraang United Nations General Assembly (UNGA) na dapat tuparin ng mga industrialized countries ang kanilang obligasyon na may kinalaman sa climate financing.
Nilinaw ni Pangulong Bongbong Marcos na nasa proseso pa ng transition at rightsizing program ang pamahalaan.
Ito ang naging sagot ng Presidente sa tanong kung bakit wala pa rin itong iniluluklok na ‘fulltime secretary’ ng Office of the Press Secretary (OPS).
Sa kasalukuyan, ang OPS ay pinamamahalaan ni Usec. Cheloy Garafil bilang OIC.
Ayon kay Marcos, bahagi ito ng rightsizing program at sa tamang oras ay may itatalaga sa mga nasabing posisyon.
Bukod sa OPS, bakante pa rin ang Dept. of Health (DOH) kung saan tumatayo naman bilang OIC si Usec. Maria Rosario Vergeire.
Muling hinikayat ng Philippine Council for Agriculture and Fisheries (PCAF) ang mga Civil Society Organizations (CSOs) na magparehistro at magpa-accredit para maging katuwang sa implementasyon ng mga programa, proyekto at aktibidad ng Department of Agriculture (DA).
Pahayag ni PCAF Executive Director Nestor Domenden, mahalaga ang partisipasyon ng iba’t ibang organisasyon upang epektibong maipatupad ang mga agriculture programs ng ahensya.
Ayon kay Domenden, bahagi ito ng pagtataguyod ng transparency at accountability at pagpapaigting ng mabuting pamamahala o good governance sa sektor ng agrikultura.
Kasabay nito, sinabi pa ng opisyal na ang mga accredited CSOs ay popondohan ng DA sa pagpapatupad ng mga programa ng gobyerno.
Kinumpirma ng National Capital Region Police Office (NCRPO) na itinaas na sa P6.5 milyon ang alok nitong reward money para sa sinumang makapagbibigay ng impormasyon ukol sa ‘person of interest’ sa kasong pagpatay sa brodkaster na si Percy Lapid.
Naglabas din ng iba pang mga larawan ang NCRPO ng isa mga hinihinalang suspek sa krimen.
Matatandang inihatid na sa kanyang huling hantungan kahapon si Lapid, Percival Mabasa sa tunay na buhay, kahit hindi pa nareresolba ang kaso.
Si Lapid ay nasawi matapos tambangan sa Las Piñas City noong Lunes ng gabi.
Handa si Pangulong Bongbong Marcos na ipag-utos ang pagpapalipat kay dating Sen. Leila de Lima sa ibang detention facility.
Ginawa ng Pangulo ang pahayag matapos manganib ang buhay ng dating senador nang subukan itong i-hostage ng tatlong detainees sa PNP Custodial Center pasado alas-6:00 kaninang umaga, Oktubre 9.
Ayon sa Pangulo, kakausapin niya si De Lima at aalamin ang kondisyon kasunod ng hostage-taking incident.
“Following this morning’s incident at Camp Crame, I will be speaking to Senator De Lima to check on her condition and to ask if she wishes to be transferred to another detention center,” pahayag ng Pangulong Marcos.
Inatasan ni Pangulong Ferdinand “Bongbong” Marcos Jr. si PNP Chief Gen. Rodolfo Azurin, Jr. na tiyakin na hindi mauulit ang nangyaring hostage-taking at kaparehong insidente ng karahasan sa Camp Crame at sa iba pang detention facilities sa bansa.
Ang pahayag ay ginawa ni Office of the Press Secretary (OPS) Officer-in-Charge Undersecretary-OIC Cheloy Velicaria-Garafil matapos subukang i-hostage si dating Sen. Leila de Lima ng tatlong detainees na sina detainees Arnel Cabintoy, Idang Susukan at Feliciano Sulayao.
“[President Marcos] has directed Camp Crame to enforce all measures necessary to ensure that no act of violence in said facility and all other PNP detention centers shall happen again,” wika ni Garafil.
Ayon kay Garafil, sinubukang tumakas nina Cabintoy, Susukan at Sulayao habang namamahagi ng mga rasyon ang mga pulis sa piitan.
Unang hinostage at pinagsasaksak si Pcpl. Roger Agustin ngunit napatay ng isang “Pcpl. Matias” sina Cabintoy at Susukan.
Kasunod nito, tumakbo si Sulayao sa selda ni de Lima at sinubukan itong i-hostage hanggang sa mapatay din ito ng PNP special forces.
Nasa maayos nang kalagayan si De Lima habang nasa kritikal na kondisyon naman si Agustin.