Sinimulan na ng Bureau of Customs (BOC) ang distribusyon ng mga hindi nabayaran at abandonadong balikbayan boxes ng mga overseas Filipino workers.
Ito’y makaraang mabigo ang local de-consolidators na mai-deliver sa mga recipients.
Ayon kay Customs Commissioner Yogi Filemon Ruiz, isinasagawa ang mabilisang pamamahagi ng abandoned boxes sa tulong na rin ng Manila International Container Port (MICP) at ilang grupo.
Handa na ang mga airport authorities sa inaasahang dagsa ng mga pasaherong magsisiuwian sa kanilang mga probinsya sa Undas.
Kasabay nito, nanawagan naman sa mga biyahero si Civil Aeronautics Board deputy executive director Maria Elben Moro na sumunod sa mga safety precautions at agahan ang pagbili ng tickets.
Matatandaang iniulat ng Manila International Airport Authority (MIAA) na pumalo sa tatlong milyon ang mga pasahero noong buwan ng Agosto o 77 porsiyento ng pre-pandemic level.
Naniniwala naman si Moro na kaya kumpiyansang bumiyahe ngayon ang mga tao ay dahil sa mas pinalakas na vaccination program ng pamahalaan.
Pinadalhan na ng show cause order ng Land Transportation Office (LTO) ang may-ari ng pulang Ferrari na dumaan sa EDSA bus lane.
Ayon kay LTO chief Assistant Secretary Teofilo Guadiz III, hindi kailaman kinukunsinte o kukunsitihin ng ahensya ang mga traffic rule violators, anuman ang kanilang katayuan sa buhay.
Ang EDSA bus lane ay eksklusibong inilalaan para sa mga Public Utility Buses (PUBs), ambulansiya, at marked government vehicles sa panahon ng emergency.
Isiniwalat ni Guadiz na dayuhan ang sports car owner at driver nang mangyari ang insidente.
Nabatid na obligadong lumutang ang may-ari ng luxury car sa tanggapan ng Intelligence and Investigation Division (IID) ng LTO Central Office sa Quezon City bandang alas-10:00 ng umaga sa Lunes, Oktubre 24.
Inanunsiyo ng Department of Foreign Affairs – Office of Consular Affairs na tinatanggap na nito bilang government-issued valid ID ang digitized version ng National ID simula kahapon, Oktubre 21.
Ayon sa DFA, dapat malinaw ang mga detalye sa naka-print na ePhilID o PhilSys ID, readable at naglalaman ng mga impormasyon sa isinumiteng documentary requirements sa passport application.
Inabisuhan din ang publiko na bisitahin ang philsys.gov.ph at dfa-oca.ph para sa karagdagan detalye ukol sa passport requirements.
Ilang linggo matapos mag-resign si dating Commission on Audit Chairman Jose Calida, itinalaga ni Pangulong Ferdinand Marcos Jr. si National Telecommunications Commission Commissioner Gamaliel Cordoba bilang ad interim chairman ng COA.
Sa isang pahinang appointment letter, ipinagkakatiwala ng Presidente kay Cordoba ang pamunuan ng state audit institution.
Nanumpa na rin si Cordoba sa harap ni Chief Justice Alexander Gesmundo bilang COA chief.
Kinumpirma rin sa DWIZ Patrol ni Supreme Court spokesperson Brian Hosaka ang panunumpa ni Cordoba.
Matatandaang naging kontrobersiyal si Cordoba matapos ipatupad ang ‘cease and desist order’ laban sa ABS-CBN na nagdulot ng tigil-operasyon ng radyo at telebisyon ng kompanya dahil sa pagkapaso ng prangkisa nito noong Mayo 2020.
Si Cordoba ay dati ring direktor ng Philippine Amusement and Gaming Corporation (PAGCOR) bago iniluklok ni dating Pangulong Gloria Macapagal-Arroyo bilang NTC commissioner noong 2009.
Pinagkalooban ng puwesto ni Pangulong Ferdinand “Bongbong” Marcos Jr. si movie director Paul Soriano.
Ayon kay Office of the Press Secretary (OPS) Officer-in-Charge Usec. Cheloy Garafil, maglilingkod si Soriano sa Office of the President (OP) bilang Presidential Adviser on Creative Communications.
Si Soriano ay mister ng aktres na si Toni Gonzaga.
Nakatakda namang manumpa si Soriano sa harap ng Presidente ngayong araw.
Nakilala si Soriano dahil sa mga idinirehe nitong pelikula tulad ng A Journey Home (2009), Thelma (2011), Kid Kulafu (2015), at Dukot (2016).
Nasungkit naman niya ang Best Director at Best Screenplay sa 2012 FAP Awards para sa pelikulang “Thelma.”
Noong taon ding iyon, naisukbit naman ng “Thelma” ang Digital Movie of the Year, gayundin ang Digital Movie Director of the Year at Digital Movie Original Screenplay of the Year kasama si Froilan Medina, sa 28th PMPC Star Awards for Movies.
Nasakote ng awtoridad ang tatlong lalaki na wanted sa kasong rape sa magkakahiwalay na operasyon sa rehiyon ng Mimaropa.
Kinilala ni Police Regional Office 4B chief Brig. Gen. Sidney Hernia ang mga nadakip na sina Epelimenico Flores Diaz, Rodel Dion Alcain at Allan Mangao Gacute.
Si Diaz ay matagal nang tinutugis ng batas dahil sa tatlong counts ng kasong rape sa Brooke’s Point Palawan Regional Trial Court Branch 165.
Apat na counts naman ng kasong rape din ang kinakaharap ni Alcain sa Marikina City RTC Branch 192.
Samantala, kasong panghahalay din ang nakahain laban kay Gacute sa Culasi, Antique RTC Branch 13.
Batay sa datos ng Regional Investigation and Management Division ng Mimaropa Police, aabot na sa 431 wanted persons ang nahuli nito mula noong Enero ngayong taon.
Nahalal bilang deputy chair ng Asia Pacific Road Safety Observatory o APRSO ang isang opisyal ng Department of Transportation.
Ayon sa DOTr, si Undersecretary for Road Transport and Infrastructure Mark Steven Pastor ay pinili ng 23-member countries ng APRSO sa taunang pagpupulong na ginanap sa Asian Development Bank Headquarters.
Makatutulong umano ang bagong papel ni Pastor upang epektibong maipatutupad ng DOTr ang iba’t ibang road safety initiatives.
Muling tiniyak ng Department of Agriculture (DA) sa mga market retailers na makakakuha pa rin sila ng mas murang red onions.
Ayon kay DA Assistant Secretary Kristine Evangelista, tutulungan nila ang mga negosyante uypang masunod ang P170 kada kilo na suggested retail price na itinatakda ng gobyerno.
Sinabi ni Evangelista na sila mismo ang naghahanap ng mga supplier para sa mga nagtitinda sa mga palengke.