Sinabi ni House Lead Prosecutor Gerville Luistro na nananatiling nakaselyo at hindi pa namamarkahan ang kontrobersyal na kahon mula sa Bureau of Internal Revenue (BIR) na naglalaman umano ng tax records ni Vice President Sara Duterte at ng kanyang asawa na si Mans Carpio.
Ayon kay Luistro, tumutol ang kampo ng depensa sa pagbubukas ng kahon at maging sa pagmamarka ng selyo nito sa isinagawang pre-trial conference.
Aniya, nakapagtataka kung bakit tinututulan pa ang pagmamarka sa kahon gayong ito ay nananatiling nakaselyo.
Samantala, sinabi naman ni defense spokesperson at abogado na si Michael Poa na sasagutin ng kanilang kampo sa Biyernes, Hunyo 26, ang manifestation ng prosekusyon kaugnay sa naturang BIR box.
