Inirekomenda ng NBI o National Bureau of Investigation ang pagsasampa ng kasong murder at administratibo laban sa dalawang pulis na nakapatay sa isang sundalo sa Aurora Zamboanga del Sur noong nakaraang buwan.
Batay sa resulta ng imbestigasyon ng NBI, wala silang nakitang patunay na nanlaban ang biktimang si Corporal Rodilo Bartolome sa mga pulis na sina PO2 Ronald D. Zeros and PO1 Michael C. Bulanday.
Bukod dito, nakita rin sa isinagawang awtopsiya ng NBI na nagtamo si Bartolome ng siyam na tama ng bala sa katawan mula sa ginamit na M-16 armalite ng mga suspek na pulis.
Matatandaang napatay nina Zeros at Bulanday si Bartolome matapos na mapagkamalan itong gunman nang makatanggap ng tawag mula sa ilang residente ng Barangay Monte Alegre.
Huli na nang kanilang malaman na si Bartolome ay isang sundalo na magbabakasyon lamang mula sa tatlong buwang pagkakatalaga sa Marawi City.
—-