Gilbert Perdez

Nagpahayag ng suporta ang Department of Social Welfare and Development sa bagong lunsad na National Juvenile Justice and Welfare Management Information System (JJWMIS) ng Juvenile Justice and Welfare Council (JJWC).

Ang JJMIS ay isang centralized information management system na kumokolekta at nagpoproseso ng mga impormasyon ukol sa mga children at risk o CAR at children in conflict with the law (CICL) na mahalaga upang matukoy ang mga angkop na programa at interventions para sa mga minor offenders at kanilang mga pamilya.

Nabatid na ang information system ay binuo alinsunod na rin sa Republic Act 9344 o ang Juvenile Justice and Welfare Act (JJWA).

Hinimok naman ni DSWD Undersecretary Carles Frederick Co ang mga lokal na pamahalaan na gamitin ang nasabing sistema.

Ayon kay Co, sa pamamagitan ng JJMIS ay napapangalagaan at napoprotektahan ang mga personal at sensitibong impormasyon na may kinalaman sa mga menor-de-edad.

Nakipagpulong si Pangulong Ferdinand Marcos Jr. sa mga opisyal ng Chen Yi Agventures.

Nabatid na sa meeting ay tinalakay ang mga maaaring hakbang na magpapaigting sa pagsiguro ng sapat na pagkain sa bansa.

Kabilang sa mga founder ng kompanya si French Patrick François Renucci at misis nitong Filipino-Chinese na si Rachel Renucci.

Ayon sa Office of the Press Secretary (OPS), ang Agventures ay isa sa mga nangungunang rice processing center sa South East Asia.

Nabatid na layunin ng organisasyon na tulungan ang mga magsasakang Pinoy na makaahon mula sa kahirapan at magkaroon ng sustainable agricultural production.

Nagdeklara na ng state of calamity si Pangulong Ferdinand Marcos Jr. sa ilang rehiyon sa bansa na lubhang naapektuhan ng Bagyong Paeng.

Kabilang dito ay ang Regions 4-A (Calabarzon), 5 (Bicol Region), 6 (Western Visayas), at Bangsamoro Autonomous Region in Muslim Mindanao (BARRM).

Ang direktiba ay ginawa ni Pangulong Marcos sa pamamagitan ng Proclamation No. 84 na nilagdaan ng punong ehekutibo ngayong araw.

Inilabas ang deklarasyon upang mapabilis ang pagbangon at pagtugon na rin ng gobyerno sa pangangailangan ng mahigit isang milyong populasyon na apektado ng kalamidad.

Ayon sa kautusan, iiral ang state of calamity sa loob ng anim na buwan maliban na lamang kung aalisin na ito ng Presidente.

Itinalaga ni Pangulong Ferdinand Marcos Jr. si Jose Arturo Maddela Tugade bilang acting general manager at chief executive officer ng Manila International Airport Authority (MIAA).

Sa isang pahinang appointment letter, binanggit na papalitan ni Tugade sa puwesto si Cesar Chong.

Si Tugade ay anak ni dating Department of Transportation (DoTr) Secretary Arthur Tugade.

Samantala, kinumpirma rin ni Office of the Press Secretary officer-in-charge Cheloy Garafil ang appointment ni Tugade.

Wala pang pahayag ang Palasyo kung kailan manunumpa sa tungkulin si Tugade.

Gagawin nang boluntaryo ang pagsusuot ng face mask sa mga indoor areas.

Katunayan, sa isang press briefing sa Malacañang, sinabi ni Tourism Secretary Christina Frasco na nakatakdang maglabas si Pangulong Ferdinand “Bongbong” Marcos Jr. ng direktiba o executive order na may kaugnayan dito.

Napagkasunduan aniya ito kasunod ng ipinatawag na Cabinet meeting ni Pangulong Marcos ngayong araw.

Ayon kay Frasco, ilalabas ang kautusan batay na rin sa rekomendasyon ng Inter-Agency Task Force (IATF) na may ilang exemptions kasabay ng pagluluwag ng restrictions sa iba’t ibang panig ng bansa.

Gayunman, ipinaliwanag ni Frasco na ire-require pa rin ang pagsusuot ng face mask sa mga pampublikong transportasyon, medical transportation at medical facilities.

Maliban dito, imumungkahi rin aniya ang pagsusuot ng face mask para sa mga hindi bakunadong indibidwal, may co-morbidities at senior citizens.

Sa layuning makontrol ang pagkalat pa ng African Swine Fever (ASF), mariing ipinag-utos ni Pangulong Ferdinand Marcos Jr. sa Dept. of Agriculture na ipagbawal muna ang pagpasok sa Panay region ng mga truck na nagdadala ng baboy at mga produktong baboy sa loob ng 60 araw.
Ginawa ni Pangulong Marcos ang direktiba matapos itong makipagpulong sa Private Sector Advisory Council o PSAC, kasama ang ilang opisyal ng DA.
Kasabay nito, pinare-review rin ng Punong Ehekutibo sa ahensya ang ASIN Law o Act for Salt Iodization Nationwide na nagmamandato na dagdagan ang iodine sa asin para matanggal ang micronutrient malnutrition sa bansa.

Hindi pa tiyak ng Civil Aeronautics Board (CAB) kung nakabalik na ang isang daang porsiyentong kita ng mga airline companies.
Ayon kay CAB Deputy Executive Director Atty. Maria Elben Moro, dahil sa pandemya ay higit dalawang taong walang biyahe kaya’t marami pang kailangang bawiing kita ang mga kompanya.
Sa ginanap na Laging Handa public briefing, sinabi ni Moro na sa ngayon ay patuloy nilang mino-monitor ang galaw ng pasahe, fuel surcharge, pasahero at sitwasyon ng mga paliparan bilang pagtalima sa “Air Passenger Bill of Rights.”
Sinabi pa ng opisyal na bumaba rin ang presyo ng aviation fuel kaya’t asahan ang pagbaba ng fuel surcharge sa susunod na buwan.