Ito ang binigyang-diin ni Prof. Art Samaniego, co-founder ng Scam Watch, kaugnay ng panawagang ipagbawal ang mga violent video games matapos ang insidente ng school shooting sa Tacloban City at iba pang mga insidente ng karahasan sa loob ng eskuwelahan.
Aniya, may pag-aaral na isinagawa ng University of Oxford na nagsasabing walang direct link na nag-uugnay sa violent video games at marahas na pag-uugali.
Isa sa mga anggulong dapat tutukan ng mga imbestigador ay ang posibilidad na naimpluwensyahan o na-radicalize ang mga sangkot ng mga extremist online groups katulad ng grupong 764 na umano’y naghihikayat ng karahasan, dagdag pa niya.
Ayon pa kay Prof. Samaniego, hindi lang dapat sa online games naka-focus ang usapin, dapat ding suriin ang mga palabas na may karahasan, na maaari ring mapanood ng mga kabataan.
Para sa kaniya, mas mahalagang pagtuunan ng pansin ang kabuuang kapaligiran at mga impluwensyang nakapaligid sa kabataan kaysa ituon lamang ang sisi sa mga online game.
