Gilbert Perdez

PATAY ang dalawang detainees matapos pagsasaksakin ang isang pulis at hinostage pa si Sen. Leila de Lima sa PNP  Custodial Center sa Camp Crame sa Quezon City kaninang pasado alas-6:30 ng umaga.

Ayon kay PNP Chief Gen. Rodolfo Azurin, Jr., sinubukang tumakas ng tatlong Persons Under PNP Custody (PUPCs) na sina Arnel Cabintoy, Idang Susukan at Feliciano Sulayao Jr.

Sa initial report, binanggit na pinagsasaksak ng tatlo si PCpl. Roger Agustin na ngayo’y nasa kritikal na kondisyon.

Isang “PCpl. Matias” naman na on-duty ang rumesponde at nabaril sina Cabintoy at Susukan na sinasabing ikinamatay ng mga ito.

Agad na tumakbo si Sulayao sa selda ni de Lima at hinostage ito.

Mabilis ding tumugon ang PNP Special Action Forces at sinubukang makipag-negotiate sa suspek.

Dito na pumasok ang tactical team na naging dahilan upang ma-neutralize si Sulayao.

“Senator de Lima is now safe while the police officer who was stabbed was rushed to the hospital for treatment. Three PUPCs were all neutralized and SOCO is now at the scene of the incident,” wika ni PNP Public Information Office Chief PBGen. Roderick Augustus Alba.

“Tension inside the detention facility has been defused and the situation has returned to normal while investigation is ongoing to review the security protocols inside the PNP Custodial. That is all we can tell you at the moment. We will keep you posted of other developments as more information becomes available.”

Kasabay nito, ipinag-utos na rin ni Azurin ang malalimang imbestigasyon sa insidente.

Kinumpirma ni Quezon City Police District Director PBGen. Nicolas Torre III na isang notoryusong gun for hire suspect ang napatay matapos makipagbarilan sa mga pulis sa Payatas, Quezon City.

Kinilala ni Payatas Bagong Silangan Police Station Commander PLtCol. Roldante Sarmiento ang suspek na si John Philip Rodriguez, alyas “Mata”.

Nabatid na nagsasagawa ng Anti-Illegal Gambling Operation ang mga awtoridad nang mamataan si Rodriguez na nakamotorsiklo at may dalang baril kaya’t agad itong sinita.

Ngunit nang bumaba ng motor si Rodriguez ay bumunot umano ito ng baril at pinaputukan ang mga pulis. Dito na napilitang gumanti ang mga alagad ng batas na ikinasawi ng suspek.

Narekober sa crime scene ang isang kalibre  .38 baril, isang motorsiklo, ilang basyo ng bala at isang sachet ng hinihinalang shabu.

Pinuri naman ni Torre ang kanyang mga tauhan sa pagiging mapagmatyag at alerto ng mga ito.

Aniya, sa bawat operasyon na kanilang ginagawa araw-araw ay handa nilang itaya ang kanilang buhay para sa paglilingkod sa bayan.

Dalawang sundalo ang napatay habang tatlong iba pa ang sugatan, kabilang ang isang bata, matapos sumalakay ang mga miyembro ng New People’s Army (NPA) sa Brgy. Dorillo, Jipapad, Samar.

Ayon sa Joint Task Force Storm at 8th Infantry Division ng Phil. Army, kabilang sa mga nasawi sa engkwentro sina SSgt. John Claire Flores at Pfc. Edupancho Siscar.

Sugatan naman  sina Sgt. Allan Tallania at Pfc. Lou Mark Mengote ng 52nd Infantry Batallion ng 8IB at ang isang 10 taong gulang na batang babae na si Princess Norcio.

Kasabay nito, kinondena naman ni Col. Perfecto Peñaredondo, 803IB brigade commander, ang ginawang pagsalakay ng NPA kung saan tinarget aniya pati ang mga sibilyan.

Inilunsad na ng Department of the Interior and Local Government o DILG ang programa na layong isulong ang isang ‘whole-of-nation approach’ upang mapuksa ang ipinagbabawal na droga sa bansa.

Ayon kay DILG Secretary Benjamin “Benhur” C. Abalos Jr., ang kampanya na tinaguriang “Buhay Ingatan, Droga’y Ayawan” (BIDA) Program ay nakalinya sa hangarin ng administrasyon ni Pangulong Ferdinand “Bongbong” Marcos Jr. na ipagpatuloy ang kampanya laban sa iligal na droga na naaayon sa batas at nakatuon sa rehabilitasyon at socio-economic development.

Kasabay nito, nanawagan din si Abalos sa lahat ng ahensya ng gobyerno, simbahan, eskwelahan, kabataan, at pribadong organisasyon na makiisa sa laban ng gobyerno kontra droga.

Pumalo sa 26,307 examinees ang nakapasa sa Career Service Examination-Pen and Paper Test o CSE-PPT na isinagawa sa iba’t ibang panig ng bansa noong Agosto 7.

Ayon sa Civil Service Commission (CSC), ang bilang ng mga nakalusot ay 18.97 percent ng kabuuang bilang ng mga sumabak sa pagsusulit na umabot sa 138,703 examinees.

Sa Professional Level, nagkaroon ng 22,241 passers mula sa 117,938 examinees.

Mula naman sa 20,765 examinees sa Subprofessional Level ay nasa 4,066 naman ang mga pumasa.