Maaaring abutin ng animnapung taon sa kulungan ang kinse-anyos na suspek sa pamamaril sa San Jose National High School sa Tacloban, Leyte kung mapatutunayang nagkasala kaugnay ng pagkamatay ng tatlong estudyante.
Ayon kay Juvenile Justice and Welfare Council Patricia Claire Oco, bagama’t menor de edad ang suspek, maaari pa rin itong mapanagot sa ilalim ng batas dahil sa bigat ng kasong kinakaharap nito.
Anya, dahil sa edad ng akusado, maaaring ibaba ang parusang “reclusion perpetua” tungo sa “reclusion temporal,” alinsunod sa mga umiiral na probisyon ng batas para sa mga menor de edad na lumalabag sa batas.
Bukod dito, posibleng managot din sa kasong sibil o kriminal ang mga magulang o guardian ng mga suspek kung mapatutunayang nagpabaya sila.
Sa ngayon, nasa pangangalaga na ng rehabilitation center ng Department of Social Welfare and Development sa Tacloban ang dalawang suspek habang nagpapatuloy ang imbestigasyon sa insidente. — Sa panulat ni Reabelle Medina
