Nanawagan ang Commission on Population and Development sa mga pamilyang Pilipino na paigtingin ang “digital parenting” kasunod ng isang insidente ng pamamaril sa isang paaralan sa Tacloban City na kinasangkutan ng dalawang menor de edad.
Ayon sa CPD, hindi lamang sapat ang pagbibigay ng pagkain, edukasyon, at materyal na pangangailangan, kundi mahalaga rin ang aktibong paggabay ng mga magulang sa paggamit ng internet ng mga kabataan, kabilang ang pag-uusap ukol sa responsableng paggamit ng social media, cyberbullying, at tamang asal online.
Samantala, ayon kay Cybercrime Investigation and Coordinating Center Executive Director Undersecretary Renato Paraiso, kumikilos na ang CICC upang makipag-ugnayan sa mga social media platform gaya ng Facebook para ipababa o “i-demote” ang mga kumakalat na video ng karahasang naganap sa mga paaralan sa Tacloban at Cavite.
Aniya, layunin nitong tuluyang maalis ang nasabing mga video at mapanatili ang mga datos para sa imbestigasyon. — Sa panulat ni Reabelle Medina.
