Gilbert Perdez

Lusot na committee level ng kamara ang panukalang batas na naglalayong mapalawig ang Bayanihan to recover as one act (Bayanihan 2).

Sa isinagawang pagdinig, inaprubahan ng house committee on appropriations ang consolidated bill kung saan isinusulong nito na ma-extend ang validity ng Bayanihan 2 mula Disyembre 19, 2020 hanggang Hunyo 30, 2021 habang nagpapatuloy ang laban ng bansa kontra COVID-19.

Paliwanag ni House Speaker Lord Allan Velasco na siyang may-akda ng bill, kailangang palawigin ang Bayanihan 2 upang maipagpatuloy ng gobyerno ang mga hakbang at programa ngayong krisis sa ilalim ng naturang batas.

Nakapaloob sa bayanihan 2 ang COVID-19 stimulus package na nagkakahalaga ng P140-B na regular appropriation at P25-B na standby funds na gagamitin sa pagtugon sa epekto ng pandemya.

Tinukoy ng Department Of Health (DOH) bilang COVID-19 hotspots ang Davao City, Laguna, Rizal, Benguet at Baguio City.

Paliwanag ni Health Secretary Francisco Duque III, ito’y base sa bilang ng mga naitalang bagong impeksiyon kumpara sa kabuuang populasyon.

Batay sa pinakahuling datos ng DOH, nakapagtala ito ng 1,504 na bagong kaso dahilan upang pumalo na sa 447,039 ang total cases sa Pilipinas.

Umakyat naman sa 409,329 ang total recoveries kasunod ng paggaling ng halos 300 pasyente (273).

Samantala, dahil sa pagpanaw ng 8 pang COVID-19 patients ay sumampa na sa 8,709 ang death toll sa buong bansa.

Posibleng hindi magpapakawala ng tubig ang Magat dam ngayong weekend sa kabila ng Northeast Monsoon o hanging amihan na nakakaapekto sa hilagang Luzon.

Paliwanag ni Philippine Atmospheric, Geophysical and Astronomical Services Administration (PAGASA) Hydrologist Aileen Abelardo, wala pa silang nakikitang rason para magsagawa ng spilling operation ang nabanggit na dam.

Maliban dito, sinabi rin ni Abelardo na hindi sapat ang maibubuhos na ulan ng kasalukuyang weather system na maaaring magpaapaw sa Magat dam.

Hindi lamang isa kundi 2 beses nang isasalang sa COVID-19 test ang lahat Filipino seafarers papuntang China.

Sa abiso ng Philippine Overseas Employment Administration (POEA), maliban sa nucleic acid test ay obligado na ring magpasailalim sa COVID-19 IGM antibody test ang mga Pinoy sea-based workers na papasok sa nabanggit na bansa.

Sinasabing sa loob ng 2 araw o 48 oras bago sumakay ng barko patungong China ay dapat magpa-test muna ng 2 beses ang mga Pinoy sa mga nakatalagang testing facilities na nasa official website ng embassy of China.

Hinikayat ng Department of Social Welfare and Development (DSWD) ang mga hindi pa nakakatanggap ng tulong pinansiyal sa ilalim ng Social Amelioration Program (SAP) na dumulog sa kanilang tanggapang pangrehiyon.

Ginawa ni DSWD Agency Operations Center Director Ferdinand Budeng ang pahayag kasunod ng kaliwa’t kanang reklamo ng ilang benepisyaryo na hindi pa umano sila nakakakuha ng ayuda.

Giit ni budeng, ang DSWD regional office ang gumagawa ng payroll kaya’t ito ang dapat lapitan ng mga benepisyaryo upang ayusin o iwasto ang posibleng pagkakamali sa listahan.