Gilbert Perdez

Naturukan ng bakuna kontra COVID-19 ang ilang Filipino frontliners sa United Kingdom (UK).

Ayon sa ulat, kabilang sa mga nabakunahan si Leo Quijano na tubong Marinduque at higit 2 dekada nang nurse sa Britanya.

Si Quijano ay nabigyan ng bakuna nitong miyerkules kasunod ng pag-arangkada ng vaccination program sa UK.

Magugunitang gumawa naman ng kasaysayan ang isa pang Filipino nurse sa UK na si may parsons matapos maging kauna-unahang health worker na nagturok ng bakuna laban sa coronavirus.

Magpupulong ang mga kinatawan ng Department Of Health (DOH) at ng World Health Organization (WHO) upang talakayin ang pag-arangkada ng vaccine trials sa bansa.

Ayon kay Health Undersecretary Maria Rosario Vergeire, kabilang sa mga pagpupulungan ay ang protocol sa trial, gayundin ang implementation arrangements na may kinalaman dito.

Umaasa naman si Vergeire na masisimulan na ang solidarity trial sa mga susunod na linggo.

Natagalan lang aniya ang WHO sa pagsasapinal sa listahan ng mga bakunang isasama sa clinical trial.

Tutol si Sen. Panfilo Lacson sa panukalang palawigin ng isa pang taon ang validity ng 2020 budget.

Ayon kay Lacson, magiging kampante lamang ang mga ahensya sa implementasyon ng mga programa at lalong hindi masusunod ang time frame para sa mga proyekto sa ilalim ng General Appropriations Act (GAA).

Dahil dito, binigyang diin ng senador na hindi siya boboto pabor sa panukala upang magkaroon ng disiplina sa hanay ng mga tanggapan ng gobyerno sa pagpapatupad ng mga proyekto sa loob ng panahon na siyang itinatakda ng batas.

Ipinagmalaki ng Department Of Transportation (DOTR) na malapit nang matapos ang Cavite Extension Project ng Light Rail Transit Line 1 (LRT-1).

Ayon kay DOTR Undersecretary for Railways Timothy John Batan, nangangalahati na o 50.54% na ang overall progress rate ng rail extension ng LRT-1 kung saan inaasahan na sa Disyembre 2021 ay magkakaroon na ng partially operation ang kanilang redemptorist station sa Baclaran.

Ang Cavite extension ay may habang 11.7 kilometro mula Baclaran station at babaybay ito sa walo pang istasyon na kinabibilangan ng Redemptorist Station, MIA  Station, Asia World Station, Ninoy Aquino Station, Las Piñas Station, Zapote Station, at Niog station.

Inaasahang mapapaikli ng rail line ang oras ng biyahe mula Baclaran hanggang Bacoor City, Cavite mula 2 oras hanggang 25 minuto na lamang.