Gilbert Perdez

Nilagdaan na ni Pangulong Rodrigo Duterte ang batas na naglalayong bumuo ng Coconut Farmers and Industry Trust Fund.

Sa pamamagitan ng Republic Act No. 11524, inaasahang magagamit nang mahusay ang multibillion-peso coconut levy fund na pakikinabangan ng coconut industry at ng tinatayang dalawang milyong magniniyog.

Itinatakda sa ilalim ng bagong batas ang pagtatatag ng coconut farmers and industry development plan na mag-oobliga rin sa Philippine Coconut Authority (PCA) na kumonsulta sa mga coconut farmers at sa kanilang mga organisasyon at iba pang samahan sa pagpapatupad ng mga polisiya para sa kaunlaran at rehabilitasyon ng industriya sa loob ng 50 taon.

Matatandaang ibinasura ni Duterte ang kaparehong bill noong 2019 kung saan ipinaliwanag ng Pangulo na ang dahilan ng kanyang pag-veto sa panukala ay ang aniya’y kawalan ng “vital safeguards” upang maiwasan ang mga nakaraang pagkakamali at posibleng paglabag sa Konstitusyon.

Inanunsiyo ng National Immunization Technical Advisory Group (NITAG) na inirerekomenda nila ang COVID-19 vaccine ng Sinovac para sa mga health workers.

Sinasabing darating na Pebrero 28 ang first batch ng bakuna ng Chinese company kung saan ipaprayoridad umano ang mga sundalo at mga manggagawang medikal.

Una rito, inihayag ng Food and Drug Administration (FDA) na maaaring hindi angkop ang Sinovac sa mga health workers na na-expose sa mga COVID-19 patients dulot ng 50.4% efficacy rating na nakuha nito sa isang pag-aaral sa Brazil.

Gayunman, inihayag ng NITAG na sapat na ang isinagawang pag-aaral ng lupon ng mga dalubhasa kung saan lumalabas na ligtas umanong gamitin ang nasabing bakuna.

Halos 2  milyong aplikasyon na ang natanggap ng Commission on Elections (Comelec) mula nang umarangkada muli ang voter registration sa bansa noong September 2020.

Ito ang inihayag ni Comelec spokesperson James Jimenez kasabay ng inilunsad na information drive ng ahensya na pinamagatang “Walkah-Walkah: @MagparehistroKa Voter Education Campaign.”

Gayunman, inamin ni Jimenez na malayo pa rin ang nasabing bilang sa apat na milyong target na registrants ng poll body para sa halalan sa susunod na taon.

Samantala, muling nanawagan sa publiko si Jimenez na huwag matakot na magparehistro dahil wala namang naitatalang coronavirus transmission sa mga sangay ng Comelec.

Ang nationwide voter registration ay bukas hanggang Setyembre 30, 2021.