Patay ang tatlong indibidwal habang sugatan naman ang dalawang iba pa sa panibagong shooting incident sa isang gun store sa New Orleans sa Estados Unidos.
Ayon kay Sheriff Joseph Lopinto, unang pumasok ang isang lalaki sa Jefferson Gun Outlet at pinagbabaril ang dalawang empleyado bago mabilis na tumakas.
Hinabol naman ng iba pang mga kawani ng gun shop ang suspek at napatay sa car park sa labas ng gusali.
Inaalam pa ang motibo sa naturang pamamaril.
Arestado ang tatlong lalaki habang 5,000 piraso ng iligal na troso ang nasabat sa bayan ng Sta. Ana sa Cagayan.
Kinilala ang mga suspek na sina Boy Damaso, Johnny Damaso at Rodel Abaya, kapwa nakatira sa Brgy. San Vicente.
Ibinunyag naman ni Cagayan Valley police director Brig. General Crisaldo Nieves na ang mga hot lumber na kinabibilangan ng narra at kamagong ay pag-aari ng isang prominenteng negosyante sa Cauayan City sa Isabela.
Ibabalik ng San Carlos city government ang kanilang mga checkpoint sa mga boundaries sa Vallehermoso at Canlaon City sa Negros Oriental simula ngayong araw, ika-22 ng Pebrero.
Paliwanag ni City Mayor Renato Gustilo, ang hakbang ay bilang tugon na rin sa request ni Negros Occidental Governor Eugenio Jose Lacson bunsod ng tumataas na bilang ng COVID-19 cases sa kanilang lungsod.
Dahil dito, sinabi ni Gustilo na obligado nang magpakita ng medical certificate ang mga indibidwal na papasok ng lungsod mula sa bayan ng Vallehermoso at dapat may swab test result naman ang mga manggagaling naman ng Canlaon City.
Dinapuan ng coronavirus disease 2019 (COVID-19) si South Cotabato Gov. Reynaldo Tamayo Jr.
Nabatid na boluntaryong nagpasailalim sa swab test si Tamayo bunsod ng nararanasan nitong mga sintomas ng impeksiyon.
Ayon kay Tamayo, bago ito ay nakalasamuha niya ang isang COVID-19 positive.
Dahil dito, ipinauubaya muna ni Tamayo kay Vice Governor Vicente de Jesus ang pamamahala sa buong lalawigan habang hindi pa siya nakakarekober sa sakit.
Sisimulan na ng Philippine National Police (PNP) ngayong linggo ang paggamit ng “body cameras” sa mga anti-drug operations sa Metro Manila upang tiyakin na walang malalabag sa karapatang pantao.
Ayon kay Maj. Gen. Angelito Casimiro, direktor ng PNP Directorate for Logistics, lahat ng mga miyembro ng drug enforcement units ng National Capital Region Police Office (NCRPO) ay kakabitan ng security gadgets simula Miyerkules, ika-24 ng Pebrero.
Sinasabing sumalang na sa dalawang araw na pagsasanay ang mga pulis ukol sa tamang paggamit ng body cameras, kabilang pag-download ng videos mula rito.
Matatandaang bumili ng 2,686 body cameras ang PNP na nagkakahalaga ng higit P288 milyon para sa 269 police units sa buong kapuluan.
Pinawi ng Department of Health (DOH)-Central Visayas ang pangamba ng publiko ukol sa dalawang virus mutations na nadiskubre sa rehiyon.
Ayon kay Dr. Mary Jean Loreche, chief pathologist ng DOH-7, walang dapat ikabahala dahil asymptomatic ang 80% o higit pa sa mga aktibong kaso ng COVID-19 sa lalawigan ng Cebu.
Bukod dito, sapat din aniya ang healthcare capacity ng Region 7 para tugunan ang kasalukuyang sitwasyon.
Nasawi ang isang pulis habang sugatan naman ang limang iba pa matapos maaksidente ang sinasakyang police mobile sa Santiago City, Isabela.
Ayon sa pulisya, dead on the spot si Patrolman Archelle Duldulao habang hindi pa tinukoy ang pagkakakilanlan ng apat na pulis at tricycle driver na nasugatan sa pangyayari.
Sa imbestigasyon, binabaybay ng police mobile ang national highway ng Barangay Sinsayon nang pumutok ang isang gulong ng sasakyan.
Napunta sa kabilang linya ang mobile at nasalpok pa ng isang SUV habang nahulog naman si Duldulao sa sasakyan bago nagulungan at nasagasaan ng traysikel.
Sinasabing papunta sana sa isang checkpoint ang mga alagad ng batas nang mangyari ang malagim na aksidente.
Hinarang ng mga ahente ng Bureau of Immigration (BI) sa paliparan ang 17 Chinese nationals dahil sa hindi malinaw na ‘purpose of travel’ sa Pilipinas.
Ayon kay BI intelligence division chief Fortunato Manahan Jr., magkakasalungat ang mga pahayag ng mga dayuhan nang kapanayamin nila ang mga ito.
Dahil dito, agad na pinabalik sa kanilang bansa ang mga Tsino at inilagay sa blacklist ng ahensya.
Sa kasalukuyan, tanging ang mga banyaga lamang na mayroong existing visa ang pinapayagang makapasok sa bansa.
Inanunsiyo ng Department of Health (DOH) na nakapagtala ito ng 9,737 na bagong COVID-19 recoveries.
Bunga nito, sumampa na sa 522,843 ang kabuuang bilang ng mga gumaling sa sakit sa Pilipinas.
Nakapagtala rin ang DOH ng 1,888 na bagong kaso kaya’t sumirit na sa 561,169 ang total coronavirus cases kung saan nasa 26,238 naman ang mga aktibong kaso.
Samantala, umabot na sa 12,088 ang death toll matapos pumanaw ang 20 pang pasyente.
Nadagdagan ng 82 ang bilang ng mga Pilipinong gumaling sa COVID-19 sa labas ng bansa.
Dahil dito, ayon sa Department of Foreign Affairs (DFA), pumalo na sa 9,301 ang total recoveries.
Batay sa pinakahuling case bulletin, nagkaroon ng 133 na bagong kaso dahilan upang umakyat sa 14,791 ang kabuuang bilang impeksiyon sa hanay ng mga Pinoy sa ibayong dagat.
Sa nabanggit na bilang, nasa 4,478 ang active cases.
Samantala, sumirit naman sa 1,012 ang death toll kasunod ng pagpanaw ng 33 pang Pinoy abroad.