Pinataob ng Miami Heat ang Los Angeles Lakers sa score na 96-94 sa kanilang laro sa NBA.
Si Kendrick Nunn ang nanguna sa Heat sa pamamagitan ng kanyang 27 points habang nagdagdag si Jimmy Butler ng 24 points.
Sinasabing kaya mahina ngayon ang Lakers ay dahil hindi nakakalaro si Anthony Davis dulot ng injury.
Tuluyang nagbitiw sa puwesto ang health minister ng Argentina na si Gines Gonzalez Garcia.
Ito’y makaraang mabunyag ang umano’y ‘palakasan system’ sa pagkuha ng bakuna kontra COVID-19.
Idinepensa naman ni Garcia na kaya napabilis ang pagkuha ng vaccine ng ilang personalidad ay dulot ng kalituhan habang wala siya sa kanyang tanggapan.
Una nang isiniwalat ng isang mamamahayag sa Argentina na nabakunahan agad siya makaraang kausapin niya mismo ang health minister ukol dito.
Inilagay ng lokal na pamahalaan ng Pasay City sa 14-day lockdown ang 33 barangay at isang establisimyento sa lungsod.
Ayon kay City Administrator Dennis Acorda, nais ni Mayor Emi Calixto-Rubiano na isailalim sa lockdown ang bawat barangay na mayroong tatlo o higit pang kaso ng COVID-19.
Ang Pasay ay isang transport hub sa southern Metro kung saan dito matatagpuan ang mga terminal ng bus at airport, gayundin ang maraming recreational at entertainment sites.
Ang lungsod ay sinasabing mayroon nang 7,461 confirmed coronavirus cases kung saan nasa 280 ang aktibong impeksiyon.
Nakatakdang kasuhan ang dalawang babaeng turista mula Metro Manila dahil sa pamemeke umano ng swab test results para makapasok sa El Nido, Palawan.
Ayon sa Department of Tourism (DOT), ang dalawang babae ay hinuli ng mga awtoridad sa Lio Airport sa El Nido matapos matuklasan na palsipikado ang petsa ng specimen collection ng kanilang RT-PCR test results.
Agad na dinala sa isang hotel ang mga suspek para isalang sa pitong araw na quarantine at nakatakdang sampahan ng kaukulang kaso.
Nagpapatuloy ang negosasyon sa pagitan ng mga lokal na opisyal at armadong grupo na dumukot sa 42 katao, kabilang ang 27 bata, sa isang boarding school sa Kagara district sa Nigeria.
Una rito, sinalakay ng mga armadong lalaki na nakasuot ng military uniforms ang Government Science College sa Kagara kung saan bukod sa mga kinidnap ay pinatay din ng mga ito ang isang estudyante.
Naniniwala naman ang Niger State government officials na mga bandido ang dumukot sa mga biktima para humingi ng ransom.
Naniniwala si NBA Hall-of-Famer Charles Barkley na mas karapat-dapat si Filipino-American guard Jordan Clarkson na isabak sa All-Star Game sa Atlanta sa Marso 7 kumpara kay superstar Anthony Davis.
Ayon kay Barkley, si Clarkson ang nakikita niyang pinakamahusay sa lahat ng bench players ngayong taon habang ang kanilang team naman na Utah Jazz ang may hawak ng best record sa NBA.
Bagama’t kumontra sina NBA legends Shaquille O’Neal at Kenny Smith, nanindigan si Barkley na mas maganda ang ipinakikita ni Clarkson kumpara kay Davis ngayong season.
Sa kasalukuyan, hawak ng Jazz ang pinakamagandang record sa liga na 24 ang panalo at 5 ang talo.
Nasabat ng Bureau of Customs (BOC) ang 25 buhay na ahas na nagkakahalaga ng P300,000 sa Ninoy Aquino International Airport (NAIA) sa Pasay City.
Ayon kay district collector Carmelita Talusan, kabilang sa mga nadiskubre sa DHL warehouse ang dalawang makamandag na cobra, walong pit vipers, at 15 Sailfin Lizards.
Sinasabing idineklara ng isang Adrian Lim bilang souvenir items ang kargamento na nakapangalan o naka-consign sa isang Ryan Su sa Taiwan.
Binigyang diin ni Talusan na magpapatuloy ang kanilang matinding kampanya laban sa illegal wildlife trade.
Sasampahan ng mga kaukulang kaso ang mga suspek.
Isusumite ng Department of Health (DOH) sa World Health Organization (WHO) ang mga samples ng dalawang COVID-19 mutations na nadiskubre sa Cebu.
Ngunit nilinaw ni Health Undersecretary Ma. Rosario Vergeire na ang dalawang mutations na natukoy bilang E484K at N501Y ay hindi pa masasabing bagong variants.
Una nang sinasabi ni Dr. Mary Jean Loreche, tagapagsalita ng DOH sa Central Visayas, na ang mga nabanggit na mutations ay itinuturing bilang isang “variant of concern.”
Patay ang isang miyembro umano ng Abu Sayyaf Group (ASG) matapos manlaban sa mga awtoridad sa Sulu.
Kinilala ang suspek na si Almujir Yadah na sinasabing isang sub-leader ng ASG at miyembro ng isang private armed group sa ikalawang distrito ng lalawigan.
Ayon sa PNP Anti-Kidnapping Group (AKG), nagbebenta umano si Sahid ng mga armas o high-powered firearms sa ASG at sa ilang kidnap-for-ransom groups sa Zamboanga City at Sulu.
Isang operatiba ng AKG ang nakabili ng baril at mga pampasabog mula kay Sahid sa Barangay Kansipat sa bayan ng Panamao.
Ngunit nakatunog umano si Sahid na pulis ang kanyang katransaksiyon kaya’t kumuha ito ng baril hanggang sa mapatay ito ng mga awtoridad.
Nilinaw ng Metropolitan Manila Development Authority (MMDA) na hindi pa pinal ang desisyon ng Metro Manila Council (MMC) na huwag payagan ang muling pagbubukas ng mga sinehan sa National Capital Region (NCR).
Ayon kay MMDA Chairman Benjamin “Benhur” Abalos Jr., bagama’t lumabas na ang unanimous opposition ng mga alkalde ay ang Inter-Agency Task Force (IATF) at si Pangulong Rodrigo Duterte pa rin ang magpapasya ukol dito.
Sinabi ni Abalos na igagalang ng mga Metro Manila Mayors anuman ang magiging final decision ng Presidente sa usapin.
Matatandaang napaulat na plano ng MMDA na payagan ang 30% capacity ng mga sinehan kaya’t nilinaw ng ahensya na hindi sila ang magdedesisyon tungkol dito.