Gilbert Perdez

Arestado ang isang lalaki matapos matuklasan ang P6.8 milyong halaga ng hinihinalang shabu sa isang package na ipinadala sa kanya sa pamamagitan ng isang courier service sa Cebu City.

Ayon sa Philippine Drug Enforcement Agency (PDEA) 7, ang items na galing Malaysia ay idineliver sa suspek na si alyas “Jayson” sa Barangay Cogon Ramos.

Unang natunugan ang shipment sa isang warehouse ng isang cargo forwarder sa Clark International Airport kaya’t ikinasa ang tinatawag na ‘controlled delivery operation’.

Nabatid na ang droga ay inilagay sa ilalim ng package na naglalaman ng dalawang frying pans at isang air fryer at binalot ng transparent tape.

Mahaharap ang suspek sa kasong paglabag sa Comprehensive Dangerous Drugs Act of 2002.

Pinagkalooban ng Department of Agriculture-Bureau of Fisheries and Aquatic Resources (DA-BFAR) ng alternatibong kabuhayan ang mga magbababoy sa Quezon City na apektado ng African swine fever outbreak.

Ayon kay DA Undersecretary for Agri-Industrialization Cheryl Natividad-Caballero, kabilang sa mga makikinabang sa urban aquaculture project ay ang mga hog growers sa Barangay Bagong Silangan at Barangay Payatas.

Tinatayang 10,000 pieces ng hito at 9,000 pieces ng tilapia fingerlings ang ipinamahagi ng DA sa mga magbababoy matapos gawing fish tanks ang mga dating pig pens ng mga ito.

Magugunitang tiniyak ng isang food security advocacy group na sapat pa ang suplay ng isda para sa mga consumers sa mga susunod na buwan.

Aabot sa 39 party-list groups ang tinanggal ng Commission on Elections (Comelec).

Batay sa Comelec Resolution No. 10696, ipinaliwanag ng poll body na ang ilan dito’y bigong makakuha ng dalawang porsiyento ng mga bumoto para sa party-list system at lumagpak sa ikalawang round ng seat allocation sa nakalipas na dalawang magkasunod na eleksiyon.

Ayon sa Comelec, kabilang sa mga inalis o tinanggalan ng registration ay ang 1-AANI (Usa An Aton Nahigugma Nga Iroy Nga Tuna); 1-AAMOVER (1-A Action Moral & Values Recovery Reform of the Philippines, Inc.); 1-AHAPO (One Bagong Ahapo ng Pilipinas Party-List); ABAKADA (Abakada Guro); ABAMIN (Abante Mindanao, Inc.); ADING (Advance Community Development in New Generation); AG (Ang Galing Pinoy); AKO AN BISAYA (Ako An Bisaya); ALAGAD (Alagad Party-List); ALAY BUHAY (Alay Buhay Community Development Foundation, Inc.); ALL-FISH (Alliance of Philippine Fishing Federation Inc.); ANAD (Alliance for Nationalism and Democracy); at AMEPA OFW (Amepa OFW Access Center, Inc.).

Nalaglag din sa listahan ang ANG NARS (Ang Nars, Inc.); ANG PAMILYA (Una Ang Pamilya); ANUPA (Alliance of National Urban Poor Organizations Assembly, Inc.); APPEND (Append, Inc.); ASEAN (Academicians, Students and Educators Alliance, Inc.); ATING KOOP (Adhikaing Tinataguyod ng Kooperatiba); AVE (Alliance of Volunteer Educators); AWAKE (Awareness of Non-Stock Savings and Loan Associations, Inc.); FICTAP (Federation of International Cable TV and Telecommunications Associations of the Philippines); GLOBAL (Global Workers and Family Federation, Inc.); at ITO ANG TAMA (Tanggol Maralita, Inc.)

Samantala, hindi rin nakaligtas ang KAKUSA (Kapatiran ng mga Nakulong na Walang Sala, Inc.); KALIKASAN PARTY-LIST (Kalikasan Partylist); KAMAIS (Kapatirang Magmamais ng Pilipinas Inc.); KMM (Kaisahan ng mga Maliliit na Magsasaka); METRO (Movement for Economic Transformation and Righteous Opportunities); PBB (Partido Bayan ang Bida); PM (Partido Manggagawa); SAMAKO (Sandigan ng mga Manggagawa sa Konstruksyon); SINAG (Sinag Tungo sa Kaunlaran); TAO MUNA (Ang Tao Muna at Bayan); TINDERONG PINOY (TINDERONG Pinoy Party); TRICAP (Tribal Communities Association of the Philippines); at UNIDO (Union of Nationalist Democratic Filipino Organization).

Matatandaan na ilang beses na ring ipinaliwanag ng Comelec na tanging mga lehitimong grupo lamang na kumakatawan sa marginalized sector ang kanilang pinapayagang lumahok sa party-list elections.

Nakatakdang pagkalooban ng amnestiya ni Pangulong Rodrigo Duterte ang tinatayang 1,000 miyembro ng Moro Islamic Liberation Front (MILF) na nakagawa ng mga krimen dahil sa kanilang mga paniniwalang pulitikal.

Ayon kay Bangsamoro Autonomous Region in Muslim Mindanao (BARMM) Interior Minister Naguib Sinarimbo, ito’y bilang bahagi ng normalization process sa ilalim ng comprehensive agreement.

Sinabi ni Sinarimbo na sa pamamagitan ng amnesty proclamation ay mahihimok ang mga MILF combatants na tuluyan nang magbalik-loob sa gobyerno.

Sa oras na maigawad na ang amnestiya ay mabubura ang mga pananagutang kriminal ng mga rebelde at maibabalik ang kanilang mga karapatang pulitikal.

Kasama sa mga inaasahang makikinabang sa proklamasyon ang mga kasapi ng central committee at senior commanders ng MILF.

Samantala, inamin din ni Sinarimo na ilan sa mga ito ay kabilang sa mga opisyal ng Bangsamoro Transition Authority (BTA) na nagsisilbing interim government ng rehiyon.

Isiniwalat ng Department of Science and Technology (DOST) na umarangkada na sa Pilipinas ang clinical trials ng COVID-19 vaccine na gawa ng Janssen Pharmaceuticals.

Gayunman, hindi binanggit ni DOST Undersecretary Rowena Cristina Guevara kung ilan ang mga kalahok sa trial ng Janssen, ang pharmaceutical arm ng Johnson & Johnson na nakabase sa Amerika.

Ngunit lahat aniya ng clinical sites ay matatagpuan sa Metro Manila.

Samantala, naghahanda pa lamang umano ang Clover at Sinovac sa trial ng kanilang mga bakuna.