Gilbert Perdez

Kinumpirma ng isang opisyal ng Bureau of Corrections (BuCor) ang pagkamatay ng high-profile inmate na si Raymond Dominguez sa New Bilibid Prison (NBP).

Ayon kay BuCor spokesman Gabriel Chaclag, natagpuang wala nang buhay si Dominguez, lider ng Dominguez car theft gang, bandang alas-6:20 ng umaga.

Sinabi ni Chaclag na walang nakitang senyales na nagkaroon ng foul play sa pagpanaw ni Dominguez ngunit hinihintay pa ang resulta ng medico-legal examination.

Hinihinalang natural causes ang ikinasawi ng inmate dahil sinasabing may hypertension ito at hika.

Si Dominguez ay hinatulang mabilanggo ng hanggang 36 taon ng Malolos, Bulacan Regional Trial Court noong 2012 dahil sa kasong carnapping.

Bukod dito, kasama rin si Dominguez at ang kanyang kapatid na si Roger sa mga akusado sa pagpaslang sa car dealers na sina Venson Evangelista at Emerson Lozano noong 2011.

Hindi bababa sa 60 katao ang pinangangambahang nasugatan sa naganap na sunog sa isang customs post sa Afghanistan.

Ayon sa ulat, mahigit 300 sasakyan na may kargang petrolyo ang nilamon ng apoy sa bayan ng Islam Qala na matatagpuan sa border ng Afghanistan at Iran.

Nawalan naman ng kuryente ang malaking bahagi ng probinsya ng Herat matapos masunog ang dalawang poste.

Samantala, inaalam pa kung nakaligtas ang mga lulan ng mga sasakyan habang iniimbestigahan din kung ano ang naging sanhi ng insidente.

Agad na nasawi ang isang lalaki matapos pagtatagain ng dating nobyo ng kanyang kinakasama sa Buhangin, Davao City.

Ayon kay Police Maj. Bernie Suaga, hepe ng Buhangin Police Station, nakilala ang biktima na si Vergillo Suicob habang nakakulong na ngayon ang suspek na si Fel Enilasan.

Sa imbestigasyon, napansin ng babae na sinusundan siya ni Enilasan at nang makitang kasama niya si Suicob ay bigla na lamang itong pinagtataga gamit ang itak hanggang sa masawi ang biktima.

Kuwento naman sa pulisya ni Enilasan, nagdilim ang kanyang paningin nang makitang may iba na ang nobya kaya’t nagawa niyang tagain si Suicob.

Sasampahan ng kasong murder ang naturang suspek.

Mahigit P10 milyong halaga ng mga ari-arian ang natupok sa sunog na naganap sa bayan ng Lala, Lanao del Norte.

Ayon kay Fire Inspector Kenneth Puig, unang sumiklab ang apoy sa isa sa mga pinakamalaking tindahan sa Barangay Maranding kung saan anim na truck ang nagtulong-tulong upang maapula ito.

Wala namang namatay o nasugatan habang inaalam pa ang naging sanhi ng sunog.

Nagdiwang ng kanyang ika-97 na kaarawan si dating Senate President Juan Ponce Enrile kasabay ng Valentine’s Day ngayon.

Kabilang naman ang anak ni Enrile na si Katrina sa mga nagbigay ng taos-pusong tribute sa dating Senador.

Bagama’t hindi umano perpekto ang kanilang ama, inilarawan niya ito bilang isang lakas at inspirasyon.

Sa isang post sa Facebook, nagpasalamat naman ang dating mambabatas sa lahat ng mga bumati at nakaalala sa kanyang kaarawan.

Mababa pa rin ang tiwala sa bakuna kontra COVID-19 ng mga mamamayan sa National Capital Region o NCR.

Ito’y makaraang lumabas sa isinagawang survey ng mga lokal na pamahalaan na nasa tatlo lang sa bawat sampung indibidwal sa Metro Manila ang payag na mapabukanahan.

Ayon kay Undersecretary Epimaco Densing III ng Department of Interior and Local Government (DILG), lumalabas na 20% hanggang 30%  lamang ng populasyon ng NCR ang gustong tumanggap ng bakuna.

Aniya, nangangahulugan lamang na kailangang mas palakasin pa ang information drive ng pamahalaan upang umabot sa 80% na target ng DILG para magkaroon ng herd immunity.

Hindi kailanman magiging lame duck leader si Pangulong Rodrigo Duterte.

Ito, ayon kay Chief Presidential Legal Counsel Salvador Panelo, ay dahil mataas pa rin ang kumpiyansa o tiwala ng mga Pilipino sa Presidente.

Maituturing na lame duck ang isang lider na malakas lamang ang suporta sa kalagitnaan ng termino pero bigla namang nagbabaligtaran ang mga kaalyadong pulitiko at lilipat sa ibang partido sa dulo ng kanyang panunungkulan.

Giit ni Panelo, malabo itong mangyari kay Duterte lalo pa’t 91 %ang trust at approval ratings ng punong ehekutibo sa mga nakaraang survey.

Pumalo na sa 23,813 ang bilang ng mga gumaling sa COVID-19 sa Central Luzon.

Ito’y kasunod ng paggaling ng labingdalawa pang pasyente sa rehiyon.

Batay sa regional case bulletin ng Department of Health-Central Luzon Health Development (DOH-CLHD), nakapagtala ito ng 63 na bagong kaso kaya’t umakyat na sa 28,709 ang kabuuang ng impeksiyon sa lugar.

Ayon kay DOH-Region 3 director Cesar Cassion, sumampa na sa 1,044 ang death toll sa Gitnang Luzon.