Gilbert Perdez

Sa halip na batikusin ang administrasyong Duterte, mas maiging tutukan ang pagpapalakas ng kumpiyansa ng publiko sa bakuna.

Ito ang panawagan ni Chief Presidential Legal Counsel Salvador Panelo sa mga kritiko na aniya’y dapat tumulong din sa pagpapaliwanag sa mga Pilipino ukol sa kahalagahan ng pagbabakuna.

Ang pangunahing problema aniya sa vaccination campaign ng pamahalaan ay ang kawalan ng tiwala ng mga tao sa bakuna at hindi ang posibleng korapsiyon o sa anumang brand ng vaccine.

Matatandaang lumitaw sa isinagawang survey ng Pulse Asia noong nakaraang taon na  50% ng mga respondents ay ayaw magpabakuna, 32 %  ang handa, at 21% naman ang undecided.

Tiniyak ng Department of Health na sasagutin ng Philippine Health Insurance Corp. (PhilHealth) ang medical expenses ng mga pasyenteng makakaranas ng adverse effects o epekto ng bakuna kontra COVID-19.

Ayon kay Health Undersecretary Maria Rosario Vergeire, sakop ito ng kasalukuyang case rates ng Philhealth kaya’t hindi dapat mangamba ang publiko sa pagpapabakuna.

Matandaan na unang inilatag ni Health Secretary  Francisco Duque III ang posibleng pagbibigay ng indemnification expenses sa mga COVID-19 vaccine recipients sa isinagawang Senate hearing kamakailan.

Napanalunan ng nag-iisang mananaya mula Aklan ang P246 million na jackpot prize sa Ultra Lotto 6/58.

Ayon sa Philippine Charity Sweepstakes Office, natumbok ng masuwerteng bettor ang winning combination na 24-09-32-41-29-22.

Samantala, 16 pang mananaya ang nakakuha ng tig-P120,000 matapos mahulaan ang limang kumbinasyon.

Ang 6/58 Ultra Lotto ay binobola tuwing Martes, Biyernes, at Linggo.