Gilbert Perdez

Itinakda na ng Commission on Elections (COMELEC) ang petsa para sa paghahain ng kandidatura para sa Mayo 9, 2022 national & local elections.

Batay sa Resolution No. 10695 na inisyu ng COMELEC, maaari nang maghain ng Certificate Of Candidacy (CoC) ang mga interesadong tumakbo para sa halalan, simula sa Oktubre 1 hanggang 8 ngayong taon.

Maaari namang mangampanya ang mga tatakbo sa national positions (President, Vice-President, Senador, at party-list groups) mula Pebrero. 8, 2022 hanggang Mayo 7, 2022.

Sa local positions naman ay itinakda ang pangangampanya mula March 25, 2022 hanggang May 7, 2022, maliban sa Huwebes Santo at Biyernes Santo (April 14 at 15,2022).

Samantala, iiral ang election period mula Enero 9, 2022 hanggang Hunyo 8, 2022 kung saan ipatutupad din ang election gun ban o pagbabawal sa paggamit o pagdadala ng baril at iba pang nakamamatay na armas, at paggamit ng security personnel o bodyguards ng mga kandidato.

Bibili ng bakuna kontra COVID-19 ang Diocese of Bataan.

Ayon kay Bataan Bishop Ruperto Santos, ito’y bahagi ng kanilang free vaccination program para sa mga pari, magulang, at sa lahat ng mga taong simbahan.

Sinabi ni Santos na katuwang nila sa programa ang pamahalaang panlalawigan ng Bataan.

Bagama’t handa siyang magpabakuna, nilinaw ni Santos na hindi sapilitan ang pagbibigay ng vaccine dahil sa bandang huli ay ang bawat miyembro pa rin ng simbahan ang magpapasya kung magpapabakuna sila o hindi.

Inilibing na ang mahigit 100 miyembro ng Yazidi minority na natagpuan sa isang mass grave sa Iraq matapos umanong patayin ng Islamic state o ISIS anim na taon na ang nakararaan.

Ang mas funeral ay ginawa sa probinsya ng Kocho kung saan daan-daang residente ang nakipaglibing.

Magugunitang natagpuan at nahukay ang mga labi ng mga biktima noong nakaraang taon sa tulong ng United Nations o UN.

Tumutulong naman ang Martyr’s Foundation sa pagtukoy sa pagkakakilanlan ng mga biktima sa pamamagitan ng DNA samples.

Nais matiyak ng isang grupo ng mga Muslim mula Marawi City na Halal o pinapayagan sa ilalim ng Islamic law ang mga bakuna kontra COVID-19.

Ayon kay Abdulamalik Fatani, presidente ng League of Ulamas and Imam of the Philippines, dapat ipagpaliban muna ang pagbabakuna hangga’t hindi pa nasisiguradong Halal ang mga COVID-19 vaccines.

Matatandaang inihayag ng Department of Health na nakikipag-ugnayan na ang Food and Drug Administration (FDA) sa mga gumagawa ng mga bakuna sa usapin ng Halal certification.

Ipinadala na sa Philippine Genome Center (PGC) ang 70 sample specimens mula sa ilang COVID-19 patient sa Cebu upang maisailalim sa sequencing at matukoy kung nakahawa na ng maraming indibidwal ang B.1.1.7 o UK variant sa probinsya.

Ayon kay Dr. Mary Jean Loreche, Chief Pathologist ng Department of Health (DOH) Region 7, ito’y bahagi ng bio-surveillance na ginagawa ng ahensya kasunod ng nadiskubreng dalawang kaso ng mas nakahahawang sakit sa lalawigan.

Sinabi pa ni Loreche na malalaman ang resulta ng tests sa 70 samples sa loob ng 10 araw.

Nagbalik-loob sa pamahalaan ang 11 miyembro ng Bangsamoro Islamic Freedom Fighters o BIFF sa Maguindanao.

Ayon kay Lt. Col. Charlie Banaag, commander ng 6th Infantry Battalion o 6IB, ang mga sumuko ay pawang kasapi ng paksiyon ng BIFF sa ilalim ng isang Kagi Karialan.

Sinabi ni Banaag na pagod na sa pakikipaglaban sa gobyerno ang mga ito kaya’t mas piniling sumurender upang makapiling muli ang kani-kanilang mga pamilya.

Maliban dito, sinasabing isinuko rin ng mga dating rebelde ang ilang malalakas na uri ng armas at isang grenade launcher.

Hinimok ng isang opisyal ng Malacañang ang Philippine National Police (PNP) na muling ipagbawal ang riding-in tandem o magka-angkas sa motorsiklo.

Ang panawagan ay ginawa ni Chief Presidential Legal Counsel Salvador Panelo  matapos maglunsad ang PNP ng Tactical Motorcycle Riding Units (TMRUs) at mga secret marshals upang tugisin ang mga motorcycle-riding criminals.

Giit ni Panelo, tanging ang anti-riding-in-tandem policy lamang ang nakikita niyang paraan upang maiwasan ang mga krimen na kagagawan ng mga salarin na magka-angkas sa motorsiklo.

Samantala, tiyak naman umanong papalag dito ang publiko dahil ang pagmomotorsiklo lamang ang nakikitang solusyon ng maraming Pinoy sa matinding trapik sa iba’t ibang lugar, gayundin sa kakulangan ng transportasyon dulot ng travel restrictions.