Gilbert Perdez

Gagamit na rin ng contact tracing application ang Government Service Insurance System (GSIS) simula ngayong araw,  Pebrero 8.

Ayon sa state pension fund, sisimulan ang paggamit ng StaySafe.ph app ng kanilang punong tanggapan sa Pasay City habang magkakaroon na rin nito sa iba pang sangay ng ahensya sa mga susunod na buwan.

Sa pamamagitan ng StaySafe.ph, lahat ng mga kliyente at kawani ng GSIS ay madali nang makapag-register o makapagbigay ng kanilang health status at komprehensibong contact tracing report sa nasabing tanggapan ng gobyerno.

Sinita ng isang mambabatas ang pamumutiktik umano ng mga tela at kasuotan na gawa sa makina sa lokal na merkado at inangkat lamang sa labas ng bansa.

Ayon kay Deputy Speaker Loren Legarda, makakaapekto ito sa kabuhayan ng mga katutubong maghahabi dahil tila ginagaya ng mga dayuhan ang disenyo ng mga ito lalo na ang mga tela mula Cordillera.

Dahil dito, isinusulong ni Legarda ang panukalang batas na nagmamandato na dapat bayaran ng royalties ang mga katutubo o Indigenous Peoples sa ginaya o ginamit na cultural properties ng mga ito.

Ikinababahala ng isang senador ang patuloy na pagtaas ng bilang mga kabataang hindi nakakapag-aral.

Ayon kay Sen. Sonny Angara, chairman ng Senate Committee on Youth, batay sa datos ng Department of Education (DepEd) ay halos apat na milyong estudyante ang hindi nakapag-enroll ngayong school year.

Magugunitang inihayag din ng DepEd noong 2020 na tinatayang 23 milyon lamang ang nakapag-enroll sa public at private schools na mas mababa kumpara sa 27.7 milyon enrollees noong 2019.

Dahil dito, binigyang diin ni Angara na mahalagang matutukan ang sitwasyon ng Out-of-School Youth (OSY) lalo na’t patuloy na dumarami ang mga ito dahil sa COVID-19 pandemic.

Naniniwala ang Malacañang na makukumbinsi pa rin nito si Baguio City Mayor Benjamin “Benjie” Magalong na manatili sa kanyang posisyon bilang contact tracing czar.

Paliwanag ni Presidential Spokesperson Harry Roque, hindi kasi binanggit ni Magalong sa kanyang isinumiteng resignation letter na “irrevocable” ang pagbibitiw niya sa puwesto.

Sinabi pa ng kalihim na bibigyan muna nila ng pagkakataong magdesisyon sa usapin at posibleng ilalabas ito sa mga susunod na araw.

Matatandaang hindi tinanggap ng National Task Force (NTF) ang pagre-resign ni Magalong na nangyari ilang araw matapos makatanggap ng kaliwa’t kanang batikos sa pagdalo sa isang birthday party sa Baguio na wala umanong suot na facemask.

Muling idinepensa ng Malacañang ang pagtatalaga ni Panguong Rodrigo Duterte ng mga dating opisyal ng militar.

Ginawa ni Presidential Spokesperson Harry Roque ang pahayag matapos alukin ng Presidente ng bagong trabaho si retired Armed Forces of the Philippines Chief-of-Staff Gen. Gilbert Gapay.

Ayon kay Roque, tiwala ang Pangulong Duterte na magagampanan nang mabuti at maayos ng mga dating heneral ang kanilang misyon.

Naniniwala rin ang tagapagsalita ng Palasyo na mas marami pa ring sibilyan na nasa gabinete ng Presidente kumpara sa mga dating opisyal ng militar.

Si Gapay ay posibleng mapunta sa Department of National Defense (DND) o kaya’y sa Metropolitan Waterworks and Sewerage System matapos bakantehin ni dating MWSS Chief Emmanuel Salamat ang kanyang posisyon.