Gilbert Perdez

Kinontra ng isang grupo ang napipintong price cap sa presyo ng karneng manok at baboy sa Metro Manila.

Naniniwala kasi si Samahang Industriya ng Agrikultura o SINAG Chairman Rosendo So na hindi ito ang solusyon sa problema dahil posible pa itong magdulot ng pagkawala ng suplay sa Kamaynilaan.

Ayon kay So, posibleng magbenta na lamang ang mga supplier sa ibang lugar na hindi saklaw ng price ceiling.

Dahil dito, iminungkahi ni So na akuhin na lamang ng Department of Agriculture (DA) ang gastos sa biyahe pa-Maynila ng bawat baboy at manok kung nais nitong sumadsad ang presyo ng mga naturang produkto.

Nakaamba na namang tumaas ang presyo ng ilang produktong petrolyo sa Martes, ika-siyam ng Pebrero.

Ayon sa mga source mula sa industriya, maaaring tumaas ng P1 hanggang P1.05 kada litro ang halaga ng diesel habang P0.80 hanggang P0.90 sa gasolina.

Sinasabing sisirit din ng P0.95 hanggang P1 ang halaga ng gaas o kerosene.

Ang paggalaw ng presyo ng langis ay dulot ng pagbabawas sa produksyon ng langis sa Saudi Arabia at iba pang bansa.

Bukod dito, sumadsad din ang imbentaryo ng langis sa Estados Unidos na nakakaaapekto sa presyo nito sa pandaigdigang pamilihan.

Gagawin munang online ang taunang homecoming ng Philippine Military Academy (PMA) ngayong taon.

Paliwanag ni Lt. Col. Ronald Gaboy, head ng Operations section ng PMA, kailangang limitahan ang bilang ng mga dadalo sa event dahil sa banta ng COVID-19 kaya’t isang kinatawan lamang bawat class ang maaaring um-attend.

Sinabi ni Gaboy na inaasahang walong daan o higit pa ang sasali sa homecoming sa ika-12 at ika-13 ng Pebrero.

Gumaling na umano ang kauna-unahang Cebuano Returning Overseas Filipino o ROF na tinamaan ng B.1.1.7 o UK variant ng COVID-19.

Katunayan, ayon sa Department of Health (DOH) sa Central Visayas, nakalabas na ng ospital ang 54-anyos na lalaki na taga-Talisay City.

Sinasabing dumating sa bansa ang pasyente mula Dubai, United Arab Emirates noong ika-18 ng Enero.

Matatandaang tinukoy ng DOH central office nitong Biyernes na ang pang-walong kaso ng B.1.1.7 sa Pilipinas ay mula Liloan, Cebu ngunit patuloy pa umano itong iniimbestigahan ng local office ng ahensya.

Nadakip ng mga awtoridad ang isang hinihinalang political instructor ng New People’s Army (NPA) sa Sison, Surigao del Norte.

Kinilala ng Caraga Police ang suspek na si Jude Laray, 27 taong gulang, at sinasabing instructor ng Sandatahang Yunit Pampropaganda o SYP Kingdom of Guerrilla Front ng NPA at kumikilos sa Agusan del Norte at Butuan.

Ayon kay PRO-13 director Brig. Gen. Romeo Caramat Jr., si Laray ay sangkot umano sa mga kasong pagpatay at pag-atake sa ilang lugar sa Mindanao.

Arestado ang tatlong drug suspects, kabilang ang isang menor de edad, sa ikinasang anti-drug operation sa Baguio City.

Kinilala ni Baguio City Police Office director Col. Allen Rae Co ang mga suspek na sina Michael de Guzman, Cyrille de Guzman, at isang 17-anyos na estudyante.

Ayon kay Co, ang mga naaresto ay pawang mga high-value targets at kabilang sa top 10 illegal drug personalities ng Philippine Drug Enforcement Agency o PDEA sa rehiyon.

Nasabat mula sa mga suspek ang ilang sachets ng umano’y shabu na tinatayang nagkakahalaga ng higit 80,000 pesos; pinatuyong dahon ng marijuana; isang .22 caliber pistol; mga bala, at drug paraphernalia.

Mahaharap ang mga suspek sa kasong paglabag sa Comprehensive Dangerous Drugs Act.

Ipinag-utos ng Sandiganbayan ang pagbawi sa mga ari-arian ni dating Armed Forces of the Philippines (AFP) comptroller Lt. Gen. Jacinto Ligot at ng kanyang pamilya.

Batay sa desisyon ng Fourth Division ng anti-graft court, idineklara nitong ‘unlawfully acquired’ o nakaw ang mga properties ng Pamilya Ligot na nagkakahalaga ng P102 milyon.

Ito’y kinabibilangan ng isang maisan sa Manolo Fortich, Bukidnon; lote sa Tanay, Rizal; condominium units sa Essensa East Forbes sa Taguig at Makati; at mga bahay sa Buena Park at Anaheim sa Amerika.

Matatandaang nasilip ang mga tagong yaman ni Ligot matapos magkasa ng lifestyle investigation ang Office of the Ombudsman kung saan nadiskubre na ang mga properties at assets ng heneral ay hindi tumugma sa kinita niya sa pagtatrabaho sa gobyerno.

Walo pang kaso ng mas nakahahawang COVID-19 variant ang na-detect o natuklasan sa ilang lugar sa Pilipinas.

Dahil dito, umakyat na sa 25 ang bilang ng mga tinamaan ng bagong strain sa bansa.

Ayon sa Department of Health (DOH), tatlo sa mga bagong kaso ng B.1.1.7 variant ay mula sa Bontoc, Mountain Province; dalawa sa La Trinidad, Benguet; at pawang returning overseas Filipinos ang dalawang iba pa.

Sinasabing ang isa pang dinapuan ng bagong variant ay isang 35-anyos na lalaki mula Liloan, Cebu.

Una nang ibinabala ng OCTA Research Group na mayroon nang local transmission sa Cebu City dahil sa paglobo ng infection rate sa naturang lungsod.