Gilbert Perdez

Tinatayang 5,000 kawani ng Philippine General Hospital  (PGH) ang maaaring mabigyan ng bakuna kontra COVID-19.

Ayon kay PGH spokesperson Dr. Jonas Del Rosario, lahat ay makakakuha ng bakuna mula doktor hanggang administrative personnel kung gugustuhin ng mga ito.

Sinabi ni Del Rosario na sa mismong ospital isasagawa ang pagbabakuna kung saan bago ito gagawin ay sasalang muna sa registration at screening ang mga empleyado.

Babantayan ding mabuti ng pamunuan ng ospital ang lahat ng mga kawani para sa posibleng adverse effects na lalabas ilang oras o araw pagkatapos ng vaccination.

Pinagbibitiw sa puwesto ng isang senador ang mga opisyal at mga empleyado ng Land Transportation Office (LTO).

Ito’y bunsod ng kabiguan umano ng mga ito na maipatupad ang Republic Act 11235 o ang Motorcycle Crime Prevention Act.

Ayon kay Sen. Richard Gordon, dahil sa pagkakaantala ng implementasyon ng batas, halos siyam na libo ang napatay ng riding-in-tandem criminals mula 2010 hanggang 2020.

Sa ilalim ng RA 11235, ipinagbabawal ang paggamit ng motorsiklo bilang get-away vehicle sa pamamagitan ng pagpapatupad ng mas malaki, mas madaling mabasa o readable at color-coded number plates upang madaling matukoy ang pagkakilanlan ng nagmamay-ari nito.

Posibleng mapatawan ng karampatang parusa ang mga benepisyaryo ng subsidy programs ng Department of Social Welfare and Development (DSWD) na masasangkot sa illegal activities.

Ito ang bagong polisiya ng DSWD na idinagdag sa Memorandum Circular 38 o ang Guidelines on the Commission of Prohibited Acts by Pantawid Pamilyang Pilipino Program (4P)’s Beneficiaries sa panahon ng state of calamity o national emergency kung saan papatawan ng mabigat na parusa ang mga pasaway na beneficiaries.

Sinasabing ginawa ng ahensya ang hakbang matapos makatanggap ng sumbong ukol sa pagkakasangkot umano sa illegal activities ng ilang benepisyaryo sa ilalim ng Social Amelioration Program (SAP).

Bagama’t walang partikular na tinukoy ang DSWD kung ano ang maaaring parusang kakaharapin ng mga beneficiaries, ipinaliwanag sa memorandum na sa pamamagitan nito’y mauunawaan ng mga ito na galing sa gobyerno ang perang tinatanggap.

Muling nagpaalala ang Korte Suprema sa lahat ng mga dadalo sa pagpapatuloy ng oral arguments ukol sa Anti-Terrorism Act of 2020 (ATA) na kailangang negatibo ang mga ito sa COVID-19 test.

Sa liham na ipinadala ni Clerk of Court Edgar Aricheta sa lahat ng mga may kinalaman sa usapin, binanggit na dapat muling magpakita ang mga ito ng negative Covid-19 RT-PCR sa loob ng pitumpu’t dalawang oras bago ang proceedings.

Sinabi ni Aricheta na bahagi pa rin ito ng mahigpit na safety measures laban sa impeksiyon.

Matatandaang ipinatupad din ang katulad na polisiya sa nakaraang oral arguments noong ikalawa ng Pebrero.

Puwedeng tumulong sa national vaccination rollout ng gobyerno ang mga guro.

Ito, ayon kay Education Secretary Leonor Briones, ay sa pamamagitan ng pagpapalaganap ng impormasyon hinggil sa bakuna.

Gayunman, nilinaw ni Briones na limitado lamang sa information dissemination ang maaaring maging ambag ng mga titser sa programa dahil ang pag-administer ng bakuna ay nangangailangan ng medical training.

Matatandaang inihayag ni Health Undersecretary Maria Rosario Vergeire na planong isalang sa training ng Department of Health ang mga pharmacists at midwives upang makatulong sa COVID-19 vaccination program ng pamahalaan.

Magsasagawa ng “online voting experiment” ang Commission on Elections (Comelec) para sa mga overseas Filipino workers (OFW) sa mga susunod na buwan.

Ayon kay Comelec spokesperson James Jimenez, sa pamamagitan nito ay malalaman kung uubra ang digital polling scheme para mahimok ang mga botante sa ibayong dagat na lumahok sa eleksiyon.

Sinabi ni Jimenez na naghahanap pa lamang sila ng mga puwedeng sumali sa online voting dry run na idaraos sa Marso o Abril.

Magugunitang sa 1.65 million registered overseas Filipino voters, tatlong daang libo lamang ang bumoto noong 2019 midterm elections.