Gilbert Perdez

Nanawagan sa Manila Electric Company (MERALCO) ang isang senador na magpakita pa ng ibayong malasakit at pag-aralan ang posibleng pagpapalawig pa ng kanilang ‘no-disconnection policy’ para sa mga mahihirap na consumers.

Ginawa ni Sen. Bong Go ang pahayag sa gitna ng pangamba ng libo-libong electric consumers ng Meralco na baka putulan sila ng kuryente dahil problemado pa rin sila sa kanilang bayarin.

Giit ni Go, ilang buwan nang pinagbabawalan ang karamihan na makapagtrabaho at maghanapbuhay at dahil walang sapat na income ay nahihirapan silang magbayad ng kuryente.

Matatandaang pumalag din ang maraming customers ng Maynilad sa Muntinlupa City matapos putulan ng suplay ng tubig dahil sa hindi nabayarang water bills.

Agad na nasawi ang isang babaeng health worker matapos pagsasaksakin ng kanyang kinakasama sa San Jorge, Samar.

Kinilala ng Eastern Visayas police ang biktima na si Jennifer Santiago, 40 taong gulang, at residente ng Barangay Mo-boob.

Tinutugis naman ng pulisya ang suspek na si Liberato Cabubas, 51 anyos, at magsasaka.

Batay sa imbestigasyon, lasing umano si Cabubas nang bigla na lamang nitong pinagsasaksak ang biktima na nadala pa sa ospital ngunit binawian din ng buhay.

Nasugatan naman sa insidente ang dalawang guro at isa pang magsasaka na patuloy na nilalapatan ng lunas sa pagamutan.

Walang nadiskubreng bagong variant ng COVID-19 sa 48 samples na nai-proseso ng Philippine Genome Center (PGC).

Ayon sa Department Of Health (DOH), sa nasabing bilang, naitala ang 23 coronavirus cases mula sa National Capital Region na karamihan ay galing Quezon City; 19 sa Calabarzon; apat sa Cordillera Region; at dalawa naman ang Returning Overseas Filipinos o ROFs.

Sinasabing nakarekober na ang pitong pasyente habang ang iba naman ay wala nang sintomas o itinuturing na lamang na mild cases.

Nabatid na may 48 samples pa ang isasalang sa genomic sequencing ngayong linggo, kabilang ang mula sa mga targeted areas.

Bagama’t wala pang nade-detect na UK variant ng COVID-19 sa ibang lugar, ibinabala ng DOH na dapat pa ring manatili o sumunod ang lahat sa minimum public health standards.

Pinuri ni vaccine Czar Carlito Galvez Jr. ang World Health Organization (WHO) matapos ihayag na ipapadala na sa Pilipinas sa unang quarter ng taon ang COVID-19 vaccines na gawa ng Pfizer-BioNTech at AstraZeneca.

Ayon kay Galvez, nakatanggap sila ng liham mula kay COVAX facility managing director Aurélia Nguyen na nagsasaad na makukuha ng bansa ang 9,407,400 doses na bakuna kontra coronavirus mula sa dalawang pharmaceutical makers.

Sinabi ng kalihim na batay pa rin sa sulat ni Nguyen, gagawin ang  initial delivery sa kalagitnaan o katapusan ng Pebrero ngayong taon.

Aniya, patunay lamang ito na sa ilalim ng COVAX facility ay magiging patas ang pamamahagi ng mga bakuna sa buong mundo na akma rin sa prinsipyo ng administrasyong Duterte na “walang maiiwan, walang iwanan.”

Tinatayang isang milyong pisong halaga ng mga peke o counterfeit items ang nasabat ng Bureau of Customs (BOC) sa Maynila.

Ayon kay Customs Commissioner Rey Leonardo Guerrero, natuklasan nila sa isinagawang inspeksiyon sa Manila International Container Port (MICP) ang mga huwad na bag na may tatak na Louis Vuitton, Gucci at Chanel.

Maging ang mga hindi rehistradong face shields, face masks, fake medicines, at sabon ay kinumpiska rin ng BOC.

Sinasabing bahagi pa rin ito ng mas pinaigting na kampanya laban sa mga counterfeit at unauthorized goods.

Libre na ang mandatory occupational health and safety training sa mga lugar ng trabaho o workplaces simula ngayong taon.

Ito’y matapos lagdaan ni Labor Secretary Silvestre Bello III ang isang direktiba na naglalayong itaguyod ang kalusugan at kaligtasan sa trabaho at paluwagin ang pasanin ng mga negosyante ngayong panahon ng pandemya.

Matatandaang naisabatas ang Republic Act No. 11058 o Occupational Safety and Health Standards Law noong 2018 kung saan inoobliga nito ang mga employers na ipatupad ang occupational safety and health standards para matiyak ang kalusugan at kaligtasan ng mga manggagawa.