Didistansya muna sa social media ang singer na si Kyla.
Kuwento ng singer, pansamantala siyang nag-delete ng kanyang Instagram at Facebook accounts dahil sa naranasan niyang anxiety.
Aminado naman si Kyla na hindi niya kayang tumagal nang walang internet o social media lalo pa’t nakatutulong ito para manatiling connected sa mga kaibigan at pamilya.
Halos sagad na umano ang kapasidad ng mga ospital sa Portugal.
Ayon sa Health Ministry, kakaunti na lamang ang mga bakante nilang hospital beds sa mga Intensive Care Units o ICUs na inilatag para sa mga kaso ng COVID-19.
Sinasabing umaabot na sa 16,000 ang bilang ng mga naitatalang kaso ng coronavirus sa Portugal habang halos 300 naman ang namamatay kada araw.
Magiging libre na rin ang hemodialysis sa Philippine General Hospital (PGH) para sa mga mahihirap na pasyente.
Ayon kay Pitmaster Foundation Inc., Executive Director Caroline Cruz, good news ito para sa mga sumasailalim sa dialysis treatment dahil simula ngayong araw ay maaari na itong ma-avail nang libre sa PGH.
Sinabi ni Cruz na nakausap na nila ang mga opisyal ng PGH at nagpirmahan na ng Memorandum Of Agreement o MOA ang dalawang panig hinggil sa pagkakaloob ng libreng dialysis treatment para sa mga nangangailangang pasyente.
Ayon kay Cruz, napagkasunduan din ng Pitmaster at PGH na babayaran ng foundation ang ospital ng nasa P4,000 hanggang P5,000 per patient sa bawat sesyon.
Ang PGH ay isa lamang sa mga government hospitals sa Metro Manila na may libreng dialysis na sinasagot ng Pitmaster.
Mananatili sa ilalim ng Enhanced Community Quarantine (ECQ) ang lungsod ng Tuguegarao bunsod ng patuloy na pagtaas ng kaso ng COVID-19 sa lungsod.
Ito’y makaraang ipag-utos ni Mayor Jefferson Soriano na palawigin pa ng limang araw ang ECQ sa kanilang lugar.
Dahil dito, extended hanggang Pebrero 3 ang mahigpit na lockdown sa siyudad.
Sarado naman ang City Treasurer’s Office sanhi ng isinasagawang disinfection sa nasabing tanggapan.
Walong drug suspects ang nahulog sa kamay ng mga awtoridad sa serye ng anti-illegal drug operations sa Bulacan.
Kinilala ni Bulacan Police Provincial Director Col. Lawrence Cajipe ang mga naaresto na sina Rolando Pedro Jr., Joselito Javier, Alberto Climaco, Jomar Salapare, Alexander Rafael, Lourdes Mamita, Elmer Bernico at Reynaldo Austria.
Ayon kay Cajipe, nadakip ang mga drug suspects sa Angat, Baliwag, Hagonoy, Marilao, at Malolos.
Nabatid na 15 sachets ng hinihinalaang shabu ang nasabat laban sa mga suspek na ngayo’y nahaharap sa kasong paglabag sa Comprehensive Dangerous Drugs Act of 2002.
Nakikiramay ang Malacañang sa pagpanaw ni Presidential Anti-Corruption Commission (PACC) Chairperson Dante Jimenez sa edad na 68.
Sa isang post sa Facebook, kinumpirma naman ni Volunteers Against Crime and Corruption President Arsenio Evangelista ang pagyao ni Jimenez dulot ng aortic aneurysm.
Pinuri naman ni Presidential Spokesperson Harry Roque dahil sa matapang nitong adbokasiya kontra krimen at katiwalian.
Matatandaang itinalaga ni Pangulong Rodrigo Duterte si Jimenez bilang PACC chair noong January 2018.
Si Jimenez ay Founding Chairperson din ng VACC.
Ipinasara ng lokal na pamahalaan ng Valenzuela ang isang klinika matapos matuklasang nagsasagawa ito ng RT-PCR o swab tests kahit wala umanong kaukulang lisensya.
Ayon sa Business Permits and Licensing Office (BPLO), nakatanggap sila ng sumbong ukol sa operasyon ng Bestcare Medical Clinic and Diagnostic Laboratory kung saan sinasabing naglalabas umano ito ng mga pekeng test results.
Nabatid na walang accreditation mula sa Department of Health (DOH) ang nasabing klinika kaya’t hindi ito awtorisadong magsagawa ng COVID-19 test.
Hindi kailangang magsuot ng double face mask ang publiko sa kabila ng banta ng United Kingdom variant ng COVID-19 sa bansa.
Ito’y dahil ayon kay Health Undersecretary Maria Rosario Vergeire, hindi pa naman napatutunayang mabisa ang dobleng face mask laban sa virus.
Giit ni Vergeire, ang tanging epektibong proteksiyon sa ngayon laban sa impeksiyon ay ang pagsusuot ng face mask, face shield at physical distancing.
Mas mapapadali rin aniya ang pagpuksa sa COVID-19 kung lahat ng mamamayan ay susunod sa health standards.
Tuluyan nang nagbitiw sa pwesto ang Prime Minister ng Democratic Republic of the Congo na si Ilunga Ilunkamba.
Ito’y matapos mahalal ang bagong Pangulo ng kanilang bansa na si Felix Tshisekedi.
Ang pagkalas ni Ilunga sa administrasyon ay tila courtesy resignation na rin dahil kaalyado niya ang dating Presidente na si Joseph Kabila at kalaban niya sa partido ang bagong halal na punong ehekutibo.
Sinasabing ito rin ang magbibigay-daan sa bagong punong ministro na itatalaga ni Tshisekedi.
Balik-showbiz ang aktres na si Cristina Gonzales makalipas ang 15 taon.
Ayon kay Gonzales, mas kilala bilang “Kring Kring” sa entertainment industry, nakabase siya ngayon sa Maynila kaya’t nais siyang sumabak muli sa pag-arte.
Si Gonzales na kasal kay Tacloban City Mayor Alfred Romualdez ay naging konsehal ng lungsod sa loob ng siyam na taon o mula 2007 hanggang 2016 at nahalal naman bilang alkalde mula 2016 hanggang 2019.
Nabatid na kalalagda lamang ng aktres ng kontrata sa Viva Artists Agency.