Gilbert Perdez

Hindi maaaring pakawalan ng gobyerno si Baguio City Mayor Benjamin Magalong bilang contact tracing czar dahil subok na ang kakayahan nito.

Ito ang inihayag ni Chief Presidential Legal Counsel Salvador Panelo kasunod ng pagbibitiw ni Magalong na tinanggihan naman ng Malacañang.

Sinabi ni Panelo na mahalaga ang ginagampanang papel ni Magalong bilang contact tracing czar sa gitna ng mas pinaigting na Covid-19 response ng pamahalaan.

Matatandaang nagsumite ng kanyang resignation si Magalong matapos batikusin sa kanyang pagdalo sa birthday party ng celebrity na si Tim Yap.

Tiniyak ng Food and Drug Administration (FDA) na sinusuri nitong mabuti ang bisa at kalidad ng mga bakuna kontra COVID-19.

Ayon kay FDA Director-General Eric Domingo, lahat ng mga tuturukan ng bakuna ay sasalang sa mahigpit na assessment at screening ng mga eksperto.

Sinabi pa ng opisyal na hindi naman siya papayag na ibigay sa tao ang COVID-19 vaccine na ayaw niyang iturok sa kanyang sarili.

Dahil dito, muling nanawagan sa publiko si Domingo na huwag mabahala sa kaligtasan at bisa ng mga bakuna kontra coronavirus.

Muling tiniyak ng Philippine Statistics Authority (PSA) na may nakalatag nang security measures para sa implementasyon ng Philippine Identification System (PhilSys) project.

Ayon kay National Statistician Dennis Mapa, ito’y upang maprotektahan ang data privacy ng mga registrants.

Sinabi ni Mapa na gagamit ang PSA ng kumplikadong complex privacy-protective system kaya’t mananatiling pribado at ligtas ang mga datos na makukuha mula sa mamamayan.

Itinalaga ng Korte Suprema ang retiradong mahistrado na si Francis Jardeleza bilang ‘amicus curiae’ o friend of the court

kaugnay ng mga petisyon na kumukuwestiyon sa legalidad ng Republic Act 11479 o Anti-Terrorism Act of 2020.

Batay sa tatlong pahinang resolusyon ng mataas na hukuman, binanggit ni SC Clerk of Court Edgar Aricheta na nakaatang sa balikat ni Jardeleza ang pagpapaliwanag tungkol sa nasabing batas.

Matatandaang itinalaga ni dating Pangulong Noynoy Aquino si Jardeleza bilang Solicitor General noong 2012 bago napunta sa Supreme Court noong 2014.

Sa Martes, Pebrero a-dos, ay aarangkada na ang oral arguments ng Kataas-taasang Hukuman tungkol sa kontrobersiyal na batas.

Aarangkada na sa Martes, ikalawa ng Pebrero, ang pagdinig ng House Committee on Agriculture and Food kaugnay ng pagtaas ng presyo ng karne, gulay at iba pang pangunahing bilihin.

Ayon kay Committee chair Mark Enverga, susuriin ng komite ang mga datos sa kasalukuyang ‘supply and demand’ ng lahat ng agricultural goods at hahanap ng solusyon sa problema ng mga suppliers at consumers.

Matatandaang naghain ng resolusyon si Taguig City Rep. Alan Peter Cayetano kung saan nanawagan ito sa liderato ng Kamara na pinamumunuan ni Speaker Lord Allan Velasco na gumawa ng hakbang sa pagtaas ng presyo ng bilihin.