Gilbert Perdez

Patay ang isang dating vice mayor ng Masantol, Pampanga at maging ang isa pang kasamahan nito matapos pagbabarilin ng hindi pa nakikilalang mga salarin sa Angeles City.

Kinilala ang mga nasawi na sina Jorge Bustos III at Erick Cariaga na dating bise-alkalde ng Masantol.

Kuwento ng guwardiyang si John Maverick Cunanan, nakarinig siya ng dalawang magkasunod na putok ng baril at nakita na lang niya ang dalawa na duguan at wala nang buhay.

Inaalam pa ang motibo at pagkakakilanlan ng mga salarin habang nire-review din ng pulisya ang mga kuha ng CCTV upang makatulong sa kanilang imbestigasyon.

Planong isailalim sa general community quarantine (GCQ) ang Cordillera Administrative Region (CAR) sa susunod na buwan.

Ayon sa Department of Health-CAR, ito’y upang mapigilan ang pagkalat ng coronavirus sa rehiyon na kasalukuyang nasa modified GCQ.

Sinabi ni DOH-CAR regional director Dr. Ruby Constantino na nagpositibo sa UK variant ang labintatlo sa 326 specimen samples na isinumite nila sa Philippine Genome Center.

Paliwanag ni Constantino, balak nilang ituloy ang plano kapag naayos na ang sapat na bilang ng COVID-19 health facilities sa kanilang lugar.

Matatandaang ibinunyag ni DOH Secretary Francisco Duque III na nadiskubre ang labindalawang UK variant samples sa Mountain Province habang isa naman sa La Trinidad, Benguet.

Nagsauli ng natagpuang bag na may lamang malaking halaga ng pera ang isang empleyado ng Department of Public Works and Highways (DPWH) sa Caraga region.

Dahil dito, hinangaan ng pamunuan ng DPWH si Bernardo dela Cruz na higit 20 taon nang nagtatrabaho sa ahensya bilang survey aide.

Kuwento ni Dela Cruz, galing siya ng palengke nang makita niya ang bag sa gilid ng daan at laking gulat niya nang makita ang bulto-bultong pera na umabot sa P360,000.

Agad niya itong ibinigay sa administrative division chief ng ahensya na naging daan upang matagumpay na maisauli ang pera.

Labis na ikinatuwa ng liderato ng DPWH-Caraga ang ginawa ni dela Cruz dahil sa kabila ng hirap ng buhay at nararanasang krisis dulot ng pandemya ay hindi nabulag ang kanilang kawani at hindi ito nagdalawang-isip na isauli ang naturang bag.

Kasama umano ang anak ni dating Marawi City Mayor Fahad “Pre” Salic sa apat na nanloob sa isang jewelry store sa lungsod kamakailan.

Ayon kay S/Sgt. Amador Rosales, imbestigador ng Marawi PNP, si Mahid Salic ay itinuro ng store owner na sa Noaim Mohammad Macaraya na siyang nagtutok ng baril sa kanya habang binabasag ng tatlo pang suspek ang mga estante.

Sa imbestigasyon, pinasok ng mga armadong lalaki ang Layl-Haya jewelry shop sa Barangay Sugod at tinangay ang mahigit dalawang milyong pisong halaga ng mga alahas.

Natagpuan naman ang getaway vehicle sa isang residential compound na sinasabing pag-aari ng magulang ng misis ni Mahid.

Sinampahan na ng kasong robbery si Mahid at tatlo pang kasabwat ng suspek.

Nasungkit ng nag-iisang bettor mula Dasmariñas, Cavite ang  P20 milyong na jackpot price sa lotto.

Ayon kay Philippine Charity Sweepstakes Office (PCSO) general manager Royina Garma, natumbok ng hindi pinangalanang mananaya ang six-digit winning combination na 05-02-12-26-28-04 sa regular Lotto 6/42 draw.

Limampu’t anim (56) pang bettors ang nakahula ng lima sa anim na kumbinasyon kaya’t makakatanggap ang mga ito ng 24,000 pesos bawat isa.

Ang Lotto 6/42 draw ay binobola tuwing Martes, Huwebes, at Sabado.