Pasok na sa final ng ITF Rafa Nadal Academy World Tennis Tour tournament si Filipina tennis Phenom Alex Eala.
Ito’y makaraang ilampaso ng dalagitang manlalaro si Adithya Karunaratne ng Hongkong sa score na 6-3, 6-4 sa kanilang laro na ginanap sa Manacor, Spain.
Bago nakapasok sa semifinals, pinadapa ng Pinay si Carole Monnet ng France.
Samantala, makakaharap ng 15-anyos na Pinay tennis star si Yvonne Cavalle-Reimers ng Spain sa final ng naturang torneo.
Patay ang isang miyembro umano ng Communist Party of the Philippines-New People’s Army (CPP-NPA) makaraang maka-engkuwentro ng mga pulis sa Barangay Dulao, Bago City, Negros Occidental.
Kinilala ang suspek na si Emmanuel Sampani na sinasabing nasawi nang manlaban sa mga ahente ng PNP Anti-Kidnapping Group (AKG).
Narekober sa pinangyarihan ng insidente ang tatlong baril, isang hand-held radio, cellphone, at wallet na naglalaman ng maraming identification cards.
Nagnegatibo na sa UK COVID-19 variant ang isang returning overseas Filipino (ROF) na taga-Iloilo na una nang nagpositibo sa virus.
Ayon sa Department of Health (DOH), ang 64-anyos na Ilongga ay dumating sa bansa noong Dec. 29, 2020 mula Lebanon sakay ng Philippine Airlines flight PR 8661.
Na-isolate ito sa San Juan City at nakalabas noong Enero 9.
Sinabi naman ni Iloilo provincial administrator Suzette Mamon na dumating sa lalawigan ang nasabing OFW noong Enero 10 at pinayagan na itong umuwi ng kanilang bahay matapos magnegatibo sa ikalawang swab test.
Inanunsiyo ng Department of the Interior and Local Government (DILG) na pinalawig pa nito ang deadline para sa Road Clearing Operation 2.0 (RCO 2.0) na isinasagawa ng mga Local Government Units (LGUs) sa bansa.
Ayon kay DILG Undersecretary at Spokesperson Jonathan Malaya, pinagbigyan nila ang hirit ng mga lokal na pamahalaan kaya’t sa halip na nitong Enero 22 ay hanggang Pebrero 15 na lamang ito at hanggang Marso 2,2021 naman ang validation.
Sinasabing nanawagan ang ilang LGUs na bigyan pa sila ng mahaba-habang panahon para maalis ang mga sagabal sa kalsada sa kani-kanilang nasasakupan sa gitna ng paghahanda nila sa vaccination program.
Magugunitang inatasan ng DILG ang mga lokal na pamahalaan na tumalima sa kautusan ni Pangulong Rodrigo Duterte na alisin ang mga illegal obstructions sa mga kalsada at ibalik sa mga mamamayan ang mga kalsada at mga pangunahing lansangan.
Plano ni Pangulong Rodrigo Duterte na bumili ng mga brand new na helicopter para sa militar kasunod ng malagim na chopper crash na ikinasawi ng pitong indibidwal sa Bukidnon.
Sa kanyang pagbisita sa Kuta Heneral Teodulfo Bautista Headquarters sa Sulu, sinabi ni Duterte na panahon na para palitan ang Huey choppers na matagal nang ginagamit ng mga tropa ng pamahalaan.
Ayon sa Pangulo, pitong bagong helicopter ang balak nitong bilhin upang hindi na maulit ang mga aksidente na dulot ng lumang sasakyang panghimpapawid.
Matatandaang sinabi rin ni Sen. Juan Miguel Zubiri na naiwasan sana ang ilang aksidente kung naging seryoso ang modernisasyon sa hanay ng Armed Forces of the Philippines (AFP).
Tinatayang 111 market vendors ang pinadalhan ng notices of violation ng lokal na pamahalaan ng Quezon City dahil sa overpricing simula nitong Enero 1.
Ayon kay Procopio Lipana, head of operations ng QC Market Development and Administration Department o MDAD, lumalabas na malayo sa Suggested Retail Price o SRP ang halaga ng mga produkto ng ilang vendors.
Sinasabing araw-araw nang mino-monitor ng Quezon City LGU ang presyo ng mga pangunahing bilihin sa lungsod upang matiyak na hindi lagpas sa SRP ang mga ito.
Agad namang inendorso sa Department of Agriculture (DA) ang kaso ng mga vendors dahil ito ang may hurisdiksiyon sa naturang usapin.
Natanggap na ng Myanmar ang 1.5 milyong doses ng COVID-19 vaccine mula India.
Inaasahang maituturok ang bakuna sa 750,000 mamamayan.
Sinasabing milyun-milyong doses ng bakuna ang ido-donate ng India sa iba pang mga bansa sa Asya bilang suporta nito sa laban kontra COVID-19.
Tila reunion ang naganap nang magkita muli ang mga dating miyembro ng K-Pop group na 2NE1.
Sa Twitter, nag-post ng larawan si dating Kapamilya star Sandara Park kung saan nakipag-selfie siya sa iba pang dating kasapi ng grupo na sina CL, Bom, at Minzy.
Binanggit ni Park sa post na ito ang ika-12 taong kaarawan o anibersaryo ng 2NE1.
Matatandaang nabuwag ang 2NE1 noon pang 2016 matapos mamayagpag ng pitong taon.
Pinadapa ng Indiana Pacers ang Orlando Magic sa score na 120-118 sa kanilang laro sa NBA.
Si Malcolm Brogdon ang nanguna sa Pacers sa pamamagitan ng kanyang 23 points habang nagdagdag si Jeremy Lamb ng 22 points.
Samantala, humakot naman si Evan Fournier ng 26 points para sa Magic pero hindi sapat iyon para maipanalo ang laban ng kanyang koponan.
Ibinunyag ni Bontoc, Mountain Province Mayor Franklin Odsey na may labingdalawang bagong kaso ng UK Variant na natuklasan sa kanilang bayan.
Ayon kay Odsey, positibo sa bagong uri ng virus ang labingdalawa sa tatlumpu’t limang specimens o samples mula sa COVID-19 positive cases sa Bontoc.
Dahil dito, nananawagan si Odsey sa mga residente na sumunod sa basic health protocols habang nagpapatuloy ang lockdown sa kanilang lugar.
Tiniyak din ng alkalde na ginagawa nito ang lahat ng kanilang makakaya upang mapigilan ang pagkalat ng impeksiyon.
“We will update you as soon as possible as to intensified measures that the MIATF would be undertaking. Official statements and updates shall be released by DOH, PLGU and MLGU. Let us cooperate and let us keep safe. Let us all be part of the solution. Together, we shall overcome. We work as One, We heal as One!,” ani Bontoc mayor.