BIBIDA sa pagbubukas ng “Project Runway” Season 19 sa darating na Oktubre ang dalawang Filipino designers.
Sina Kenneth Barlis ng San Diego at Darren Apolonio ng New York ay kasama sa labing-anim na contestants na tuturuan ng tanyag na designer na si Christian Siriano sa kompetisyon.
Kabilang naman sa mga susuri o huhusga sa iba’t ibang disenyo ng mga Pinoy ay sina regular stars Nina Garcia, Brandon Maxwell, at Elaine Welteroth.
SUGATAN ang nasa 41 Palestinians sa pamamaril ng mga Israelis sa Gaza.
Maliban sa mga Palestino, isang Israeli policeman din ang kritikal ang kalagayan sa pagsiklab ng karahasan doon.
Sinugod umano ng Israeli military ang daan-daang demonstrador na gustong sumampa sa bakod na itinayo nito sa northern Gaza.
Nabatid na bukod sa tear gas ay pinagbabaril din ng mga sundalo ang mga nagpoprotesta sa naturang lugar.
NADAGDAGAN ng pito ang bilang ng mga sibilyan na nasawi sa kaguluhan malapit sa Kabul airport sa Afghanistan.
Ito ang inanunsiyo ng British defense ministry sa harap ng pagsisiksikan at papupumulit ng libo-libong mamamayan na sumakay sa mga eroplano para lisanin ang kanilang bansa.
Samantala, aminado naman ang Estados Unidos at mga kaalyadong bansa na hirap pa rin sila sa ginagawa nilang evacuation efforts kasunod ng pagkubkob ng Taliban sa buong Afghanistan.
NAPANATILI pa rin ang tamang-tamang temperatura para sa vaccine storage sa lalawigan ng Cebu sa kabila ng naganap na power interruption nitong weekend.
Ito ang tiniyak ng Department of Health-Central Visayas matapos tamaan ng tatlong oras na power blackout ang iba’t ibang lugar sa probinsya, kabilang ang mga lungsod ng Cebu, Mandaue, Lapu-Lapu at maging ang Bohol.
Hinimok naman ni Dr. Jaime Bernadas ng DOH-Central Visayas ang lahat ng mga vaccine centers sa lalawigan na magsagawa ng regular na temperature monitoring sa mga imbakan ng bakuna at i-review ang kanilang contingency plans o ang mga planong paghahanda laban sa sakuna.
MALAPIT nang matapos ng National Bureau of Investigation o NBI ang isinasagawa nitong imbestigasyon sa madugong shootout sa pagitan ng mga pulis at mga anti-drug agents sa Quezon City.
Katunayan, ayon kay Justice Secretary Menardo Guevarra, inaasahan niyang maisusumite na sa Department of Justice o DOJ ang final report ng kawanihan sa katapusan ng buwan.
Aniya, hinihintay pa ng NBI ang resulta ng digital forensic examination sa mga cellphone na ginamit ng mga operatibang sangkot sa insidente.
Magugunitang apat ang nasawi sa umano’y ‘misencounter’ ng mga pulis at mga ahente ng PDEA sa Commonwealth Avenue noong February 24, 2021.
DEAD on arrival sa ospital ang isang lalaki matapos barilin ng kanyang pamangkin na nag-ugat sa alitan sa pagputol ng puno sa Sapian, Capiz.
Ayon sa Sapian police, pinutol ni alyas “Jack” ang puno ng niyog itinanim ng magulang ni alyas “Dodong” kaya’t nagkaroon ng pagtatalo ang mag-tito.
Sa imbestigasyon, inabangan umano ni Jack si Dodong habang pauwi at tinaga pero nakabunot ito ng baril bago pinutukan ang biktima na siyang ikinasawi nito.
Nasa custody na ng pulisya ang suspek at nahaharap sa kaukulang kaso.
INANUNSIYO ng pamahalaang lungsod ng Tuguegarao na ‘extended’ ng isa pang linggo ang enhanced community quarantine o ECQ sa lugar.
Ayon sa LGU, dahil hindi gumanda ang COVID-19 situation sa siyudad matapos ang sampung araw na ECQ mula Agosto 12 hanggang Agosto 21 ay palalawigin pa ito ng pitong araw.
Nabatid na sa kabuuan ay mayroon nang mahigit isang libong aktibong kaso sa nasabing lungsod.
KALABOSO ang isang aktibong pulis matapos ireklamo ng pangingikil sa pamilya ng isang nahuling drug suspect sa Zamboanga City.
Kinilala ng PNP Integrity Monitoring and Enforcement Group o IMEG ang suspek na si Police Corporal Alexis Garcia, nakatalaga bilang imbestigador sa Drug Enforcement Team Police Station 11 ng City Police Office.
Sa imbestigasyon, kinikikilan umano ni Garcia ng halagang 120,000 pesos ang pamilya ng isang drug suspect kapalit ng pagbasura sa kaso nito at pagtiyak na hindi ito maililipat sa city jail.
Sasampahan ng mga kasong kriminal at administratibo at namemeligro pang masibak sa serbisyo ang naturang pulis.
MANANATILING kampeon sa puso ng mga Pilipino si Sen. Manny Pacquiao kahit bigo itong mabawi ang kanyang World Boxing Association o WBA super welterweight belt.
Ito ang inihayag ni Presidential Spokesperson Harry Roque matapos matalo si Pacquiao sa pamamagitan ng unanimous decision sa kamao ni Cuban Yordenis Ugas sa kanilang laban sa Las Vegas, Nevada.
Ayon kay Roque, bagama’t hindi nagtagumpay si Pacquiao ay hindi naman nabawasan ang karangalan na naibigay ng Pambansang Kamao sa bansa sa ilang taon nitong pamamayagpag sa mundo ng boksing.
TINIYAK ng Department of Health na may mahigpit itong koordinasyon sa Department of Budget and Management o DBM hinggil sa paglalabas ng pondo para sa mga benepisyo ng mga health care workers at sa pagbili ng mga mahahalagang supplies.
Ginawa ng DOH ang pahayag matapos mapaulat na hindi pa rin natatanggap ng mga medical workers ang kanilang Special Risk Allowance o SRA.
Matatandaang inihayag ni DOH Undersecretary Leopoldo Vega na nai-release na nila ang 8.8 billion pesos na pondo para sa SRA ng mga health workers sa ilang public at private institutions.
Gayunman, inamin ng DOH na mahalagang mapaigting pa ang ugnayan o koordinasyon ng mga kinauukulang ahensya upang mabilis na maihahatid sa mga medical frontliners ang kanilang mga benepisyo.