Gilbert Perdez

SUMAMPA na sa higit 1.6 milyon ang bilang ng mga gumaling sa coronavirus disease 2019 o COVID-19 sa Pilipinas.

Ito’y makaraang makapagtala ang Department of Health o DOH ng halos labing-apat na libong recoveries (13,952) sa loob lamang ng isang araw.

Batay sa pinakabagong case bulletin ng DOH, nagkaroon naman ng higit labing-anim na libong impeksiyon (16,044) kaya’t nasa 1.8 milyon na ang total COVID-9 cases.

Dahil naman sa pagpanaw ng dalawang daan at labinlimang (215) pasyente, sumirit na sa higit 31,000 ang bilang ng mga nasawi sa buong kapuluan.

INATASAN ng Metropolitan Waterworks and Sewerage System (MWSS) ang Maynilad at Manila Water na palawigin ang kanilang “no disconnection policy”.

Ito’y makaraang isailalim sa mas maluwag na modified enhanced community quarantine (MECQ) ang Metro Manila at Laguna sa harap ng tuloy-tuloy na pagsirit ng mga kaso ng COVID-19.

Dahil dito, sa susunod na buwan na maglalabas ng notices of disconnection ang Manila Water at Maynila para sa kanilang mga customer. Magpapatuloy pa rin naman anila ang pagbabasa ng metro at pag-i-isyu ng bill.

Papayagan nang pumasok ng Hong Kong simula sa susunod na linggo ang mga bakunadong Filipino workers basta’t makakapagpakita sila ng vaccination certificate na inisyu ng Bureau of Quarantine o BOQ.

Ayon kay Labor Secretary Silvestre Bello III, kabilang sa mga magbebenepisyo rito ay ang tinatayang tatlong libong OFWs na matagal nang naghihintay ng kanilang deployment. Gayunman, nilinaw ni Bello na isasailalim pa rin sa quarantine ang mga manggagawang Pinoy at sasagutin ng kanilang mga employer ang gastos dito.

Pinabulaanan ni Pangulong Rodrigo Duterte na may korapsiyon sa ginawang pagbili ng gobyerno ng mga mask at face shield na kinukuwestiyon ng mga mambabatas.

Ayon sa Pangulo, ang mga items na tinukoy ay binili mula Marso hanggang Abril 2020 kung saan mataas ang demand at halaga ng mga medical supplies.

Inamin din ng presidente na siya mismo ang nag-utos kay Health Secretary Francisco Duque III na ituloy ang procurement ng mga nasabing supplies.

Pansamantalang suspendido ang Obstetrics and Gynecology (OB-GYN) services sa Pasay City General Hospital (PCGH) hanggang Agosto 26.

Ayon sa pamunuan ng PCGH, ginawa ang hakbang upang matutukan ang dumaraming bilang ng mga medical officers na tinatamaan ng Coronavirus sa kanilang ospital.

Matatandaang inihayag ng Department of Health (DOH) na posibleng may community transmission ng mas nakakahawang Delta variant sa bansa.

Inihayag ng Metropolitan Manila Development Authority (MMDA) na pinapayagan na ang individual outdoor exercises sa National Capital Region (NCR) sa ilalim ng mas maluwag na Modified Enhanced Community Quarantine (MECQ).

Ayon kay MMDA Chairman Benhur Abalos, batay kasi sa IATF omnibus guidelines ay maaaring gumawa ng nasabing aktibidad ang mga tao habang umiiral ang MECQ.

Ngunit nilinaw ni Abalos na bagama’t pupuwede na ang outdoor exercises sa NCR ay depende pa rin ito sa mga lokal na pamahalaan kung ipatutupad nila ang eksaktong mga limitasyon o magtatakda ng oras para sa mga naturang aktibidad.

Nakapagtala ang Department of Health (DOH) ng halos 16,000 na COVID-19 recoveries sa loob lamang ng isang araw.

Dahil dito, sumampa na sa higit 1.6-M ang bilang ng mga gumaling sa sakit.

Nagkaroon naman ng 16,694 na bagong impeksiyon habang 400 pang pasyente ang pumanaw dahil sa Coronavirus.

Sa kasalukuyan, higit 1.8-M na ang total COVID-19 cases sa buong kapuluan.

Balik-operasyon na simula bukas, ika-23 ng Agosto, ang mga consular offices sa Metro Manila.

Ito ang inanunsiyo ng Department of Foreign Affairs (DFA) kasunod ng pagsasailalim sa modified enhanced community quarantine (MECQ) sa rehiyon.

Ayon sa DFA, kabilang sa mga magbubukas muli ay ang Temporary Off-Site Passport Services facilities (TOPS).

Nanawagan naman ang ahensya sa mga aplikanteng may appointment sa pagitan ng Agosto 23 hanggang 31 na sundin ang kanilang schedule, maliban lamang kung makakatanggap sila ng bagong abiso.

Ang mga may appointment naman na pasok sa dalawang linggong ECQ o mula Agosto 6 hanggang 20 ay pinapayuhang sundin ang kanilang bagong appointment schedule o location na nakalagay sa mga natanggap nilang email.