Gilbert Perdez

Nadagdagan pa ng 40 ang bilang ng mga kababayan nating nakalikas mula sa gulong dulot ng Taliban sa Afghanistan.

Ayon sa Department of Foreign Affairs (DFA), sa tulong ng Philippine Embassy sa Islamabad ay nakalikas mula Kabul ang tatlumpung Pilipino habang sa magkakaibang destinasyon naman ang sampung iba pa.

Iniulat naman na may mga Pinoy ding lumikas patungong United Kingdom pero bineberipika pa ito ng embahada sa London.

Nangako rin ang DFA na tututulungan nito ang ating mga kababayan hanggang sa makauwi ng Pilipinas.

Mahigit isang daang Pinoy na ang nakaalis ng Kabul mula nang kubkubin ng Taliban ang nasabing bansa.

Kinilala ni Pangulong Rodrigo Duterte ang mga sakripisyo ni Benigno “Ninoy” Aquino Jr. na nagpabago sa landas ng bansa kasabay ng paggunita ng Ninoy Aquino Day.

Sa isang pahayag, muling sinariwa ng Punong Ehekutibo ang alaala at legacy ng yumaong senador.

Ayon kay Pangulong Duterte, mahalagang kilalanin ang pamana ni Aquino sa pamamagitan nang pagpapamalas ng kakayahang isakripisyo ang pansariling interes para sa kapakanan ng mas nakararami.

Matatandaang nilikida si Ninoy noong Agosto 21, 1983 habang pumanaw naman ang anak nitong si dating Pangulong Noynoy Aquino dahil sa karamdaman noong Hunyo 24,2021.

Aarangkada na bukas, Agosto 16, ang enrollment ng mga mag-aaral sa mga pampublikong paaralan para sa School Year 2021-2022.

Ayon sa Department of Education (DepEd), ang pagpapatala ay hindi katulad ng tradisyunal na pagpapa-enroll ng mga estudyante kung saan ang mga magulang at mga estudyante ay nagtutungo pa nang personal sa mga eskuwelahan.

Sa ilalim ng bagong enrollment scheme, ang mga dating adviser ng mga bata o paaralan ang mismong kokontak sa mga magulang ng kanilang dating estudyante para maitala ang mga ito, partikular ang mga nakatira sa lugar na nasa ilalim ng Enhanced Community Quarantine (ECQ) at Modified ECQ.

Maliban dito, maaari rin umanong magpatupad ng drop box enrollment kung saan papayagang ilagay o ihulog na lamang ang enrollment forms sa drop box o booth sa gate ng paraalan.

Iminungkahi rin ng DepEd na dapat ang mga bakunadong guro o non-teaching personnel ang mangunguna sa enrollment ngayong taon.

Dinapuan ng Coronavirus disease 2019 (COVID-19) si Manila City Mayor Francisco ‘Isko Moreno’ Domagoso.

Ayon kay Moreno, agad siyang nagtungo sa Sta. Ana Hospital makaraang makaramdam ng mga sintomas tulad ng ubo, sipon, at panakit ng katawan.

Sa kabila nito, tiniyak ng alkalde na tuloy-tuloy ang operasyon ng Manila LGU at maging ang COVID-19 response ng lokal na pamahalaan.

Matatandaang nagpaturok ng Sinovac vaccine si Moreno noong Abril ngayong taon ilang linggo matapos umarangkada ang national vaccination program ng gobyerno.

Tinatayang nasa P4.8-M na halaga ng marijuana ang winasak ng pinagsanib na puwersa ng Benguet police at anti-illegal drug units sa Bakun, Benguet.

Ayon kay Philippine National Police chief Gen. Guillermo Eleazar, ang higit 6,000 damo sa Sitio Dacap Kayapa ay pinagtulungang sunugin ng mga elemento ng Bakun Municipal Police Station, Provincial Intelligence Unit, Drug Enforcement Unit-Benguet, at Philippine Drug Enforcement Agency (PDEA).

Wala namang nadakip ang mga operatiba ng pamahalaan matapos matunugan ng mga nagbabantay o may ari ang pagdating ng mga awtoridad sa naturang lugar.