Gilbert Perdez

Sa tulong ng isang K9 narcotic detection dog ay nadiskubre ng mga ahente ng Philippine Drug Enforcement Agency (PDEA) ang P680,000 na halaga ng hinihinalang shabu sa Barangay Imadejas, Butuan City.

Ayon sa PDEA, iniinspeksiyon nila ang isang package na sinasabing naglalaman ng computer accessories nang ma-detect doon ng kanilang aso ang ipinagbabawal na droga.

Tinatayang isang daang gramo ng umano’y shabu ang nakuha sa loob ng parcel na nakapangalan sa isang Loida Verallo.

Sasampahan ang suspek ng kasong paglabag sa Comprehensive Dangerous Drugs Act.

Sumirit na sa 1,608,528 ang kabuuang bilang ng mga gumaling sa Coronavirus disease 2019 (COVID-19) sa bansa.

Ito’y matapos makapagtala ang Department of Health (DOH) ng 10,720 na bagong recoveries o katumbas ng 92.45% recovery rate mula sa 1,741,616 na total infections.

Nagkaroon naman ng 14,749 na mga bagong kaso dahilan upang sumampa sa 102,748 ang active cases.

Dahil naman sa 270 na bagong fatalities, umakyat na sa 30,340 ang bilang ng mga nasawi sa buong kapuluan.

Nakapagtala ang Department of Health (DOH) ng 182 na karagdagang kaso ng Delta variant ng Coronavirus.

Dahil dito, ayon sa DOH, sumampa na sa 807 ang kabuuang bilang ng nasabing kaso sa bansa.

Maliban sa Delta variant, nagkaroon din ng mga bagong kaso ng 41 Alpha variant, 66 Beta, 40 Theta, habang nakapagtala rin ng kauna-unahang kaso ng Lambda variant.

Ang tinamaan ng Lambda variant ay isang 35 taong gulang na babae na asymptomatic at kasalukuyang sumasailalim sa sampung araw na isolation period.

Niyanig ng walong magkakasunod na lindol ang Davao Oriental ngayong araw.

Ayon sa PHILVOLCS, yumanig sa may bahagi ng Tarragona ang karamihan sa mga lindol na may lakas na magnitude 3.0 hanggang 3.9.

Naitala ang pinakamalakas na magnitude 3.9 sa layong 124km sa timog silangan ng Tarragona.

Ang pangwalo naman na magnitude 3.4 ay naitala kaninang bandang alas-2:25 ng hapon.

Samantala, wala namang naitalang nasaktan o nasawi at wala ring inaasahang aftershocks sa mga naturang pagyanig.

Ipinagmalaki ng Philippine Statistics Authority (PSA) na ang authentication ng Philippine Identification (PhilID) ay isa sa mga safeguards na ipinatutupad sa ilalim ng Philippine Identification System (PhilSys) Act bilang proteksiyon laban sa mga scammers.

Batay sa Section 5 ng Republic Act 11055 o PhilSys Act at Section 12 ng Revised Implementing Rules and Regulations, maaaring i-validate ang identity o pagkakakilanlan ng isang PhilID holder kahit online o offline.

Ayon sa PSA, sa offline authentication ay maaaring ma-verify ang ID sa pamamagitan ng pag-inspeksiyon ng security features at pag-scan ng taglay nitong QR code.

Ang online PhilID QR Code Verification System ay iro-roll out pa lamang ngayong taon.