Nadakip ng PNP Regional Special Operations Unit-10 (RSOU-10) ang apat na drug suspects kung saan nasabat mula sa mga ito ang P6.8-M na halaga ng umano’y shabu sa Talakag, Bukidnon.
Kinilala ang mga suspek na sina Saanoding Bato, Ebrahim Mamalo, Renaldo Salva, at Jessien Bagas.
Ayon sa pulisya, nasakote ang apat sa ikinasang buy-bust operation sa kanto ng Fortich at Noble Streets sa Barangay 3.
Mahaharap ang mga suspek sa kasong paglabag sa Comprehensive Dangerous Drugs Act.
Isinalang sa special concern lockdown ang 51 lugar sa Quezon City.
Ginawa ng lokal na pamahalaan ang hakbang matapos lumobo ang mga aktibong COVID-19 cases sa mga apektadong lugar.
Nabatid na tinatayang isang daang pamilya o katumbas ng tatlong daang indibidwal ang apektado ng lockdown sa apat na lugar sa Barangay Bahay Toro.
Nangako naman ang QC LGU na magpapadala ito ng mga food packs at essential kits para sa mga residente habang isasailalim din sa swab testing at quarantine ang mga ito.
Mananatili sa ilalim ng Enhanced Community Quarantine (ECQ) ang Laguna hanggang ika-20 ng Agosto.
Ayon kay Presidential Spokesperson Harry Roque, ito ang napagpasyahan ng until Inter-Agency Task Force (IATF), sang-ayon na rin sa rekomendasyon ng Department of the Interior and Local Government (DILG) at pamahalaang panlalawigan.
Matatandaang nakapagtala ang Department of Health (DOH) ng higit 14,000 COVID-19 infections na nangyari sa loob lamang ng isang araw.
Obligado nang sumalang sa 10-day quarantine sa Netherlands ang mga biyaherong galing Pilipinas simula ika-14 ng Agosto.
Ayon sa Dutch Embassy sa Maynila, lahat ng mga travelers ay dapat magsumite ng negatibong swab test na kinuha kahit 48 oras bago umalis ng bansa o negatibong antigen test sa loob ng 24 oras bago ang arrival nito simula ika-16 ngayong buwan.
Nilinaw na sakop ng mandatory quarantine at testing kahit ang mga biyaherong nabakunahan na kontra COVID-19.
Muling nanawagan sa mga Pilipino ang isang election watchdog na magparehistro para makaboto sa Mayo 2022 National & Local Elections.
Ginawa ni Parish Pastoral Council for Responsible Voting (PPCRV) National Vice Chairman Johnny Cardenas ang pahayag ngayong 47 days na lamang bago ang Setyembre 30 deadline ng nationwide voter registration ng Commission on Elections.
Ayon kay Cardenas, mahalaga ang partisipasyon sa eleksiyon lalo na ng mga botante na 18 taong gulang at maging ng mga dating botante na natanggal na sa listahan.
May pagkakataon pa aniyang magparehistro ang mga ito.
Batay sa Republic Act 8189 o Voter’s Registration Act of 1996, pinapayagan ang COMELEC na tanggalin sa voters list ang mga botanteng hindi nakaboto sa dalawang magkakasunod na halalan.
Matagumpay na na-repatriate ng embahada ng Pilipinas sa Iran ang isang Pinay at dalawa nitong anak ilang buwan matapos masagip mula sa pang-aabuso ng dayuhang mister.
Ayon kay Philippine Ambassador to Iran Wilfredo Santos, ang ginang na itinatago sa pangalang “Anna” ay na-rescue ng embahada sa tulong ng Tehran Immigration Police noong Hunyo 2021.
Nabatid na nagtungo sa Iran ang mag-asawa para mamasyal pero inabutan sila ng COVID-19 outbreak at inter-country restrictions.
Nakaranas din ng domestic violence si “Anna” sa kamay ng kanyang mister hanggang sa masagip ito ng mga awtoridad.
Samantala, maliban kay “Anna” at dalawang anak nito, isa pang distressed Filipino ang nakasabay din ng mga ito pauwi ng Maynila.
Sumampa na sa 1,598,314 ang kabuuang bilang ng mga gumaling sa Coronavirus disease 2019 (COVID-19) sa bansa.
Ito’y makaraang makapagtala ang Department of Health (DOH) ng 11,714 na bagong recoveries.
Batay sa pinakabagong datos ng DOH, nagkaroon naman ng 14,249 na bagong infections kaya’t sumirit na sa 1,727,231 ang total cases.
Sa nasabing bilang, nasa 98,847 ang mga aktibong kaso.
Samantala, dahil naman sa 233 na COVID-19 fatalities ay umakyat na sa 30,070 ang death toll sa buong kapuluan.
Nagkasugapa ang Pakistani forces at daan-daang Afghans sa Pakistan-Afghanistan border na isinara ng Taliban.
Nangyari ang grupo matapos pumanaw ang isang limampu’t anim na taong gulang na Afghan traveler dahil sa atake sa puso habang naghihintay na mabuksan ang Chaman-Spin Boldak crossing papasok ng Afghanistan.
Ipinanawagan ng mga demonstrador sa Pakistani government office na buksan muli ang border hanggang sa pinagbabato na nila ang security forces na agad namang binira ng tear gas at baton ang mga nagpoprotesta.
Wala namang iniulat na nasaktan o nasawi sa nasabing insidente.
Patay ang isang Air Force Pilot sa panibagong pambobomba sa Kabul, Afghanistan.
Kinilala ang biktima na si Hamidullah Azimi na nasawi matapos taniman ng bomba ang kanyang sasakyan.
Ayon sa mga awtoridad, limang iba pang sibilyan ang nasugatan sa insidente.
Sa isang pahayag, agad namang inako ni Taliban spokesman Zabihullah Mujahid ang naturang pag-atake.
Humakot ng apat na parangal ang Pinoy supergroup na SB19 sa MYX Music Awards kagabi.
Kabilang sa mga nakuhang awards ng P-Pop group ay ang Song of the Year at Artist of the Year.
Tinalo ng SB19 ang Ben&Ben, Moira dela Torre, Nadine Lustre, at MNL48 para sa Artist of the Year trophy habang itinanghal namang top song ngayong taon ang awiting “Alab” ng grupo.
Samantala, sa nasabing virtual awards night, nasungkit din ng SB19 ang Kumu Audience Choice Award.