Gilbert Perdez

Nagbabala sa publiko ang Department of Justice (DOJ) laban sa isang internet user na nagpapanggap umano bilang si Justice Secretary Menardo Guevarra sa pamamagitan ng pekeng email at sinasabing ginagamit ito para makabili ng iTunes gift cards.

Sa isang advisory, isiniwalat ng cybercrime division ng DOJ na ang nasabing tao ay gumagamit ng email address na osecmig1@gmail.com  at nagpapanggap bilang si Guevarra.

Ngunit ayon sa ahensya, ang tunay na email ni Guevarra ay osecmig@gmail.com.

Kasabay nito, nilinaw din ng DOJ na hindi nito ini-endorso ang pekeng email at hindi rin ito nanggagaling sa kanila.

Pinag-aaralan na ng Department of Justice (DOJ) ang posibleng legal na hakbang na maaaring gawin  laban sa isang US diplomat na dating nakatalaga sa American Embassy sa Maynila na inakusahang nakipagtalik ng isang menor de edad.

Ayon kay Justice Secretary Menardo Guevarra, ang suspek na si Dean Cheves na dating miyembro ng US Foreign Service ay nahaharap sa kasong kriminal sa Estados Unidos bunsod ng umano’y “illicit sexual conduct” sa isang labing-anim na taong gulang na dalagita at “possession of child pornographic materials” noong nasa Pilipinas pa ito.

Batay sa rekord ng korte, nakilala ni Cheves ang dalagita sa social media at sinasabing nakipagtalik dito ng dalawang beses.

Maliban dito, kinunan din umano ng video ni Cheves ang mga ginawa nitong kahalayan sa biktima.

Isasailalim sa Enhanced Community Quarantine (ECQ) ang Bataan province simula bukas, ika-8 hanggang ika-22 ng Agosto dahil sa banta ng COVID-19 Delta variant.

Ito ang inanunsiyo ni Presidential Spokesperson Harry Roque matapos aniyang aprubahan ni Pangulong Rodrigo Duterte ang dalawang linggong lockdown na inirekomenda ng Inter-Agency Task Force (IATF).

Una rito, isinailalim na rin sa ECQ ang Iloilo City, Laguna, at Cagayan De Oro upang mapigilan ang pagkalat ng bagong variant na unang natuklasan sa India.

Nakalabas na ang bagyong Huaning sa Philippine area of responsibility (PAR).

Ayon sa PAGASA, huling namataan ang bagyo sa layong higit limang daang kilometro north northeast sa bayan ng Itbayat sa Batanes at kumikilos ito pa-silangan hilagang silangan sa bilis na apat na pung kilometro kada oras.

Bagama’t nakalabas na ng bansa, palalakasin pa rin umano nito ang southwest monsoon o hanging habagat na maaaring makaapekto sa Batanes, Babuyan Islands, Ilocos Norte, Ilocos Sur, Apayao, at Abra.

Blended learning pa rin ang sistema ng edukasyon sa pagbubukas ng klase sa Setyembre para sa school year 2021-2022.

Ito ang nilinaw ng Department of Education (DepEd) kung saan nangangahulugan na marami pa ring opsiyon ang mga guro sa kanilang pagtuturo tulad ng online, modular o printed materials, telebisyon, o radyo.

Ayon sa DepEd, hindi pa rin papayagan ang face-to-face classes, maliban lamang kung aaprubahan o ipag-uutos ito ni Pangulong Rodrigo Duterte.

Aarangkada naman ang enrollment sa Agosto  16 hanggang Setyembre 13.

Samantala, itinakda ang holiday break sa December 20, 2021 hanggang January 2,2022 at magbabalik ang klase sa January 3, 2022.

Naglabas na ng joint guidelines ang Department of the Interior and Local Government (DILG), kasama ang Department of Social Welfare and Development (DSWD) at Department of National Defense (DND) ukol sa pamamahagi ng ayuda para sa mga apektado ng ECQ o Enhanced Community Quarantine sa Metro Manila.

Ayon kay DILG Secretary Eduardo Año, nakasaad sa Joint Memorandum Circular No. 3 na maaari nang simulan ng mga local government units (LGUs) ang pamimigay ng  financial assistance sa kalagitnaan ng susunod na linggo pagkatapos ng kanilang preparasyon.

Aabutin ng P1,000 ang ayuda kada indibidwal o hanggang P4,000 kada low-income family na apektado ng ECQ na umarangkada nitong Agosto 6 hanggang 20, alinsunod na rin sa resolusyon ng Inter-Agency Task Force (IATF).

Binibigyan naman ng hanggang labinlimang araw ang mga LGUs para distribusyon ng ayuda ngunit maaaring ma-extend kung ihihirit ng ilang lokal na pamahalaan.