Patay ang 16 na minero habang sugatan naman ang tatlong iba pa matapos mahulog sa bangin ang sinasakyan nilang bus sa Cotabambas Province sa Peru.
Ayon sa pulisya, lulan ng bus ang mga manggagawa ng las bambas copper mine nang mawalan ng kontrol dito ang tsuper hanggang sa mahulog sa bangin na may lalim na 200 metro.
Ang Peru ay itinuturing na ikalawang pinaka-malaking copper producer sa buong mundo.
Makikipag-dayalogo ang militar sa mga magkalabang pulitiko sa Al-barka, Basilan upang maiwasan ang matinding karahasan habang papalapit ang eleksiyon.
Ayon kay 101st infantry Brigade Commander Brig. Gen. Domingo Gobway, gumagawa na sila ng mga hakbang upang hindi na maulit ang sagupaan sa pagitan ng mga supporters nina Al-barka Mayor Darussalam Lajid at Vice Mayor Mujib Jakilan kung saan kapwa namatayan ang magkabilang panig.
Nagsimula umanong magkagirian sina Lajid at Jakilan nang humirit ng re-election ang alkalde na salungat sa napagkasunduan nila ng Vice Mayor.
Nag-deploy na rin ang AFP ng mga sundalo sa Al-barka para umasiste sa pulisya sa pagpapanatili ng kaayusan at kapayapaan sa naturang bayan.
Iniimbestigahan ngayon ang isang bagitong pulis dahil sa umano’y panghahalay sa isang babaeng hinuli nito dulot ng paglabag sa quarantine protocols sa Mariveles, Bataan.
Kinilala ni Police Regional Office 3 Director Brig. General Valeriano De Leon ang suspek na si Patrolman Elmer Tuazon Jr.
Hinuli ni Tuazon ang 19 taong gulang na dalaga at dinala ito sa isang boarding house para isabak sa community service pero doon ay ginahasa umano ito.
Mahaharap sa kasong rape si Tuazon habang Acts of lasciviousness naman ang isasampa laban sa Marshal Team Leader na si Armando Dimaculangan dahil umano’y pangmomolestiya naman sa biktima.
TINATANGGAP ng Bureau of Internal Revenue ang Philippine Identification card o national ID bilang balidong ‘proof of identity’ sa lahat ng mga transaksiyon sa kanilang tanggapan.
Ito ang inanunsiyo ng Philippine Statistics Authority o PSA kasunod ng kaliwa’t kanang reklamo na hindi tinatanggap sa ilang ahensya ng gobyerno at maging sa bangko ang PhilID dahil wala itong pirma.
Ayon sa PSA, kasama ang BIR sa mga national government agencies na nag-eendorso ng PhilID, at maging ang Philippine Postal Corporation o PHLPost at Department of Foreign Affairs.
Samantala, nanawagan naman ang Central Bank of the Philippines sa mga bangko na i-honor o tanggapin ang PhilID ng kanilang mga kliyente.
MULING binuksan ng Pasay City General Hospital o PCGH ang kanilang Obstetrics and Gynecology o OB-Gyn sa gitna ng pagtaas ng COVID-19 cases.
Pero nilinaw ni PCGH officer in charge Dr. John Victor de Gracia na ito’y para lamang sa mga kritikal na kaso.
Sinabi ni de Gracia na tatanggap na muli ang kanilang OB-Gyn section ng mga pasyenteng nangangailangan ng emergency treatment dahil kasalukuyan pang nagpapagaling ang ilang nurse at doctor na tinamaan ng impeksiyon.
Samantala, ang mga non-complicated OB-GYN cases naman ay ire-refer sa Doña Martha lying-in clinic na matatagpuan sa Don Carlos Village.
PINAAALALAHANAN ni PNP Chief Gen. Guillermo Eleazar ang lahat ng mga pulis na maging alerto laban sa mga bogus beneficiaries.
Ginawa ni Eleazar ang pahayag matapos maaresto ang isang barangay chairman at tatlong iba pang indibidwal sa Maynila dahil sa umano’y pagnanakaw ng ayuda para dalawang kwalipikadong benepisyaryo na nagkakahalaga ng walong libong piso.
Nabatid na gumamit ng mga pekeng identification cards at nameke ng mga dokumento ang mga suspek upang makuha ang cash assistance na hindi naman para sa kanila.
Ayon kay Eleazar, dapat tulungan ng mga naka-deploy na PNP personnel ang mga opisyal ng barangay para matiyak na nasa opisyal na lsitahan ang mga kumukuha ng ayuda.
MULING nakiusap ang Department of Health (DOH) sa mga health care workers na huwag nang ituloy ang kanilang mass protest sa Setyembre 1.
Ayon kay Health Undersecretary Maria Rosario Vergeire, sinisikap ng gobyerno na mabayaran ang atraso nito sa mga manggagawang pangkalusugan ngayong panahon ng krisis.
Giit ni Vergeire, namemeligrong mapilayan ang health care system at hospital operations kapag natuloy ang demonstrasyon lalo pa’t tumataas ang bilang ng mga tinatamaan ng COVID-19 sa bansa.
Tinatayang dalawang libong medical workers ang lalahok sa mas protest pagkatapos ng August 31 deadline para maibigay ang kanilang Special Risk Allowance o SRA, hazard pay, at meal o transportation benefits.
WALANG natanggap ang Pilipinas na kontaminadong bakuna na gawa ng Moderna.
Ito ang isiniwalat ng Department of Health o DOH makaraang suspendihin ng Japan ang paggamit ng tinatayang 1.63 million doses ng American-made vaccines nang ma-detect ang umano’y “foreign substances” sa ilang vials nito.
Ayon kay Health Undersecretary Maria Rosario Vergeire, sinisiguro ng gobyerno na naipatutupad ang ilang protocols para maiwasan ang kontaminasyon.
Una nang inamin ng mga Japanese authorities na naipamahagi na sa mahigit walong daang vaccination centers ang ilang doses ng bakuna ng Moderna at wala namang naiulat na “health damages” na may kaugnayan dito.
UMAKYAT na sa mahigit 1.7 milyon ang bilang ng mga Pilipinong gumaling sa COVID-19.
Ito’y makaraang makapagtala ang Department of Health o DOH ng lagpas 19,000 na bagong recoveries.
Batay sa pinakabagong case bulletin, binanggit ng ahensya na nagkaroon ng higit 19,000 na bagong impeksiyon.
Sa kasalukuyan, nasa 142,679 na ang total active cases. Samantala, dahil naman sa pagpanaw ng mahigit isang daang pasyente ay pumalo na sa 33,008 ang death toll sa buong kapuluan.
PINATAOB ni Pinoy fighter Jenelyn Olsim ng Team Lakay ang kalaban nitong Vietnamese-American na si Bi Nguyen sa pamamagitan ng unanimous decision sa “ONE: Battleground III” sa Singapore Indoor Stadium.
Sa unang dalawang rounds ay pinahirapan ni Olsim si Nguyen nang magpaulan ito ng maraming suntok.
Pagsapit naman ng ikatlong round ay gumawa si Olsim ng tatlong submission attempts laban kay “Killer Bee”.
Nag-rally sa dulo si Nguyen pero si Olsim pa rin ang nangibabaw sa naturang laban.