DWIZ 882

Inaprubahan sa ikatlong pagbasa ng Kamara ang House Bill 1-0-9-7-1 na nagmumungkahing palawigin sa limang taon ang termino ng mga barangay at Sangguniang Kabataan officials.

Sa ilalim ng panukala, muling ipagpapaliban ang halalan at itatakda ito sa ikalawang Lunes ng November 2028.

Ayon sa mga tumututol sa panukala, dalawang beses nang naipagpaliban ang barangay at SK elections mula noong 2022 kaya’t mahalagang maisagawa ang regular at tunay na halalan upang matiyak na ang kapangyarihan ng mga opisyal ay nakabatay sa mandato ng mga mamamayan.

Matatandaang noong nakaraang Lunes, September 7, nagsumite sina Congressman Pulong Duterte at ng kanyang kasamang mambabatas ng isang resolusyon na nanawagan ng suporta para maisagawa ang nakatakdang halalan sa November 2026.

Gayunman, sa pag-usad ng House Bill 1-0-9-7-1, lumalakas ang posibilidad na muling maipagpaliban ang eleksyon.

Samantala, iginiit ng mga tumututol na ang halalan ay hindi dapat ituring na opsyon lamang, dahil ito’y pangunahing karapatan ng bawat Pilipino at mahalagang mekanismo ng check and balance sa pamahalaan.

Sa kabilang dako, para kay dating SK Chairman at kasalukuyang Municipal Councilor Angelo Laurence Arriola ng Pagbilao, Quezon, hindi dapat alisin sa mamamayan ang karapatang pumili ng mga bagong lider at palitan ang mga opisyal na hindi nakatutugon sa kanilang tungkulin.

Binigyang-diin din ni Councilor Arriola na ang papel ng Sangguniang Kabataan bilang plataporma sa paghubog ng mga bagong lider-kabataan. | Sa panulat ni Reabelle Medina

Inaasahang haharap bilang testigo si dating Senator Antonio Trillanes IV sa impeachment trial ni Vice President Sara Duterte.

Ayon kay Deputy Speaker Paolo Ortega V, tatalakayin ni Trillanes ang resulta ng sarili niyang imbestigasyon sa umano’y hindi maipaliwanag na yaman ng bise presidente.

Sinabi ni Ortega na magiging mahalaga ang testimonya ni Trillanes dahil matagal na nitong sinusuri ang financial situation ng pamilya Duterte.

Hindi naman muna inihayag ni Ortega ang pagkakasunod-sunod ng mga testigong haharap para sa ikalawang impeachment article.

Duda ang ilang mambabatas kung tuluyan na talagang ma-iimplementa ang sisenta-pesos na umento sa sahod para sa mga minimum wage earner sa Metro Manila sa Setyembre 26 o 27.

Sa pagdinig ng House Appropriations Committee tungkol sa budget ng Department of Labor and Employment, sinabi ni DOLE National Capital Region Director Roy Buenafe na nag-isyu na ito ng Wage Order 28, na iginiit ang dagdag-60 pesos sa arawang sahod ng minimum wage.

Ayon kay Trade Union Congress Party Representative Raymond Mendoza, posibleng maging taliwas ang panibagong Wage Order sa naunang Wage Order 27, na nag-uutos sa pautay-utay na dagdag-sahod na 85 pesos, kung saan 60 pesos ang dapat na umento noong Hulyo, at daragdagan ng dalawampu’t limang piso sa 2027.

Bago nito, nagkainitan sina Kamanggagawa Party-list Representative Eli San Fernando at Labor Secretary Francis Tolentino tungkol sa sinuspindeng umento sa sahod dahil sa preliminary injunction ng Pasig Regional Trial Court.

Ayon kay San Fernando, dahil hindi nabayaran ng dalawang construction company na petitioner sa kaso ang sampung-bilyong-pisong bond na ipinag-utos ng korte, wala na dapat hadlang sa pag-iimplementa sa umento sa sahod.—sa panulat ni Anjo Riñon

Mula sa impeachment trial, nalipat ang teleserye sa Cardinal Santos Medical Center.

Ito ang inihayag ni Senador Imee Marcos makaraang tigil muna bukas ang impeachment trial kay Vice President Sara Duterte sa harap ng plano ng prosecution na ipa-subpoena ang bise presidente para ito ang mapaharap at mapasagot sa usapin ukol sa umano’y maling paggamit sa confidential fund ng Office of the Vice President at Department of Education noong ang pangalawang pangulo ang Education Secretary.

Nabatid na naka-hospital arrest naman si dating House Speaker Martin Romualdez sa Cardinal Santos Medical Center makaraang masilbihan ng warrant of arrest kaugnay ng kasong plunder.

Tumanggi rin ang senador na magkomento ngayong nakasuhan na ang kanyang pinsan, na itinuturo niyang isa sa mga mastermind sa flood control scandal.—sa panulat ni Anjo Riñon

Nanawagan sa House Appropriations Committee si Kamanggagawa Party-list Representative Eli San Fernando na i-defer ang konsiderasyon ng komite sa budget proposal ng Department of Labor and Employment, maliban na lamang sa budget proposal nito sa TESDA.

Nag-ugat ang pagbabanta ni San Fernando sa sinasabi niyang kawalan ng kakayahan ng DOLE na ipatupad ang otsenta’y-singko-pesos na umento sa sahod ng mga minimum wage earner sa Metro Manila.

Ayon sa mambabatas, may kapangyarihan ang DOLE na ipatupad ang umento sa sahod ng mga manggagawa dahil iginagawad ito ng batas sa kagawaran.

Kalaunan, dahil sa naging sagot ni Labor Secretary Francis Tolentino sa komite, hindi na naiwasan ni San Fernando na magbantang i-defer ang budget proposal ng DOLE.—sa panulat ni Anjo Riñon

Walang basehan ang pahayag ni Vice President Sara Duterte na hindi siya ligtas sa Pilipinas.

Ito ang sinabi ni Palace Press Officer Claire Castro kasunod ng pagkakababa ng warrant of arrest laban sa pangalawang pangulo kaugnay ng tatlong counts ng grave threats.

Ayon kay Castro, wala umanong naitalang impormasyon ang Philippine National Police at National Bureau of Investigation hinggil sa sinasabing banta sa buhay ng Bise Presidente.

Giit pa niya, patuloy na ginagampanan ng mga law enforcement agency ang kanilang mandato na tiyakin ang seguridad at proteksyon ng bawat Pilipino.

Sinabi rin ni Castro na nakatutok ang PNP at iba pang ahensya ng pamahalaan sa pagpapanatili ng seguridad ng lahat, kabilang ang mga opisyal ng pamahalaan.

Dahil dito, hinamon ni Castro si VP Sara na ilahad mismo ang batayan at anumang ebidensya sa likod ng kanyang pahayag na hindi siya ligtas sa bansa.

Handang harapin ni dating House Speaker at Leyte Rep. Martin Romualdez ang mga alegasyong ibinabato laban sa kanya sa legal na proseso.

Ginawa ni Romualdez ang pahayag bago siya arestuhin kagabi sa kasong plunder na isinampa ng Office of the Ombudsman sa Sandiganbayan laban sa kanya, kay dating Congressman Zaldy Co, at iba pang sangkot umano sa kickback scheme sa flood control projects.

Ayon kay Atty. Ade Fajardo, abogado at tagapagsalita ni Romualdez, iginagalang ng mambabatas ang mga korte at haharapin nito ang mga alegasyon laban sa kaniya alinsunod sa batas.

Ayon kay Fajardo, hindi dapat mapalitan ng public interest o malaking atensyon ng publiko ang judicial process, dahil ang criminal liability ay dapat matukoy batay sa mga ebidensyang inilalahad sa korte.

Nilinaw din ng abogado na walang hinihiling na espesyal na pagtrato si Romualdez habang hinaharap ang mga paratang laban sa kanya; bagkus, hinihiling lamang umano nito ang parehong due process at makatarungang pagdinig na ipinagkakaloob sa bawat Pilipino.—sa panulat ni Anjo Riñon

Walang alokasyon sa ilalim ng panukalang 2027 National Budget ang Academic Recovery and Accessible Learning o ARAL Program ng Department of Education.

Ito ang kinumpirma ni Education Secretary Sonny Angara sa pagdinig ng House Committee on Appropriations, kasunod ng pagtatanong ni Bulacan Rep. Salvador Pleyto.

Ayon kay Angara, nasa 9 billion pesos ang pondo ng ARAL Program ngayong 2026, habang humihiling ang DepEd ng 9-point-98 billion pesos para sa susunod na taon.

Nakalaan sana ang pondo para sa kompensasyon ng halos labing-anim na libong ARAL tutors, learning recovery at remediation consultations, at mga ARAL learning resources.

Iginiit ni Angara na epektibo ang programa, na nakatulong umano sa mahigit anim na milyong estudyante.

Paliwanag ni Angara, isang nationwide educational intervention ng DepEd ang ARAL Program, na may layuning matulungan ang mga estudyante na makahabol sa “foundation skills” sa pagbabasa, math, at science; kaya umaasa ang DepEd na mapagbigyan ang kanilang hiling para sa taong 2027.