DWIZ 882

Mariing kinuwestyon ni Senador Robin Padilla ang pagkakaroon ng kasong grave threats sa Quezon City Regional Trial Court ni Vice President Sara Duterte.

Giit ni Padilla, batay sa Konstitusyon, isa ang Bise Presidente sa impeachable officers, at malinaw sa Supreme Court ruling sa kasong “Ombudsman versus Court of Appeals” na mayroon itong immunity from suit.

Sa kaniyang manifestation sa plenary session, sinabi ni Padilla na binalot siya ng karimarimarim na balita na may kaso sa RTC ang nakaupong Bise Presidente, na isang impeachable officer.

Maaari lang aniya umusad ang kasong kriminal laban sa Bise Presidente kapag tapos na ang kaniyang termino.

Tutungo ng France si Ombudsman Jesus Crispin Remulla upang ipaalam sa mga otoridad doon tungkol sa hinihinala niyang asylum application nina dating Congressman Zaldy Co at Senador Loren Legarda.

Ayon kay Remulla, nagmimistulan nang taguan ang nasabing bansa ng mga opisyal ng pamahalaan na may mga kaso ng pandarambong sa Pilipinas.

Naniniwala ang Tanodbayan na nasa Paris si Co, at posibleng mag-apply rin ng asylum si Legarda upang takasan ang kinasasangkutan nito kaugnay ng solar energy scandal ng kaniyang anak na si Batangas First District Representative Leandro Leviste.—sa panulat ni Anjo Riñon

Hindi muna pangungunahan ng depensa ang magiging posisyon nila sa planong pagpapatawag kay Vice President Sara Duterte sa impeachment trial.

Ayon kay Defense Counsel Atty. Micheal Poa, hindi pa napapanahon pag-usapan ang isyu dahil wala pa namang pormal na hinihinging subpoena ang prosecution para sa Bise Presidente.

Aniya, prerogative ng prosecution kung nais nitong paikliin ang presentasyon nito, kung sa tingin ng mga prosecutor ay nakamit na nila ang kanilang mga layunin.

Dagdag pa ni Poa, hindi nila inaasahan ang posibilidad na pagpapatawag sa Vice President, bagama’t napag-usapan na ito noong mga unang araw ng paglilitis.

Sa ngayon, hindi dapat anya mabahala dahil hindi pa malinaw kung ano ang magiging layunin ng subpoena laban kay VP Sara at kung ano ang magiging saklaw ng testimonya na nais nilang makuha. | via Jenn Patrolla (Patrol 38)

Nilinaw ng House prosecution panel na kanila munang tatapusin ang presentasyon sa lahat ng Articles of Impeachment bago hilingin sa Senate impeachment court ang pagpapa-subpoena kay Vice President Sara Duterte.

Ito ang sinabi ni Private Prosecutor Atty. Lorna Kapunan na napagpasyahan ng kapwa public at private prosecutors na isantabi na lamang ang mga testigong naka-subpoena para sa lahat ng natitirang labinlimang testigo.

Para kay Kapunan, magiging mahalaga ang testimonya ng Bise Presidente hindi lamang sa mga alegasyon tungkol sa confidential funds kundi maging sa iba pang artikulo, partikular na ang Article 4 na tumutukoy sa grave threats o bantang pagpapatay kina Pangulong Ferdinand Marcos Jr.; First Lady Liza Araneta Marcos; at dating House Speaker Martin Romualdez.

Hinikayat ng prosekusyon si VP Sara na humarap at igalang ang impeachment process at patunayan ang kaniyang pahayag na siya ay isang inosente.

Humiling din si Kapunan sa impeachment court na suriin ang mga ebidensya at mga testimonya nang walang kinikilingan at walang halong pulitika tungo sa patas na pagkamit ng hustisya at katotohanan. | via Geli Mendez (Patrol 30)

Naniniwala ang Makabayan Bloc na hindi si dating House Speaker Martin Romualdez ang tunay na “big fish” sa flood control scandal.

Ito ang sinabi ni House Assistant Minority Leader at Kabataan Party-list Rep. Renee Co, na ang pag-aresto kay Romualdez ay simula pa lamang ng laban kontra kurapsyon.

Para kay Co, dapat na may managot sa mga miyembro ng Gabinete ni Pangulong Ferdinand Marcos Jr. na sangkot umano sa katiwalian.

Aniya, hindi nagsimula at hindi matatapos kay Romualdez ang laban kontra korapsyon.

Kinuwestiyon din ni Co ang umano’y pagbabalik ng pork barrel sa panukalang 2027 National Budget, sa kabila ng nagpapatuloy na corruption scandal.

Dismayado rin ang kongresista sa pagbabalik ng bilyun-bilyong pisong pondo para sa flood control projects, na malaking bahagi umano ay nakasentro sa DPWH Central Office. | via Geli Mendez (Patrol 30)

Igagalang ng House prosecution panel ang magiging desisyon ni Vice President Sara Duterte kung siya ay dadalo o hindi sa kaniyang impeachment trial.

Ito ang sinabi ni House Lead Prosecutor Gerville Luistro, sakaling hilingin na ng prosecution sa Senate impeachment court na ipasubpoena ang Bise Presidente.

Ayon kay Luistro, nakay VP Sara pa rin ang desisyon kung haharap siya sa pagdinig, lalo’t kinikilala ng prosecution ang kaniyang karapatan laban sa self-incrimination.

Ito’y matapos sabihin ni Private Prosecutor Atty. Lorna Kapunan na nais ng prosecution na iharap ang Bise Presidente sa witness stand upang tuluyang mabigyang linaw ang alegasyong nakapaloob sa Article 1 o maling paggamit ng confidential funds.

Iginiit ni Luistro na ang nagpapatuloy na impeachment trial ang tamang forum para sagutin ng Bise Presidente ang mga alegasyon laban sa kaniya.

Binanggit din niya na noong impeachment trial ni dating Supreme Court Chief Justice Renato Corona noong 2012, personal itong dumalo sa mga pagdinig.

Gayunpaman, nirerespeto aniya ng prosecution ang magiging desisyon ni VP Sara at mahalagang malaman kung ano ang mas matimbang sa kaniya—ang pananagutan sa ilalim ng Konstitusyon o ang paggamit ng karapatan laban sa self-incrimination. | via Geli Mendez (Patrol 30)

Kinumpirma ng Office of the Ombudsman na marami pang inihahandang kaso laban kay dating House Speaker Martin Romualdez kasunod ng plunder case na isinampa nitong Lunes, Setyembre 7.

Ayon kay Assistant Ombudsman Mico Clavano, natukoy ng mga imbestigador ang mga ebidensya hinggil sa umano’y 56 hanggang 57 billion pesos na ipinadala sa kongresista na nagmula umano sa mga flood control projects.

Ipinaliwanag ni Clavano na bagama’t 7.4 billion pesos na kickback pa lamang ang saklaw ng kasong isinampa, hindi ito kumakatawan sa kabuuang halagang sinisiyasat ng mga otoridad.

Aniya, ito muna ang inihain na kaso dahil ito pa lamang ang halagang may sapat na ebidensyang napatunayan ng mga imbestigador.

Samantala, pinag-aaralan din ng Ombudsman ang paghahain ng money laundering case sa pagpapatuloy ng imbestigasyon sa mga ari-arian na may kaugnayan sa mambabatas.—sa panulat ni Reianne Antiquina

Pumalo sa mahigit 3.14 million na Pilipino ang walang trabaho noong Hulyo.

Batay sa July Labor Force Survey ng Philippine Statistics Authority, sumipa sa 6% ang unemployment rate noong Hulyo mula sa 4.9% o katumbas ng 2.59 million na naitala noong Hunyo.

Ito na ang pinakamataas na bilang ng mga walang trabaho mula noong Disyembre 2021 na nakapagtala ng 6.6 na unemployment rate.

Samantala, bumaba naman sa 94% ang employment rate noong Hulyo, mula sa 95.1% noong Hunyo.—sa panulat ni Reianne Antiquina

Kinumpirma ni Interior Secretary Jonvic Remulla na itinuturing pa rin na “flight risk” si dating House Speaker Martin Romualdez sa kabila ng pagkakaaresto sa kanya, kagabi.

Ayon kay Secretary Remulla, dalawang private jet, tatlong helicopter at tatlong yate ang pag-aari ng kongresista na maaaring gamitin sa posibleng pagtakas.

Sa ngayon anya, bantay-sarado pa rin mga kapulisan ang kwarto ng kongresista sa Cardinal Santos Hospital ngunit ihiihirit nila sa Sandiganbayan na mailipat ang kustodiya ng mambabatas sa PNP General Hospital sa Kampo Crame.

Nahaharap si Romualdez sa kasong plunder kaugnay sa 7.4-billion pesos kickback scheme sa maanomalyang flood control projects.—sa panulat ni Reianne Antiquina

Naniniwala si dating Sandiganbayan Associate Justice Alex Quiroz na hindi dapat pagsabayin ang impeachment trial at ang kasong grave threats laban kay Vice President Sara Duterte.

Ayon kay Justice Quiroz, kabilang na ang kasong grave threats sa articles of impeachment kaya’t hindi maaaring maghain ng hiwalay na kaso habang nagpapatuloy ang paglilitis.

Samantala, nilinaw ni Justice Quiroz na hindi special treatment ang hindi pagkuha ng mugshot ng Bise Presidente dahil kusa itong sumuko.—sa panulat ni Reianne Antiquina