Binigyang-diin ng House prosecution panel na hindi maaaring dedmahin ni Davao City Mayor Sebastian “Baste” Duterte ang subpoena na inihain ng Senate Impeachment Court.
Ayon kay House Prosecution Legal Counsel at Spokesman Atty. Benjamin Tolosa, kailangang humarap sa Impeachment Court si Mayor Baste sakaling ipatawag siya para tumestigo sa Article II na tumutukoy sa unexplained wealth o hindi maipaliwanag na yaman ng kanyang kapatid na si Vice President Sara Duterte.
Layunin umano ng pagpapatawag kay Mayor Baste na mabigyang-linaw ang mga transaksiyon ng Davao City government sa Gen-Corp Industries at iba pang negosyong nakalista sa business interests ni VP Sara.
Sinabi pa ni Tolosa na hihilingin din ng prosecution ang pagiging “hostile witness” ni Mayor Baste, pero nakadepende pa rin kung papayagan ito ng Senate Impeachment Court.
Inisyu na ni Presiding Judge Senator Chiz Escudero ang subpoena at nakatakdang humarap si Mayor Baste sa September 23. | Sa panulat ni Geli Mendez
