Ipinagpaliban ng Kamara ang plenary deliberations para sa panukalang 2027 budget ng Department of Information and Communications Technology o DICT at mga attached agencies nito.
Ito’y matapos hilingin ni PHILRECA Party-list Representative Presly De Jesus na maipatawag sa Kongreso si Meta CEO Mark Zuckerberg para magpaliwanag at matugunan ang mga isyu ng online scams at patuloy na pambibiktima sa mga kabataan.
Ayon kay House Appropriations Panel Vice Chairperson Brian Poe, sumulat na ang DICT kay Zuckerberg at hiniling na humarap ito sa pagdinig, pero wala umano itong tugon.
Duda naman si De Jesus na pupunta sa bansa si Zuckerberg dahil “katiting” lamang umano ang Pilipinas para sa kanya.
Iginiit ng mambabatas na dapat maging responsable at accountable ang Meta, pero nilinaw naman ni Poe na nagpapadala ang Meta ng mga legal na kinatawan nito.
Iginiit ni De Jesus na kailangan ng Kongreso ng sapat na impormasyon tungkol sa anti-scam initiatives para magkaroon ng tamang assessment at matukoy ang nararapat na pondo para sa DICT.
Dahil dito, nagmosyon siyang i-defer ang budget deliberations ng DICT.
Sinabi naman ng DICT na nirerespeto nito ang Kamara na tinutupad lamang ang oversight function nito. | Sa panular ni Geli Mendez
