Tiniyak ng Commission on Human Rights o CHR na kanilang tatapusin ngayong taon ang 140 kaso ng extrajudicial killings o EJK na ipinatupad sa ilalim ng giyera kontra ilegal na droga ng administrasyong Duterte.
Ito ang sinabi ni House Appropriations Panel Vice Chairperson Cristina Talavera-Lopez sa ginanap na deliberasyon sa plenaryo ng Kamara, kung saan 140 kaso na ang “for disposition” ng EJK Task Force matapos ang isinagawang review at pagbuo ng mga resolusyon.
Ayon kay Lopez, umabot sa 493 kaso ang isinailalim sa re-investigation noong 2024, habang 289 naman noong 2025, at nagpapatuloy pa ang imbestigasyon sa iba pang kaso.
Ikinalugod naman ng ilang mambabatas ang hakbang at commitment ng CHR, dahil mahalaga aniya ang pagpapatuloy ng laban tungo sa pagkamit ng hustisya.
Ang CHR ay may mandato na mag-imbestiga at mag-monitor ng mga alegadong paglabag sa karapatang pantao, kabilang ang mga insidenteng may kaugnayan sa anti-illegal drug campaign. | Sa panulat ni Geli Mendez
